Kanisa á ka Yɛusalɛ́maka adhondanigi ka nyɔngɔ á gua ganja
15
1 Mbusa, bakpa buangbo, bunde dábatoki na Yudhɛ́a, báoga ka kenombe á Antiɔkía á ka Sulía. Báju ye kó, báokpanga goisaga á badhabɔ babeeki bɔbhu nyɔngɔ ndee: « Aoba na bókógu ganja bíndɔ ɛɔphi ndea Mósa asosi, bókótɔkɛku na boami ka měmaa. » 2 Cɔ, Pɔ́lɔ na Bhaanábha báoya bɔphɛi nɛbɔ, báopua na bɔ ásii ka yɔnga. Ka bondɔ, babeeki á ka Antiɔkía báɔnsɔmbɔa Pɔ́lɔ, Bhaanábha na bakpa buangbo sɔsɔbɛ abɔ, ka gea bágɛ na Yɛusalɛ́ma, mɔtɛ á bateki na bagbɛga á kanisa, ka phɔa á nyɔngɔ nde dábaopua kau.3 Ka Antiɔkía, kanisa áǒbopha kema nde akeni enga abɔ ka tamba. Báɔnyɛ́nya ka Phɔinikía na Samalía, báɔ̌tɔmiaga babeeki nyɔngɔ bii batɔa-k'ekuna nɛngbo bámbeeki Mokonga. Nyɔngɔ ndɔ áɔ̌bɔngɛa babeeki bɔbhu phɛ̂. 4 Bii bakpa nde kanisa déteki báju ye na Yɛusalɛ́ma, batɔa ka kanisa, bateki ndea Yéso na bagbɛga báǒsesea. Pɔ́lɔ na Bhaanábha báɔ̌tɔmiaga kema bhui nde Mokonga dági ka njaga abɔ. 5 Babeeki buangbo, bundɔ dábatú mosá k'ekombo ndea baPhaisáiɔ, báoma, báɔyɔnga te: « Akeni ndiu babeeki á k'ekuna nɛngbo bunde bábeeki, báguɛ ganja na sosea abɔ gea báambɛ ɛɔphi ndea Mósa. »
6 Bateki na bagbɛga báodhondanaga ka ianaga ka nyɔngɔ ndɔ. 7 Mbusa á pua phɛ̂, Pɛ́tɛɛ áoma, áǒngodea te: «Baya, benu sasanu booúbha gea, Mokonga dámɔsɔmbu kala sɔsɔbɛ anu ka gea te nɛ́tɔmiɛgɛ nyɔngɔ nɛkɛ k'ekuna nɛngbo gea, báɔkɛ Mbino Anja na beekea i. 8 Mokonga mmbɔ aoúbha měma á bakpa, aengekisi na beekea batɔa á k'ekuna nengbo ka ɔpha abɔ Měma á Mokonga bíndɔ dásophi phɔtɔ. 9 Kásotinganisi gǎkɛ na bɔ nga, asokosi měma á bɔ ka nyɔngɔ nde bábeeki. 10 Cɔ, kɛ̌kɛ nde bo gǎkɛ ɔnjɔbhisaga Mokonga ka bo nga, boǒsosea bagoigi nde bákumbɛ nkumba nde, nanga batatasu nanga besu sisasu débékétɔki kumba i. 11 Bebeeki gǎkɛ gea, Mokonga asóamisi ka nyɔngɔ á bonjánja á ekondi ndea Mɔkɔta Yéso, bíndɔ déamisi batɔa k'ekuna nɛngbo. »
12 Mpɔ, usɛsɛ á bakpa bɔbhu báodhakana, phio! Báɔmɔ̌kanea Pɔ́lɔ na Bhaanábha bii báɔtɔmiaga mphaniɔ na ketangaɔ ndɔ Mokonga dátɔtɔkisi ka njaga abɔ sɔsɔbɛ á batɔa-k'ekuna nɛngbo. 13 Bii bágɔbi ye yɔnga, Yakɔ́bɔb áǒngodea te: «Baya, ɔ́mɔɔkani phɔ! 14 Simɔ́nic dásóngodi bii Mokonga aphangisi phɔ́ ngomi nɛkɛ ka batɔa-k'ekuna nɛngbo gea, ɛ́sɔmbɔɛ sɔsɔbɛ abɔ, bábɛ bakpa nɛkɛ. 15 Nyɔngɔ ndɔ áotamba kimoci n'inde á baɔtu-nyɔngɔ, nnde dábadundu subi á buku á Mokonga be,
16 ‹ Mbusa indɔ, nejaeka
nɛ́ɔphɛka goto endud ndea Dhaúdhi nnde dángbɔɔkani.
Nɛbɔngisiagande goto ngundu-endu ndɔ.
17 Ka gea te, bakpa bunɛngbo bɔbhu bánkabande Mɔkɔta.
Eya, débophani batɔa-k'ekuna bhui, bunde dɛ́bɔphani gea te bábɛ buamɔ.
Nndɔ unge Mɔkɔta ayɔngi,
18 moangɔ nɛkɛ nnde dádigimisi kalae. ›
19 Ka bondɔ, neteni nyɔngɔ be: Nekanisi te, békětambisɛgɛmbɛ batɔa-k'ekuna nɛngbo bunde bámbeeki Mokonga. 20 Bédunduiɛ ndiu baobá́ gea, báyɛ bɔjɔɔkiɔ nde á ka ea nyama nde dá báphui ka phɛa. Bákagɛ mɔnɔ k'aphe á otungɔf. Bákaeɛ mɔnɔ nyama n'aku ǐti, bákaeɛ mɔnɔ phɔtɔ magiag. 21 Nga, kpanga á kala, báɔphɛa na tanga ɛ́ɔphi ndea Mósa subi á k'endu á bɔphɛi danga-danga ndea baYúdha k'esa á sabato bhui na ka kenombe bhui. »
Kanisa adundu baobá́ ka babeeki á ka Antiɔkía
22 Mpɔ bateki, bagbɛga á kanisa na kanisa bhui, báophanga sɔmbɔa á ka bakpa sɔsɔbɛ á bɔ na teka á bɔ ka Antiɔkía kimoci na Pɔ́lɔ na Bhaanábha. Báɔ̌sɔmbɔa Yúdha mmbe bá phɔtɔ ɔmɔphana Bhalisábha na Síla, bunde dábatú na kɔkɔta sɔsɔbɛ á badhabɔ. 23 Báǒteka na baobá́ na bádundu subi í be,
« Besu bateki, bagbɛga na babeeki běsesi badhasu bundɔ báná baYúdha bunde báiki ka Antiɔkía, Sulía na Kilikía. 24 Bɛɔki gea, bakpa buangbo ka besu bátoki koni kanga á moangɔ nɛsu. Báonóagatisa na kɔbisa á měma anu na nyɔngɔ nɛbɔ. 25 Ka bondɔ, béoúbha ophanga na měma moci, ka sɔmbɔa á bakpa ndɔ beóteka mɔtɛnu. Bágande kimoci na badhasu ékondi, Bhaanábha na Pɔ́lɔ. 26 Bɔ, dábabhisi enda nɛbɔ bhui ka bhɛdaneaga á Mɔkɔta nɛsu Yéso Kiísito. 27 Benótekisii Yúdha na Síla, bɔ bánongodeande bhase nyɔngɔ nde benódundui. 28 Nga, Měma á Mokonga na besu sasasu, bephangi gea békénokumbisɛku nkumba ádoko, tɔndɔ ɛɔphi nde ana kantíti n'ande be. 29 Bókoeɛ mɔnɔ eea nde báphui ka phɛa á bakɔta á na kobha, bókoeɛ phɔtɔ magia, na nyama n'aku ǐti. Bókogɛ mɔnɔ gǎkɛ k'aphe á otungɔ. Bǒbangisa na nndɔ, ámbé bogi anja. Benosesi! »
30 Mpɔ Pɔ́lɔ na badhakɛ báɔɔkɔa ka nji ndɔ, báoga ka Antiɔkía. Kó, báǒdhondanisa babeeki bɔbhu, báǒbopha baobá́ ndɔ. 31 Mbusa á bɔ tanga á báoba ndɔ n'ɛsɔ akpɛ, báobá na maseye nga, bɔphɛi kau débophi bukpɛkpɛ á ka měma. 32 Yúdha na Síla bundɔ baɔtu-nyɔngɔ, báɔ̌phɛa phɛ̂, báǒgbagisa na opha abɔ bukpɛkpɛ. 33 Báoika kó k'esa abhɔa, mpɔ, babeeki bɔbhu báɔ̌ɔkɔa gea bájɛ na bɔjɛjɛ mɔtɛ á bundɔ dáběteki. [ 34 Síla â gǎkɛ ophanga nɛkɛ jiga ka Antiɔkíah.] 35 Cɔ, Pɔ́lɔ na Bhaanábha na baphangigi buangbo básii, bâ gǎkɛ ojiga ka Antiɔkía, ka phangiaga na phɛa á Mbino Anja ndea Mɔkɔta.
Pɔ́lɔ na Bhaanábha bákatanigi
36 Mbusa á b'esa abhɔa, Pɔ́lɔ áongodea Bhaanábha te: «Béjɛ phɔ́ ka ɛnjɛa badhasu babeeki ka kenombe moci-moci nde dɛ́bɛtɔ̌migi nyɔngɔ ndea Mɔkɔta, ka ɛnjɛa ambé enda abɔ a bo. » 37 Cɔ, Bhaanábha dákondi gǎ na Yoáni mmbe báɔmɔphana Málikɔ. 38 Pɔ́lɔ dáɔni gea kákeni bhɛda akɛ bágɛ na yɛ nga, Málikɔ dédeketi ka Pamphilía, kanga á tutuisa ekuma kimoci na bɔi. 39 Báopua phɛ̂ ngǔngu abɔ na ka bii dábakatanigi. Bhaanábha áɔmbhɛda Málikɔ, báokambea ka koko ángbó, báoga na Kipúɔ. 40 Pɔ́lɔ â gǎkɛ ɔnsɔmbɔa nɛkɛ Síla. Mpɔ, babeeki báɔmɛma Mokonga ka phɔa á bɔ gea, bágɛ na bonjánja á ekondi ndea Mɔkɔta. 41 Báɔtɔmba Sulía na Kilikíaj na báogbagisaga měma á batɔa-kanisa.