1 Bakɔlítɔ 4

Omobeani

1 Ambe bakpa báubhɛ gea, besu bende babhɛdanigi ndea Yéso Kiísito. Asuubhisi kɔbɔngɛ nɛkɛ á bɔsɔmɛa gea, béphangiɛ bakpa bhase. 2 Cɔ, ka bakpa nde Mɔkɔta ěbophi ekuma, akondi gea, bábɛ batɔa-doni. 3 Bii a bó, aobá́ noboomoca, aobá́ nabáteni nyɔngɔ nɛmɔ ka ntua nɛbɔ, nndɔ nnaomogea kema. Eme phɔtɔ, kéotena nyɔngɔ nɛmɔ sasa ani. 4 Doni, měma ani nnaɔmɔtɔnga. Nna gǎkɛ geae, neuki bojede. Mɔkɔta Yéso a tɔ ámbé a na bukpɛkpɛ á tena a nyɔngɔ nɛmɔ. 5 Ka bondɔ, bókotenɛ mɔnɔ nyɔngɔ ékuma ndea nkpa mosa á ja a Yéso Kiísito. Yɛ a ámbé abhisande kema á bɔsɔmɛa bhui bhase, nanga ába kema nde bakpa básɔ̌mi subi á měma abɔ. Mokonga ambhebhande phɔtɔ nkpa bíndɔ ambhɛdaneigi anja.

6 Baya, nɛyɔngi nyɔngɔ ndɔ gu ani na gu á Apɔ́lɔ gea, tambea asu ábɛ mphaniɔ ka benu. Mpɔ, bǔubha cina á mɛni ndee: «Bókotingɛ mɔnɔ nyɔngɔ nde dábadundu.» K'aphe ndɔ unge, bókondokomisɛku nkpa moti, bóonkangea dhakɛ. 7 Cɔ, benu bii bǒdokomisa, animbe ǎnobhisi gu á badhanu? Bo na kema sina, nna tɔndɔ nnde Mokonga ǎnoophi? A gǎkɛ oba Mokonga nǎnoophi bokambia, bǒdokomisa ne ka bo? Ande gea te, bɔtɔi bokambia ndɔ sasa anu?

8 Oo! bonde batɔi phɛ̂, bokuti. Bo yetɔ baamɛ, nna ndiu besu. Aa! atókeni bóbɛ baamɛ á doni geae, béeɛ nji kimoti. 9 Nga, besu bateki, Mokonga dásobhisi kusi bea batɔa-mɛkakɔ bunde bémande. Bê phɔtɔ oba nyɔngɔ nde bakpa na bamalaeka báotangaaga. 10 Bende babhobho ka nyɔngɔ á Kiísito. Cɔ, bonde gǎkɛ batɔa-kɔbɔngɛ ka nyɔngɔ akɛ? Bende bakusi. Bonde bagbagi? Báonóbanga? Cɔ, besu gǎkɛ, báɔsɔ́tɛbhɛaga. 11 Nga, kɛkɛ nde, be na nja n'ɛnɔta, be tɔ ndumbu, báosótambisaga. Ka bondɔ, beotoaga. 12 Be phɔtɔ otambaga ka bhɛda ekuma sasa asu. Bii bakpa báosóbhóma, béǒbhisia njaga. Bii báosótambisaga, béodhakana. 13 Bii báosóphusiaga na nyɔngɔ, béǒsikisia bɔjɛjɛ. Bakpa báɔsɔ́ɔna bea bakpa jǎi-jǎi, be'euu.

14 Nyɔngɔ nde eme Pɔ́lɔ nedundu oani, nna ka kusa anu na soni, a ndiu ka phɛa anu bea baniki nɛmɔ ékondi. 15 Nanga bagoisigi ndea Kiísito bábika phɛ̂ sɔsɔbɛ anu, eme, abhanu á ka měma, ne tɔ mo. Nga, eme a ámbé dɛ́nɔɔphani mosa-mosa ka beekea a Nyɔngɔ Anja ndea Yéso Kiísito. Ka bondɔ, nende abhanu. 16 Bii nende gǎkɛ abhanu, něnodengemisigi, ómobeani.

17 Ka bondɔ, nenteki Timɔtɛ́ɔ mɔtɛnu. Ande miki nɛmɔ á ka měma, mmbe nenkondi. Ande phɔtɔ mbeeki á doni ndea Mɔkɔta Yéso. Yɛ a ámbé anúubhisande goto bii neotambea bea mbhɛdanigi nde ba a Kiísito Yéso. Nga, tambea ani a tɔ bíndɔ nɛɔ́phɛa batɔa- kanisa bhubhui.

18 Bakpa buangbo sɔsɔbɛ anu bétondoe geae, kéjɛku ye ko. 19 Mokonga a ye okonda, mmbe nekamisagande ndiu dhonda anu. Mpɔ, néuubha kodoni á bundɔ báǒtondoa, kabɛ nabá na bukpɛkpɛ á doni, kabɛ nande yɔngaga á jǎi-jǎi. 20 Ande gea te, koboamɛ ndea Mokonga nna tɔ yɔngaga, a ndiu kema á bukpɛkpɛ.

21 Cɔ, bii nende abhanu á ka měma, bokondi bo? Nénobhikiɛ na gbutu? Abɛ ndiu na měma ékondi? na měma aphɔngɔ?