Tambea bíndɔ Měma á Mokonga akondi
8
1 Cɔ, kɛ̌kɛ nde, bakpa nde bá subi á Kiísito Yéso, bákáteneku ye tanda nyɔngɔ nɛbɔ akpɛ. 2 Nga, akoba nkpa n'asubi á Kiísito Yéso, Měma á Mokonga nnde aoendisa, aunge ande ɛɔphi nɛkɛ. Ɛɔphi ndɔ unge dámotokisi kusi á kɔkɔta á bojede na kukua. 3 Cɔ, Mokonga aámbé atɔtɔkisi kema nde ɛɔphi ndea Mósa dákátɔki nga, nyama á kokpa dákátɔki tɔtɔkisa í. Ka ima á bojede, Mokonga dánteki anakɛ n'etéte nde akengeani na etéte á bakpa ibunde bande batɔa-bojede ka gea te, k'anakɛ unge Mokonga dáteni nyɔngɔ á bojede akpɛ ka nyama á kokpa. 4 Mokonga dátɔtɔkisi nndɔ ka gea te, tambea asu ábɛ bíndɔ ɛɔphi asosi nga béké ye obea tambea asu á kokpa, bendiu obea tambea nde Měma á Mokonga akondi. 5 Nga, bakpa nde báobea tambea á kokpa, báɔtɔtɔkisa mɔphɛ á kokpa. Bakpa nde bá gǎkɛ obea tambea á Měma á Mokonga, báɔtɔtɔkisa mɔphɛ á Měma á Mokonga. 6 Cɔ, nkpa aobea tambea á kokpa, tambea ndɔ áonkusa. Nkpa a gǎkɛ obea tambea á Měma á Mokonga, tambea ndɔ áomopha enda na bɔjɛjɛ. 7 Nga, bakpa nde báobea tambea nɛbɔ á kokpa, bande babibia á Mokonga. Bɔ, bákáotambea bíndɔ ɛɔphi ndea Mokonga asosi nga, báká tanda ɔtɔka u. 8 Bakpa nde báobea tambea á bɔ á kokpa, bákáɔtɔka na bám'bɔngɛi Mokonga.9 Cɔ, benu, bókó ye gǎkɛ obea tambea á kokpa, bondiu obea tambea á Měma á Mokonga, ka nyɔngɔ nde aiki subi anu. Aobá nkpa na nna na Měma á Kiísito, nkpa ndɔ nna nkpa ndea Kiísito. 10 Agǎkɛ obá Kiísito n'aiki subi anu, nanga nyama anu á kua ye ka nyɔngɔ á bojede, Měma á Mokonga nnde á subi anu aunge aonoendisa nga, Mokonga a ye onotanga batɔa-kodoni mosá akɛ. 11 Kabɛ Měma á Mokonga mmbe dánjujukisi Yéso sɔsɔbɛ á basí n'aiki subi anu, yɛ mmbe dánjujukisi Kiísito sɔsɔbɛ á basí tɔndɔ aámbé aendisande nyama anu á kukua na Měma akɛ nnde asubi anu.
12 Cɔ, baya, bena nyɔngɔ á phenda í. Nyɔngɔ ndɔ nna gǎkɛ á nyama asu ka bea tambea nɛsu á kokpa. 13 Nga, kabɛ na booenda ka tambea nɛnu á kokpa, bokuande. Kabɛ gǎkɛ na bokusi nyama anu ka bea tambea á Měma á Mokonga, boendande. 14 Nga bakpa bɔbhu bunde Měma á Mokonga aǒtambisa, bande bana Mokonga. 15 Cɔ, Měma á Mokonga nnde botɔi mɔtɛ á Mokonga, nna měma á ngisa anu ka kɔkɔbɛ na tumisa goto kɔbɔbɔkɔ subi anu, andiu Měma nde anobhisi bóbɛ bana-Mokonga. Ka nyɔngɔ á Měma ndɔ aunge bɛɔtɔka ɔphana á Mokonga «Abhɛ+ \fr 8.15 \ft Ɔna phɔtɔ Málikɔ 14.36.» 16 Měma á Mokonga sasakɛ aámbé adigimisi měma asu gea besu, bende bana-Mokonga. 17 Cɔ, kabɛ na bende banici, bebande phɔtɔ na ka botukɔ nde Mokonga aɛbɔku bakpa nɛkɛ. Betɔande botukɔ ndɔ kimoci na kiísito nga, aobá́́ na betambigi kimoci na yɛ, bebande phɔtɔ kimoci na yɛ ka boombia nɛkɛ+ \fr 8.17 \ft Ɔna phɔtɔ 2 Kolítɔ 4.17; 1 Pɛ́tɛɛ 4.13..
Boombia nde abhikaeka
18 Nɛɔni gea tambaga bhui nde beně kɛ̌kɛ nde kákengeani na boombia nde Mokonga asóphangiande bhase. 19 Kema bhui nde Mokonga aconji aobondea na mosenda phɛ̂ mbenɔ nde Mokonga aphangisiaeka boombia á banakɛ bhase. 20 Nga bábhisi kema ndɔ bhui kusi á kɔkɔta nnde nna na kantíti. Nna ka gea atókenanigi na bó, andiu ka gea Mokonga aámbé abhisi u bó. Cɔ, kema nde dábasebei aungɔ. 21 Ande gea kema ndɔ bhui nnde Mokonga aconji atokande kusi á kɔkɔbɛ á ɔtukɔtukɔ, angiande ka boombia ndea bana-Mokonga. 22 Cɔ, na ka k'esande, beoúbha gea kema bhui nde Mokonga aconji aobénga kimoci na kokae bea amakaeme n'aka boae. 23 Nna tɔndɔ kema bhui nde Mokonga dáconji, besu ibunde be ye na Měma á Mokonga bea měma á egabhɔ ndea Mokonga, be phɔtɔ obénga ka měma ka bondeaga gea bébɛ bana-Mokonga na mbenɔ nde yɛ akodagande nyama asua. 24 Nga, bena nsebeɔ gea beami ye ka měma. Cɔ, sebea á kema nde ɔɔna, nndɔ nna ye nsebeɔ nga, animmbe aɔtɔka n'asebei kema nde aɔɔna? 25 Cɔ, kabɛ na besebei kema nde békékɔɔna, be gǎkɛ obóndea u na měma á phiphia.
26 A phɔtɔ bo unge Měma á Mokonga aosoenga ka kanga ba asu na bukpɛkpɛ. Cɔ, bekeoúbha mɛma á Mokonga bíndɔ akeni k' ɛ́mɛmi nɛsu. A gǎkɛ tɔ Měma á Mokonga aunge aɔmɛma ka phɔasu na dengemisaga nyɔngɔ nde bɛ́kɛ́ɔtɔka yɔnga i. 27 Cɔ, Mokonga mmbe aɔɔna subi á měma asu, aámbé aoúbha mɔphɛ á Měma á Mokonga. Měma ndɔ aámbé aɔmɛma Mokonga ka phɔa babeeki bíndɔ Mokonga aokonda.
28 Cɔ, beoúbha gea te, kema bhui atɔ ka bonjanja á bakpa nde bánkondi Mokonga. Bankpa ndɔ baunge yɛ dɛ́bɔphani ka beana na mɔangɔ nɛkɛ. 29 Nga, bakpa nde Mokonga dɛ́sɔmbu kala, dáeangei phɔtɔ kala gea, ékengeanisɛ na anakɛ, ka gea anakɛ abɛ ange mmbe ana bamɔtɔakɛ básii. 30 Bakpa nde Mokonga dɛ́sɔmbu kala, dɛ́bɔphani phɔtɔ. Bunde dɛ́bɔphani, détangi phɔtɔ batɔa-kodoni. Bundɔ détangi batɔa-kodoni, débophi phɔtɔ boombia nɛkɛ.
Ekondi ndea Mokonga aángbó
31 Cɔ, ka nyɔngɔ índɔ, bɛ́yɔngɛ goto bo? Kabɛ Mokonga n'asogami, animmbe abande na bukpɛkpɛ gǔ asu? 32 Nga, Mokonga dákánkpɛmi n'anakɛ sasakɛ, dámphui ndiu gea te, átámbɛgɛ ka phɔa asu besu bɔbhu. Cɔ, kásophɛku kema bhui kimoci na anakɛ ka bo? 33 Ani mmbe aɛ́tɔngande bakpa nde Mokonga aɛ́sɔmbu? Tanda nkpa mo. Nga, Mokonga aámbé aotanga bakpa ndɔ batɔa-kodoni. 34 Ani mmbe aɔtɔka n'ateni nyɔngɔ nɛbɔ akpɛ? Nna tanda na nkpa mo. Nga, Kiísito Yéso aámbe dáku, gǔ índɔ, áojujuka ka kukua, aiki ka njaga á mǔku á Mokonga n'aphɔtɔ ɔmɛma ka phɔasu. 35 Ekende asokatanisande n'ekondi ndea Kiísito? Tambaga, kema ajede nde aouja měma á nkpa, tambisaga á nkpa, nja, buyɛnɛ á ngɔmbɛ, bia, kukua? 36 Bádundu subi á buku á Mokonga be:
«Ka nyɔngɔ akɔ unge kukua aosokena esa bhui.
Báɔsɔɔna bea bamɔgɔgɔ nde bakeni na kukua+ \fr 8.36 \ft Ɔna Jabhui 44.23..»
37 Ka kema ndɔ bhubhui, be gǎkɛ okinda ka nyɔngɔ á nkpa nde asokondi. 38 Ka nyɔngɔ nde neoúbha doni gea, nna na kema nde aɔtɔka n'asokatanisi na ekondi ndea Mokonga. Kabɛ n'ande kukua, kabɛ n'ande enda, kabɛ n'ande bamalaeka, kabɛ n'ande bakɔta, kabɛ n'ande kema á kɛ̌kɛ, kabɛ n'ande kema nde abhikande, kabɛ n'ande batɔa-bukpɛkpɛ, 39 kabɛ n'ande bukpɛkpɛ á k'ego, kabɛ n'ande bukpɛkpɛ á kusi, kabɛ n'ande kema bhui nde Mokonga aconji, kátɔkɛku tanda n'asokatanisi n'ekondi ndea Mokonga, nnde dásɔɔnisi ka Kiísito Yéso Mɔkɔta nɛsu.