Ekuma Ndea Bateki 14

Pɔ́lɔ na Bhaanábha báɔphɛa Mbino Anja ka Ikɔnía

1 Nyɔngɔ nde dáogeana ka Ikɔníɔ, aunge dá phɔtɔ ogeana ka Antiɔkía. Pɔ́lɔ na Bhaanábha báongia k'endu á bɔphɛi ndea baYúdha. Bâ phɔtɔ ɔphɛa na ka bii bakpa básii, baYúdha na bunde báná baYúdha dábam'beeki Yéso. 2 BaYúdha íbunde dábayé beekea á Yéso, bâ gǎkɛ ɔ̌sɔia bunde báná baYúdha békangeɛ bunde bám'beeki Yéso. 3 Pɔ́lɔ na Bhaanába, bâ gǎkɛ oika kó esa ásii. Báosuia tɔ̌miaga á nyɔngɔ á Mɔkɔta kanga á ngaka na sebea akɛ. Mɔkɔta â koopha bukpɛkpɛ á tɔtɔkisa ketangaɔ na mphangiɔ ásii. Nndɔ unge aengekisi bɔphɛi á bonjánja á ekondi nɛkɛ gea ande doni. 4 Batɔa ka nji ndɔ bâ gǎkɛ okatanaga. Bunɛngbo báoba nkɛkɛɔ á baYúdha, bunɛngbo nkɛkɛɔ á bateki. 5 BaYúdha na bunde báná baYúdha, na bakɔta nɛbɔ, bâ gǎkɛ osuia tambisaga Pɔ́lɔ na Bhaanábha, na moa abɔ ka bɛtaga abɔ n'ɛtɛ. 6 Bii Pɔ́lɔ na Bhaanábha báɔki maca ndɔ, báotea báoga ka kenombe á Lísita, na Dhɛ́ɛbhɛ, nji ndea Likaɔnía, na nji á ka mpɛ́phɛ í. 7 Kó, báotutuisa phɛa á Mbino Anja ndea Mɔkɔta Yéso.

Pɔ́lɔ na Bhaanábha báɔbhɛdanaga ka Lísta

8 N'dɔti moci dátú ka Lísita ecinji akɛ n' aphɛphi. Yɛ dáiki ka odo kanga á tamba kpanga á bɔkɔtɛana akɛ. 9 Cɔ, áɔmɔ̌ka Pɔ́lɔ n'aɔyɔnga. Oa, Pɔ́lɔ áontumia n'dɔti n'iso, áoúbha gea, ana beekea nnde aɔtɔka amisa akɛ. 10 Ka bondɔ, Pɔ́lɔ áɔyɔngodea n'ɛsɔ akpɛ gea: « Omesia phoi! » Ntɔa kidɔti ndɔ áǒmesia, áɔbɛkaga, áotamba. 11 Cɔ, bii usɛsɛ á bakpa báɔni ye bó, báokoga ka yɔngea á bɔtɔa á ka Kilikaɔnia, gea: «Bakɔta á na kɔbha bábhɛdi iii á kokpa, báokia mɔtɛ asu! » 12 Báɔmɔphana Bhaanábha: « Jɛ́u ». Bâ gǎkɛ ɔmɔphana Pɔ́lɔ: « Ɛɛmɛ », ka nyɔngɔ nde Pɔ́lɔ aámbé dátú ɔyɔnga. 13 Mpɔ, ntobei-phɛa á endu á esomba ndea Jɛ́u áombhika na mǔku á ngɔmbɛ n'antɔndi na maya ka kǐo nnde dátú ka ngba á nji. Aobhika kimoci na usɛsɛ á bakpa ndɔ. Nga bɔ, báokonda phɛa á nyama ndɔ ka phɔa á Pɔ́lɔ na Bhaanábha. 14 Bii bateki, Bhaanábha na Pɔ́lɔ báɔki nndɔ, báonyuaga ngɔmbɛ nɛbɔ, báokamisaga ngia ka usɛsɛ á bakpa na báokoga gea, 15 « Badhani, bogi bondɔ ka bo? Be phɔtɔ bakpa bea benu, bekengeani tɔ na benu ka kema bhui. Bɛɔnɔ́phɛa Mbino Anja ka gea, bódeketɛ dokomisa á kema á jái-jái, bókětiɛ ka Mokonga mmbɔ mɛyɔ, mmbɔ aconji kobha, mokonda, obenge na kema bhubhui nde a kau. 16 Ka matu nde dányɛ́nyi, Mokonga dádeketi ekuna bhui bábeɛ aphe nde bákondi. 17 Dádeketi gǎkɛ mphangiɔ á bonjánja nɛkɛ. Nga, anóphi mbua ka toka á na kobha, dungu ka matu i, áonókutisa, áotumisa měma anu na maseye. » 18 Nanga ába bó, dátú akpɛ ka imisia á mɔphɛ á bakpa gea bákáebophɛ mɔnɔ phɛa.

19 Mbusa, baYúdha á ka Antiɔkía na Ikɔníɔ, báɔsɔia usɛsɛ á bakpa gea bagamanɛ na bɔ, bámoɛ Pɔ́lɔ ka bɛtagǎkɛ n'ɛtɛ. Báonga ně ka ngba á kenombe, báokanisia te aku. 20 Bagoigi bâ gǎkɛ ontimba Pɔ́lɔ. Yɛ áokoda iso. Mpɔ, áoja na nji. Mama i, báoga na Bhaanábha ka kenombe á Dhɛ́ɛbhɛ.

Pɔ́lɔ na Bhaanábha básikianigi na Antiɔkia

21 Pɔ́lɔ na Bhanábha báju ye ka kenombe á Dhɛ́ɛbhɛ, báɔphɛa Mbino Anja ndea Mɔkɔta Yéso, bakpa básii báoba bagoigi. Mbusa, báosikianaga na Lísita, Ikɔníɔ, Antiɔkía á ka Pisidhía. 22 Bii dábaotamba ka nji ndɔ bhui, báogbagisaga měma á bagoigi gea, báendɛ ka beekea nɛbɔ. Báǒgea te: « Akeni básotambisɛgɛ phɛ̂ mosá á ngia asu ka koboamɛ ndea Mokonga. » 23 Subi á kanisa moci-moci á ka nji ndɔ, Pɔ́lɔ na Bhaanábha báɔ̌sɔmbɔa bagbɛga á kanisa. Mbusa i, báɔmɛma na báɔika kanga á eaga ka nyɔngɔ á mɛma á Mokonga. Mpɔ báǒbhisa ka njaga Mɔkɔta mmbe bám'beeki éambɛ.

24 Mbusa, báotenisia ka kenombe á Pisidhía, báojua ka nji á Pamphilía. 25 Mbusa, báɔphɛa nyɔngɔ á Mokonga ka Pɛ́ɛga. Mpɔ, báɔtɔnganaga na Atalía. 26 Oa ndɔ, báokambea ka koko ángbó, báoga na Antiɔkía á ka Sulía, nji ndɔ unge dáběbhisi ka njaga á Mokonga mɛnɛ á ekondi ka gea, bátɔtɔkisɛ ekuma nɛbɔ ndɔ dábagɔbi. 27 Báju ye na Antiɔkía, báǒdhondanisa batɔa kanisa, báǒngodea kema bhui nde Mokonga dági kimoci na bɔ, na bii Mokonga ěkodei phɔtɔ bakpa nde báná baYúdha aphe á beekea á Mokonga. 28 Báoika na babeeki oa k'esa ásii.