Ekuma Ndea Bateki 16

Pɔ́lɔ ansɔmbu Timɔtɛ́ɔ ka tamba

1 Pɔ́lɔ áojua ka Dhɛ́ɛbhɛ mbusa á oa áɔtɔngana na Lísita. Oa, dátú na ngoigi moci ina akɛ Timɔtɛ́ɔ. Amakɛ dátú moYúdha m'beeki. Abhakɛ dátú gǎkɛ nɛkɛ moGiíki. 2 Babeeki á ka Lísita na Ikɔníɔ dábatú obhebha tambea á Timɔtɛ́ɔ anja. 3 Ka bondɔ, Pɔ́lɔ áokonda támbaga na yɛ. Áombhɛda, áongusisa ganja ka nyɔngɔ á baYúdha bunde dábatu k'ɔma ndɔ bhui. Nga, bakpa bɔbhu á k'ɔma ndɔ dábaoúbha gea, abhakɛ dátu moGiíki. 4 Cɔ, Pɔ́lɔ na badhakɛ báotamba ka kenombe danga-danga, na báǒúbhisa babeeki gea báambɛ ɛɔphi nde bateki na bagbɛga á ka Yɛusalɛ́ma dábabhisi. 5 Měma á batɔa ka kanisa áoba na bukpɛkpɛ ka beekea. Esa bhui, babeeki báǒyamea.

Ntɔa Makɛdhɔnía bámɔphani Pɔ́lɔ ka mphaniɔ

6 Pɔ́lɔ na badhakɛ báɔnyɛ́nya ka nji bhui á Phuigía na Galatía nga, Měma á Mokonga děimisii tɔ̌miaga á nyɔngɔ á Mokonga ka nji á ka Asía. 7 Báju ye bhíbhí á Misía, báokengisia ngia ka Bhitinía, Měma á Yéso â gǎkɛ ǒimisia. 8 Ka bondɔ, báɔɔtata Misía, báodhidha ka ikɔ á na Tɔ́a. 9 Kiipha, Pɔ́lɔ áɔɔna mphaniɔ, áɔmɔ̌na ntɔa-ka Makɛdhɔnía n'amame. Yɛ áon'dengemisaga Pɔ́lɔ, áongea te: « Kaia óbhikɛ ósoengɛ ka Makɛdhɔnía. » 10 Kɛ̌kɛ ndɔ mbusa á mphaniɔ, béokamisaga mɛ́a ka gǎ na Makɛdhɔnía nga, débeúbhi doni gea te, Mokonga asɔ́ɔphanima ka tɔ̌miaga Mbino Anja kó.

Pɔ́lɔ angi ka Makɛdhɔnía

11 Cɔ, ka mɛa asu ka Tɔ́a, béokambea ka koko ángbó, mɔngɔ moci béojua ka kesanga á Samotiákɛ. Mama í, béojua ka Nɛapɔ́li. 12 Toka á oa, béojua ka Philípi, kenombe ángbó á ka mosá-mosá á ka Makɛdhɔnía nnde baLɔ́ma dábatumi kau. Kó, béoda b'esa abhɔa. 13 Esa á sabato, béotoka ka nji ndɔ, béoga ka nkpangba íbo moci, béokanisia te, ɔma á ɛmɛmi a oa. Cɔ, béoika ka odo, béǒdhonda bake bunde dábadhondanigi, béɔyɔnganga na bɔ. 14 Ka bake ndɔ moci, ina akɛ Lúdhia ntɔa ka Tuatɛ́a, n'ande phɔtɔ nsombisigi ngɔmbɛ anjɛ nnde a n'esombi akpɛ, n'ande m'bangi-Mokonga. Mɔkɔta áokoda měma akɛ ka ɔka bhîbhíbhí yɔnga ndea Pɔ́lɔ. 15 Bii bam'batisi na bakpa nde bá k'endu nɛkɛ bɔbhu, áɔsɔ́ɔphana mɔtɛkɛ áogea be: «Bii bobeeki doni gea, nem'beeki Mɔkɔta, bhikani bóikɛ mɔtɛ mɔ. » Áosósosea gea bébeekeɛ.

Báemakii Pɔ́lɔ na Síla ka mɛkakɔ

16 Esa moci, débeoga k'ɔma á ɛmɛmi, nke moci, mbhɛdanigi áɔsɔdhondanisa. Yɛ dá na bansombo á ɔtɔa á nyɔngɔ subi akɛ. Bakɔta nɛkɛ dábaɔtɔa bangɔa ásii ka nyɔngɔ á ekuma nɛkɛ. 17 Nke ndɔ áosóbea n'aokogaga te: «Bakpa nde bánde babhɛdanigi ndea Mokonga mmbe á na kobha. Báɔnɔ́phɛa aphe á boamia á ka měma. » 18 Dáogeaga bó ka b'esa ásii. Ka bondɔ, Pɔ́lɔ áɔbɛa phɛ̂, áǒphaia, áǒngodea bansombo ndɔ gea: «Nenososi k'ina á Yéso Kiísito, tokani subi á nke nnde. » Kɛ̌kɛ ndɔ tɔ, bansombo ndɔ báontoka. 19 Bii bakɔta nɛkɛ báɔni gea nsebeɔ á ɛtɔi nɛbɔ abungi, báǒdhunga Pɔ́lɔ na Síla, báǒbota ka mosomba á nji, báǒbhisa ka ntua mosá á bateni-nyɔngɔ. 20 Báǒbhisa mosá á bakɔta baLɔma, báogea te: «BaYúdha nde báyombokisi kenombe nɛsu. 21 Báɔphɛa asii nde báimisii ka besu baLɔ́ma, beekea í na gea í. »

22 Usɛsɛ á bakpa báɔ̌bɛɛa Pɔ́lɔ na Sila. Bateni nyɔngɔ báǒphuisisa bhɔngɔ na sosea gea bébindɛ na ngbanga. 23 Báǒbinda phɛ̂, báǒmakea ka mɛkakɔ. Báonsosea m'bɔndigi-mɛkakɔ gea, éambɛ anja. 24 Bii aɔki ye bo, áǒbhisa ka ntungudɔ á mɛkakɔ. Áɔkpatikisa ecinji abɔ subi á gbutuka á me. 25 K'esa angendi dhakɛ, Pɔ́lɔ na Síla dábatú ɔmɛma na émba embɔ á bhebha á Mokonga. Badhabɔ batɔa-mɛkakɔ, báɔ̌bɔka. 26 Mɔngɔ moci, baningina akpɛ áodengisa nsimbiɔ á mɛkakɔ. Kɛ̌kɛ ndɔ tɔ, kǐo bhui á mɛkakɔ áɔúkukana.+ Ngoi á ngɔa bhui ndea batɔa-mɛkakɔ, áokodokanaga. 27 M'bɔndigi-mɛkakɔ ajujuki ye, áɔɔna kǐo bhui á mɛkakɔ n'aukukanigi, mpɔ áophúia m'bɛngɛ nɛkɛ ka gea te, áemoanɛ ně. Nga, dákanisi gea batɔa ka mɛkakɔ báti. 28 Cɔ, Pɔ́lɔ â gǎkɛ okoga k'ɛsɔ akpɛ te: « Kǒmoembɛ! Besu báunge be phɔ́tɔ oani! » 29 M'bɔndigi-mɛkakɔ ndɔ, áɔɔphanɛa ɔbhɛa, áokamisaga ga, áongia, áogua k'ecinji á Pɔ́lɔ na Síla, n'aɔɛkanaga. 30 Mbusa, áǒjuanisa, â kǒúsia te: «Baya, akeni négeɛ bo ka gea, néamɛ ka měma? » 31 Báonsikisia te: « M'beekea Mɔkɔta Yéso, mpɔ oamande, obe n'ekombo nɛkɔ. » 32 Mpɔ Pɔ́lɔ na Síla báɔntɔmiaga yɛ na batɔa k' endu nɛkɛ bɔbhu, Mbino á Mɔkɔta. 33 Ka mbenɔ á keiphe ndɔ tɔ, m'bondigi-mɛkakɔ áɔ̌bhɛda, na gǎ á sokosa abɔ aphɛphɔa. Kɛ̌kɛ ndɔ tɔ, báom'batisa yɛ na bakpa nɛkɛ bɔbhu. 34 Mpɔ m'bondigi-mɛkakɔ áǒdaphisa Pɔ́lɔ na Síla k'endu nɛkɛ, áǒbopha eea. Yɛ kimoci na batɔa-k'endu nɛkɛ báotuma na maseye phɛ̂ ka nyɔngɔ nde, dábam'beeki Mokonga.

35 Bii esa akodokani ye, bateni-nyɔngɔ baLɔ́ma báǒteka bakɔta á batɔa-emani ka ngodea á m'bondigi- mɛkakɔ te: « Ojuanisa bakpa ndɔ ka mɛkakɔ. » 36 M'bondigi-mɛkakɔ áoga ɔntɔmia Pɔ́lɔ mbino nnde: «Bateni-nyɔngɔ baLɔ́ma bámotekisii mbino, nénojuanisɛ. Cɔ, juanani bógɛ na bɔjɛjɛ! » 37 Pɔ́lɔ â gǎkɛ ǒngodea batɔa-émani ndɔ te: «Básobindisi ka ntanga kanga á yɔngisa nyɔngɔ nɛsu, báosómakisa ka mɛkakɔ, na bende gǎkɛ baLɔ́ma. Cɔ, kɛ̌kɛ nde, bákondi básojuanisɛ ka bɔsɔmɛa ka bo? Bɛɛndɔ. Bakɔta báunge bábhikɛ básojuanisɛ ndiu tɔ sasa abɔ. » 38 Bakɔta á batɔa-emani báǒngodeaga bateni-nyɔngɔ bii Pɔ́lɔ ɛ̌tɔngi. Báobanga bii báɔki gea, Pɔ́lɔ na Síla bánde baLɔ́ma. 39 Mpɔ, báobhika ka mpɛphɛ á Pɔ́lɔ na Síla, báǒdengemisaga, báǒjuanisisa ka mɛkakɔ. Báǒgea te, bátokɛ ka kenombe ndɔ. 40 Ka juana á Pɔ́lɔ na Síla ka mɛkakɔ, báoga mɔtɛ á Lúdhia. Oa, báɔ̌bɔna badhabɔ babeeki, báǒgbagisaga ka měma, mpɔ báoga.