3
1 Baya, eme gǎkɛ, dɛ́kɛ́tɔki nɛnɛ̌̀nɔphɛi bea bakpa nabá na Měma á Mokonga. Dákeni nɛ́nɔphɛ̂ ndiu nobo tɔ na tambea á kokpa. Dóbombeeki Kiísito bea bambɛnjɛ. 2 Ande gea te, dákeni phɛa anu na bɔphɛi nde dátú bi'ibo á ebe. Dɛ́kɛ́ɔtɔka opha anu nkua, ka nyɔngɔ nde, dɔ́bɔ́kɔ́mɔtimbɛ. Eya, kɛkɛ nde phɔtɔ, bɔ́kɔ́mɔtimbɛ. 3 Nga, bo phɔ́tɔ otambea bea bakpa bɔbhu. Bii bo na ngini, na sani ngungu anu, nna gea te, bo phɔ́tɔ otambea bea bakpa bɔbhu? Tambea anu nna phɔ́tɔ bea batɔa ka mokonda? 4 Bii ka benu aogea: «Nende nkpa nde ba a Pɔ́lɔ», moti: «Nende ba a Apɔ́lɔ», cɔ, bókó phɔ́tɔ otambea bea bakpa bɔbhu?Bo bea ciko ndea Mokonga
5 Cɔ, Apɔ́lɔ ande ani? Eme Pɔ́lɔ ne gǎkɛ ani? Babhɛdanigi tɔndɔ, bunde Mokonga dásoteki gea, bómbeekeɛ. Dɛ́bɛbhɛdi ekuma bíndɔ Mokonga dásogabhei. 6 Nga, be bea bakpa nde báɔmbhɛdaneaga mɛna-ciko. Détú bea nkoni-ciko. Apɔ́lɔ áoba nambi ciko. Mokonga â gǎkɛ ɔtɛisa mbo. 7 Cɔ, nkoni na nambi, bána ye kema, tɔndɔ Mokonga, mmbe aɔtɛisa mbo. 8 Nkoni na nambi, bá tɔ okaba kema moti. Ande gea te, Mokonga, mɛna-ciko, amphendande nkpa bíndɔ abhɛdanigi anja. 9 Eya, bende babhɛdanigi ndea Mokonga, yɛ a ámbé ande Mɔkɔta nɛsu. Benu, bo bea ciko nɛkɛ.
Bo phɔtɔ mɔphɛkɔ ndea Mokonga. 10 Bii détú mɔtɛnu, détú bea ncumi-itimɔ. Néoba na ubhapha phɛ̂ bíndɔ Mokonga dámopi. Kɛkɛ nde gǎkɛ, bakpa buangbo báotutuisa mɔphɛkɔ ndɔɔ. Cɔ, nkpa nde aɔphɛka, éambɛ anja phɛ̂ k'ekuma nɛkɛ. 11 Yéso Kiísito, bii ande cina á boamia nɛsu, ande bea itimɔ á mɔphɛkɔ ndɔɔ. Ba angbo nnayébei. Bánaɔtɔka nabácumi itimɔ nɛngbo.
12 Kɛkɛ nde gǎkɛ, bakpa buangbo báotutuisa mɔphɛkɔ. Ekuma nɛbɔ akengeani na kema nde báɔphɛka ne. Buangbo báɔphɛkɛa ɔlɔ, ngɔa, ɛtɛ ésombi akpɛ. Buangbo gǎkɛ, bame, basɛnga, kasa. 13 Cɔ, ka sungiaga a mokonda, Mokonga abhisande ekuma ndɔ bhui bhase. Mokonga abhisande ekuma bhui ka nsa ka digimisa bukpɛkpɛi. 14 Aoba ekuma ndea nkpa nakásidi, Mokonga áomphenda. 15 A gǎkɛ oba ekuma ndea nkpa nasidi, kabɛ n'ophendɔ. Mokonga anamisande gǎkɛ nkpa ndɔ, bea nkpa najuani subi éndu nɛkɛ natobu.
16 Cɔ, bókûubha gea te, bo be'endu ɛ́mɛmi ndea Mokonga, Měma á Mokonga naiki subi anu? 17 Aoba nkpa natukituki endu ndɔ, Mokonga antukatukande phɔtɔ. Nga, endu ɛ́mɛmi ndea Mokonga ande ɔma ótaɔ, nnde abhisi mosa akɛ. Bo gǎkɛ be'endu ndɔɔ.
18 Cɔ, nkpa kědhemɛ mɔnɔ sasa akɛ. Nga, ka benu, aobá́ moti nauubha gea, a na kɔbɔngɛ á ka mokonda nde, cɔ, ábɛ bea mbhobho, mpɔ, áubhɛ kɔbɔngɛ á doni ndea Kiísito. 19 Nga, kɔbɔngɛ ndea ka mokonda nde, ande kobhobho mosa á Mokonga. Buku á Mokonga aengekisi nyɔngɔ ndɔ be: «Mokonga ěkodi batɔa-kɔbɔngɛ ka mɛkɔ nɛbɔ sasa abɔ.» a 20 Goto: «Mɔkɔta Mokonga auubha gea te, kɔbɔngɛ ndea batɔa-kɔbɔngɛ a tɔ jǎi.» b
21 Cɔ, bókobhisɛmbɛ měma anu ka nsɔndɔi. Nga, kema bhubhui ande anu. 22 Nanga ába Pɔ́lɔ, Apɔ́lɔ, Pɛ́tɛɛ, besu bɔbhu bende bakpa nɛnu. Nanga ába mokonda, enda, kukua, nanga ába matu á kɛkɛ, matu nde abhikaeka, kema bhubhui ande anu. 23 Benu gǎkɛ, bonde bakpa ndea Kiísito. Kiísito nande ba a Mokonga.