Mokonga k'éye baIsilaɛ́li
11
1 Cɔ, neúsi be: Mokonga déyege bakpa nɛkɛ? Bɛɛndɔ! Nga, eme sisani nende muIsilaɛ́li, k'ɛbɔkɔti ndea Abhalaámu, k'ekuna ndea Benjamínaa. 2 Mokonga dákáeyé bakpa nɛkɛ bundɔ dáɛsɔmbu mosáb. Bókóoúbha nyɔngɔ nde Buku á Mokonga ayɔngi k'ɔma nde Elía dáge na ntabɔ mɔtɛ á Mokonga ka phɔa á baIsilaɛ́li? 3 Áogea: «Mɔkɔta, báemoe baɔtu-nyɔngɔ nɛkɔ na ngbɔa ɛtɛ-ɔphɛɔ nɛkɔ. Nejigi tɔ eme sisani, bá phɔtɔ ogea bámomoɛ.» 4 Cɔ, Mokonga dánsikisii gǎkɛ bo? Dángodi gea: «Nena bǒko ɛlɛphu ngia njaga ibɛ (7000) bunde bákátógbuki muanku abɔ mosá á mɔkɔta bea mmbe á na kobha Bálic.» 5 A phɔtɔ bó ka matu ndee. Bakpa bábhɔa bunde Mokonga dáɛsɔmbu ka bonjánja ékondi bájigi . 6 Aobá Mokonga na dáesombu tɔ ka nyɔngɔ á bonjánja ékondi na nna ka nyɔngɔ á ekuma nɛbɔ, aobá́ na nna bó, ámbé bonjánja ékondi nna ye na kantíti.7 A bó? Kema nde baIsilaɛ́li dábaokaba, dábákátɔi u. Bunde gǎkɛ Mokonga dáɛsɔmbu báɔtɔa u. Buangbɔ gǎkɛ, dábákátɔki digimisa. 8 A bíndɔ Buku á Mokonga agi te:
«Mokonga dáedheebisi ka gea,
bákáɔkaphɛ na
ɔnapha
na ka k'esanded.»
9 Mɔamɛ Dhaúdhi â phɔtɔ ɔyɔnga gea:
«Ambe kɛkpɔkpa nɛbɔ ábɛ kabɔ mɛ̌kɔ, botái nde bátande kau mpɔ
báǒkamba na kema.
10 Ambe iso abɔ áindɛ bákáɔnaphɛ ye,
na ngɔngɔ abɔ egbukɛ kanga á sungiagae.»
11 Cɔ negie, baIsilaɛ́li dábabɛ́tɛ́kani tɔ na gua abɔ doni? Ndakɛ! Ka nyɔngɔ á bojede nɛbɔ unge batɔa á k'ekuna nengbo báami gǎkɛ ka měma, ka kusisa abɔ na nsengɔ. 12 Ka nyɔngɔ á bojede ndea baIsilaɛ́li aunge aɛ́tɔisi batɔa ka mokonda ka měma. Tugbanaga abɔ aɛ́tɔisi batɔa k'ekuna nengbo. Cɔ, bonjanja ekondi abande ángbó phɛ̂ ka amá á baYúdha bɔbhu ka měma! 13 Neonongodea benu ibundɔ bókó baYudha gea: Nende nteki nenu. Bii abó nena maseye k'ekuma nɛmɔ. 14 Nesebei bhisisa á batɔa k'ekuna nɛmɔ na nsengɔ ka amisa ka bɔ. 15 Bii Mokonga dáephaphi baYúdha, dáɔnganisi Mokonda na yɛ. Cɔ, mbenɔ nde aeseseande goto ekende abande ? Bundɔ dábaku, báendande goto.
16 Aobá boata á mokati n'ande ka Mokonga, nnde ajigi a phɔtɔ ka Mokonga. Aobá mǐgi n'ande ka Mokonga ámbé ntabe a phɔtɔ ka Mokongaf. 17 BaIsilaɛ́li bá bea me á mujaitúni nde Mokonga dátenigi ka ntabhi i. Obe o bea ntabhi á me á k'osaa. Bákotɛisi k'ɔma nɛbɔ obɛ imbe kó muYúdha onde bea ntabhi á me á k'osaa. Kɛ̌kɛ nde ɔɔtɔa phɔtɔ íbó á ka mǐgi á mijabíbu. 18 Ka bondɔ unge kɔ́ɔtɔka n'obɛnjigi bantabhi nde bátenigi. Ǒbhebhande ka eke? Nna obɛ aámbé okumbi mǐgi. Mǐgi ndiu unge aokumbi.
19 Cɔ, omongodeande: «Bátótenigi bantabhi nde ka gea te bámɔtɛisɛ k'oma nɛbɔ.» 20 Eya a bo! Mokonga dáetenigi ka nyɔngɔ á kanga beekea nɛbɔ. Obɛ oiki gǎkɛ súa ka nyɔngɔ á beekea. Kǒbhebhɛmbɛ, bá ndiu na banga. 21 Nga, aobá́́ Mokonga na dákáegami baIsilaɛ́li bunde bá bea bantabhi á doni ka gea te bámɔtɛ, nna gǎkɛ obɛ ámbé akodeketande ɔ́mɔtɛ. 22 Cɔ, ianagani phɔ́ bonjánja ndea Mokonga na kokae nɛkɛ. Mokonga aakae ka bundɔ dábagu. Yɛ agǎkɛ anjánja k'ɔbɛ aobá́ na oom' beekea ka bonjánja nɛkɛ. Aobá na kógi bó, ámbé bákotenande phɔtɔ. 23 A gǎkɛ oba baYudha na bámbeeki Mokonga, esa moci yɛ aebhisande goto k'oma nɛbɔ á ka mosá-mosá nga, Mokonga ana bukpɛkpɛ á tɛisisa bɔ goto. 24 Benu ibunde bókó baYudha doni, bo bea ntabhi á me á Mujaitúni á k'osaa nde Mokonga dátenigi u, â gǎkɛ onotɛisa ka me ánja nnde dábakátúokonaga bó. Bayúdha bá bea Mujaitúni nde dábakoni, nna akpɛ ka Mokonga tɛisa goto ntabhi nde dábatenigi ka me nɛbɔ.
BaIsilaɛ́li báamande ka měma
25 Baya, nekondi úbhisa anu moangɔ á bɔsɔmɛa ndea Mokonga ka gea, bóúbhɛ gea bókó batɔa kɔbɔɔngɛ. Nga, baIsilaɛ́li buangbo báikande kanga á beekea. Nndɔ aiphiande na ka bii bakpa buangbo báamande ka měma. 26 Mpɔ, baIsilaɛ́li bɔbhu báamande ka měma bíndɔ buku á Mokonga ayɔngi:
«Namisi atokande na Sayúni,
asisande bojede bhui á k'ɛbɔkɔti ndea Yakɔbɔ.
27 Nnde unge ande ɔngana nde nɛɔngande na bɔ
bii nesisande bojede nɛbɔg.»
28 Ka nyɔngɔ á ya mbino ánjá, baIsilaɛ́li báoba babibia ndea Mokonga kanu. Yɛ, â gǎkɛ tɔ kɔɔ́sɔmbɔa na konda bɔ ka nyɔngɔ á batatabɔ. 29 Nga, Mokonga nna tanda ɔtɔka n'anganisi mɔphɛ akɛ k'egabɔ na ka mɔphani nɛkɛ ka bakpa. 30 Cɔ, kala, dóbókótú omɔɔka Mokonga. Kɛ̌kɛ nde gǎkɛ anokui ngomi ka nyɔngɔ nde baYúdha dábákámɔɔki. 31 Cɔ, kɛ̌kɛ nde aphɔtɔ bó ka bɔ bákáɔmɔɔka Mokonga ka gea te ánokuiɛ ngomi, kɛ̌kɛ nde áekuiɛ phɔtɔ ngomi bó. 32 Nga, Mokonga dáebhisi bakpa bɔbhu bea batɔa-mɛkakɔ ka nyɔngɔ á kanga ɔkapha nɛbɔ, ka gea Mokonga áekuiɛ bɔbhu ngomi.
Mokonga aangbóngbó phɛɛ
33 Ekende Mokonga ana ɛtɔi, úbhapha na kɔbɔɔngɛ ásii bende! Ani mmbe aɔtɔka n'aúbhi kanisiakɛ ka tena á nyɔgɔ na úbha á moangɔ nɛkɛh? 34 Sumbia bii buku á Mokonga agi:
«Ani mmbe dáubhi kanisia ndea Mɔkɔta?
Ani mmbe aɔtɔka n'amphɛi?
35 Ani mmbe dákpangi ɔpha akɛ kema
ka gea ánsikisiɛ ui?»
36 Nga, yɛ aámbé ande nconji á kema bhui, kema bhui aiki ka bukpɛkpɛ nɛkɛ na ka phɔakɛ. Obhebhɔ ábɛ ka yɛ esa bhui! Abɛ bó.