10
1 Baya, mɔphɛ á ka měma ani na ɛmɛmi nɛmɔ ka Mokonga ka phɔa baYudha ande gea, báamɛ ka měma. 2 Eya, nedigimisi ka phɔabɔ gea, bá na moíngi ka bhɛdanɛaga á Mokonga. Moíngi kau andiu kanga á ubhapha. 3 Nga, dábákáoúbha mɔangɔ ndea Mokonga ka bhisa bakpa batɔa kodoni mosá akɛ, bâ ndiu okaba bhisa á kodoni nɛbɔ sasa bɔ, bákákondɛ bea aphe á kodoni ndea Mokonga. 4 Ande gea te, Yéso aámbé ajusi ɛɔphi ka sungiaga í ka gea, bakpa bɔbhu bunde bam'beeki Yéso baunge Mokonga aebhisande batɔa kodoni mosá akɛ.Boamia a ká bakpa bɔbhu
5 Cɔ, Mósa sisakɛ dádundu ka nyɔngɔ á kodoni nde aotokana n'ɛɔphi gea: «Mmbé a n'otaɔ ka ɛɔphi aámbé aendeande ɛɔphi nndɔa.» 6 Kodoni nde atoki ka beekea agi gǎkɛ be: «Kóianɛgɛmbɛ subi á měma akɔ gea: «Ani mmbe atáíande na kobha? (Ande gea te, dhidhisa á Kiísito?» 7 Goto, kóianɛgɛmbɛ sisakɔ gea: «Ani mmbe adhidhande ka nji á basí?» (Ande gea, táísa á Kiísito ka toka sɔsɔbɛ á basí?) 8 Cɔ, buku á Mokonga ayɔngi boni? Ayɔngi gea: «Nyɔngɔ á Mokonga a bhíbhí akɔ, a k'aphe nɔkɔ akɔ na subi á měma akɔb.» Nyɔngɔ á Mokonga ndɔ, ande mbinɔ nde beɔtɔmɛaga u ka nyɔngɔ á beekea. 9 Aoba n'ɔyɔngi k'aphɛnɔkɔ akɔ sisakɔ mosá á bakpa gea, Yéso ande Mɔkɔta na beekea ka měma akɔ gea, Mokonga dánjujukisi ka kukua sɔsɔbɛ á basí, oamande ka měma. 10 Nga, nkpa aobeekea ka měma akɛ, Mokonga ámbhisa ntɔa-kodoni, anamisande mmbe aɔyɔnga k'aphɛ nɔkɔ akɛ sisakɛ mosá á bakpa. 11 Kabondɔ, buku á Mokonga agi: «Nkpa bhuakɛ mmbe am'beeki, kákuɛku na sonic.» 12 Cɔ, baYudha na bunde báká baYudha bákátingani nga, bɔbhu bá tɔ na Mɔkɔta moci nga, yɛ aogabha ɛtɔi nɛkɛ ka bakpa bɔbhu bunde báɔɔphanea ina akɛ. 13 Nga buku á Mokonga agi te, bakpa bɔbhu bunde báɔphaneande ina á Mɔkɔta, báamande ka měmad.»
14 Cɔ, báɔphaneande ina akɛ bo na bákám'beeki? Na bám'beekeande bo na bákamɔ̌ki nkpa n'aɔtɔmiaga mbino nɛkɛ? Na báɔkande bo aobá́ na nkpa kátɔ̌migi u? 15 Na bakpa bátɔmiagande u bo na bákáeteki ka tɔmiaga í?Abíndɔ buku à Mokonga agi: «Ande maseye ka ɔna bhika á bunde bábhiki na Mbino Anjáe.» 16 Bakpa bɔbhu dábákábeeki gǎkɛ Mbino Anjá nndɔ. Isáia dáyɔngi be: «Mɔkɔta, ani mmbe atóbeeki Mbino Anjá nde betúɔtɔmiagaf?» 17 Nga beekea aotoka k'inde nkpa aɔki. Mbino kau aotoka ká bɔphɛi ndea Kiísito.
18 Nemáogea: Ande gea te, baYudha dábakáɔki mɔnɔ ka mbino kau e? Eya, dábáɔ́ki! Buku á Mokonga agi:
«Ɛsɔ á batɔmigi mbino dáɔkɛkani k'ɔma bhui ka mokonda,
mbino nde dábaɔtɔmiaga áɔɛmba mokonda bhuig.»
19 Neoúsi goto, baIsilaɛ́li dábákáengekisi u? Mosá, Mokonga dányɔngisi Mósa gea:
«Nenobhisande batɔa-nsengo ka phɔa bakpa nde báká batɔ á ekuna doni.
Nenobhisande batɔ á esuia gǔ á ekuna nde báná na úbhaphah.»
20 Isáia áogaojua ka yɔnga akpɛ gea:
«Bakpa nde dábákátuomokaba, bámɔɔni.
Nɛɔ̌sɛnɛkɛa bunde dábákáomúsia ka kema.»
21 Mokonga áɔyɔnga ka phɔa á baYudha gea:
«Déonanua njaga ani esa bhui ka
bakpa nde bákáɔmɔ̌ka, na bunde báomoyái.»