Mokonga dɛ́sɔ̌mbu baIsilaɛ́li
9
1 Nɛɔyɔnga doni ka jukana na Kiísito, ké gǎkɛ ɔyɔnga mbɛa, Měma á Mokonga asɔndɔi měma ani ka digimisa gea, nɛɔyɔnga doni. 2 Měma ani atumi na bɛi phɛ̂ na tambaga nde nna na sungia. 3 Nɛtɔɔni anja Mokonga ámɔsɛmɛɛgɛ na nékatanɛ na Kiísito ka nyɔngɔ á bana-ayi íbundɔ nɛbɔkɔtɛani na bɔ. 4 Bɔ, bande baIsilaɛ́li bunde Mokonga dáɛsɔmbu bábɛ banakɛ, dáɛbɔnisi bophombia nɛkɛ, dáɔngani na bɔ, dáebophi ɛɔphi na mɔkɔ na ɔnisa bɔ moangɔ á bhebha akɛa. 5 Bá k'ɛbɔkɔti ndea batatasu. K'ɛbɔkɔti ndɔ tɔ unge Yéso dábɔkɔtɛani na nyama á kokpa. Yɛ gǎkɛ, a gǔ á bakpa bɔbhu. Obhebho ábɛ ka Mokonga esa bhui, ábɛ bo!6 Kégi gǎkɛ te, mɔkɔ ndea Mokonga dákátɔtɔkɛani ka nyɔngɔ nde, nna ɛbɔkɔti bhui á baIsilaɛ́li aunge bánde baisilaɛ́li á doni á doni, 7 goto, nna ɛbɔkɔti bhui á Abhalaámu aunge bánde banakɛ á doni-doni. Nga, Mokonga dángi Abhalaámu te: « Bana Isáka tɔ baunge bábande ɛbɔkɔti nɛkɔ á doni á doni nnde dékɔɔkub.» 8 Ande gea te, nna baniki bɔbhu bunde babɔkɔtɛani ka ete á kokpac, baunge bande baniki ndea Mokonga. Baniki nde bábɔkɔtɛani ndiu ka beana na mɔkɔ ndea Mokonga, bɔ tɔ baunge bánde ɛbɔkɔti á doni á doni. 9 Nga, Mokonga dámɔku Abhalaámu be: «Ka matú binde tɔ unge nebhikande na Sála am'bɔkɔtande miki-mǒkod.» 10 Nna gǎkɛ tɔ nndɔ, a bíndɔ Lɛbhɛ́ka dáɛbɔkɔti bapháse baniki bǒko na tatasu Isáka. 11-12 Mokonga a gǎkɛ na mɔangɔ nɛkɛ ka sɔmbɔa á bakpa. Sɔmbɔa ndɔ, aobeana na mɔphani nde yɛ aɛbɔphani, nna ndiu ka tambea abɔ. Ka ɔnisa gea, nn'aoanganisa mɔangɔ nɛkɛ, Mokonga áongodea Lɛbhɛ́ka na káebonjimbɛ baniki-bǒko nɛkɛ, na bákágimbɛ mɔnɔ kabɛ kema ánjá kabɛ kema ájede gea: «Nkpɛga ambhɛdanɛagande mikie.» 13 A bíndɔ bádundu subi á buku gea: «Dénkondi Yakɔ́bɔ, ně ndiu onkagea Esáuf.»
14 Cɔ, bégeɛ bó? Mokonga aɔtɔka n'am'bayi nkpa? Tanda phɔ! 15 Mpɔ Mokonga áongodea Mósa te: «Nenkuiande ngomi nkpa nde nekondi kuia akɛ ngomi na nentabɛande mmbe nekondi tabɛa akɛg.» 16 Cɔ, nndɔ nn'aotoka ka mɔphɛ á nkpa kabɛ ka bukpɛkpɛ nɛkɛ. Andiu otoka ka Mokonga mɛnɛ á ngomi. 17 Mokonga áongodea Phaláɔ subi á buku gea: «Netókobhisi tɔ mɔamɛ ka gea k'obɛ unge neúbhisande bukpɛkpɛ ani na ka gea ina ani báɛmbisɛ ka mokonda bhuih.» 18 Ande gea te, Mokonga aokonda kuia á nkpa ngomi, áonkuia. A gǎkɛ okonda daka á měma á nkpa, áodaka u.
Mokonga an'esuia na ngomi
19 Kǎi omongodeande gea: «Ka nyɔngɔ sina nde Mokonga asóyeyande goto? Ana nkpa nde aɔtɔka n'ayé kema nde Mokonga akondi?» 20 Obɛ nkpa onde ani ka pua ka nyɔngɔ á kema nde Mokonga akondi? Ɔɔ́nimbɛ mɔnɔ mbekatoko n'amúsi nkpa nde abɔngisigi u te: «Ka nyɔngɔ sina nde omobongisigi bénde?» 21 M'bongisigi mbekatoko aɔtɔka n'abhɛdaniigi odo bíndɔ yɛ akondi. Na odo ndɔ tɔ, aɔtɔka n'abongisigi mbeka nde atetemani na nnde kátetemani.
22 Cɔ, Mokonga dákondi ɔnisa esuia na bukpɛkpɛ nɛkɛ. Dá gǎkɛ na měma á phiphia phɛ̂ ka bakpa nde dákeni áɛ́bhɛ̌ɛ na tena á nyɔngɔ nɛbɔ akpɛ. 23 Dákondi gǎkɛ áɔnisɛ boombia akɛ phɛ̂ ka bunde dáekui ngomi, dáɛbɔngisigi kpanga kala ka bá na boombia ndɔ. 24 Besu baunge dásɔɔphani, nna tɔ sɔsɔbɛ á baYúdha, phɔtɔ sɔsɔbɛ á bunde báná baYúdha. 25 Abíndɔ dádundu subi á buku ndea Mɔtu nyɔngɔ Ɔsɛ́a:
«Ekuna nde kátú á bakpa nɛmɔ, nɛɔphanande u nɛmɔ
na ekuna nde kétúokonda, nɛɔphanande u ekuna á ekondi.
26 Ɔma nde dáěngodi gea: ‹Bókó bakpa nɛmɔ›,
wa tɔ unge báɛbɔphanande bana Mokonga Mɛnɛ á endai.»
27 Isaía áɔɔ́tɔa nyɔngɔ akpɛ ka phɔa baIsilaɛ́li gea:
«Nanga baIsilaɛ́li bábíka bea mbúmɛ á k'obenge,
ka bɔ moci-moci tɔ báunge báamande ka měma.
«Atúoba Mokonga mɛnɛ á bukpɛkpɛ na dákásodeketei ka batɔa-ɛbɔkɔti ámbé
débetúbaeka bea batɔa ka Sɔdhɔ́ma,
betókengeanaeka na batɔa ka Gɔmɔ́lak.
Mokonga aǒtanga batɔa-kodoni bunde bám'beeki Yéso Kiísito
30 Cɔ bégeɛ bo? Bakpa nde báná baYudha bunde dábákáokaba kodoni, bɔ ndiu baunge yɛ Mokonga aɛbɔni gea, bande batɔa kodoni mosá akɛ, nga bám'beeki. 31 BaIsilaɛ́li bunde dábaokaba ɔnɛkana batɔa kodoni mosá á Mokonga ka amba ɛɔphi bâ ndiu ko úka. 32 Ka nyɔngɔ éke? ka nyɔngɔ nde dábákáobondea kodoni na bábeeki bâ ndiu okanisia te, bátɔande u k'ekuma. Báɔbɛtɛkana k'ɛtɛ á bɛtɛkisa. 33 Bindɔ buku á Mokonga ayɔngi:
«Ɔnani bii nebhisi ɛtɛ á bɛtɛkisa ka Sayúni
na ekǒngo á gusisa.
Cɔ, mmbé aom'beekea, kákuɛku na sonil.»