Mbeagani ntɔa-ajede sɔsɔbɛ anu
5
1 Bámongodigi gea te, bo na nyɔngɔ íɛbɛ phɛ̂. Nga, ka benu moti ambu nka-abhakɛ. Ai baya! Bókó na soni? Nga, bakpa nde bánaomǔbha Mokonga bákágimbɛ mɔnɔ bo! 2 Benu gǎkɛ, boóbhebha phɛ̂ ka nyɔngɔ íɛbɛ ndɔɔ.a Atɔ́keni bóbɛ na bɔmbɛ. Bómbeɛgɛ nkpa ndɔ sɔsɔbɛ anu3-4 Cɔ, nanga néba danga ka nyama, ne tɔ kimoti na benu ka měma. Ka mmbɔ agi bojede ndɔ, neteni yetɔ nyɔngɔ nɛkɛ k'ina á Mɔkɔta Yéso.
Ambe bódhondanɛ. Bebande kimoti ka měma. Bukpɛkpɛ á Mɔkɔta nɛsu Yéso abande phɔtɔ bei. 5 Cɔ, ndeketani nkpa ndɔ ka njaga á Sɛtáni geae, yɛ áujɛ nyama akɛ, měma akɛ áamɛ ndiu esa nde Mɔkɔta Yéso ajuaeka.
6 Ebhebha anu gu á nkpa ndɔ nna anja. Baya, bókûubha mɛni? «Cacu abhɔa aobimbisa mokati bhui.»b 7 Bii a bó, tokisani cacu á kala, nndɔ ajede, ka gea bóbɛ bakpa ba anja ka měma. Neuubha geae, Mokonga asokosi měma anu bii Yéso Kiísito ǎnokui bea mɔgɔgɔ, mmbe baYúdha bámoe ka maseye á toka abɔ ka kɔkɔbɛ. 8 Cɔ, béguɛni jaí á toka asu ka bojede, kanga á cacu á kala. Cacu ndɔ a bea bojede n'iɛbɛ. Béguɛni jaí ndɔ na mokati kanga á cacu. Mokate ndɔ a bea doni na bonjánja.
9 Subi á baobá́ ndɔ dénodundui, dénogi te, bókodhadokeanɛmbɛ na batɔ-íɛbɛ. 10 Bii nɛyɔngi bo, nna gea te, bókodhadokeanɛmbɛ mɔnɔ na batɔa-ajede bɔbhu á ka mokonda nde. Bánde bea:batɔ-íɛbɛ,badhemigi,batɔa-njaga-njaga,bakume.
Ka banga abɔ, ambe bédeketɛ mokonda bhui. 11 Cɔ, kɛkɛ nde gǎkɛ, něnodundui gea, bókodhadokeanɛ mɔnɔ na nkpa nde aogea: «nende moKiísito», nande:ntɔ-íɛbɛ,ndhemigi,nkume,ntɔ-ɛ́phɔti,ntɔa-boita,ntɔa-njaga-njaga.
Bókoeɛgɛ mɔnɔ ye na bɔ.
12-13 Cɔ, ké na nyɔngɔ ka bakpa á ka mokonda ndee. Mokonga a ámbé atenande nyɔngɔ nɛbɔ. Akeni ndiu, bótenɛ nyɔngɔ á baKiísito bunde báogea ajede. A tɔ bíndɔ buku á Mokonga ayɔngi: «Mbeagani nkpa ajede sɔsɔbɛ anu.» c