Ekuma Ndea Bateki 17

Pɔ́lɔ na Síla báge na Tɛsalɔníka

1 Pɔ́lɔ na Síla báɔnyɛ́nya k'aphe á kenombe Amphipɔ́li na Apɔlɔnía, báojua ka Tɛsalɔníka, ɔma nde endu á bɔphɛi ndea baYúdha dátú. 2 Bii Pɔ́lɔ dáɛmbani na ngiaga kau, áongia k'endu ndɔ. Kó, áoabha na baYúdha ka sabato isaɔ ka phɔa nyɔngɔ nde a subi á buku á Mokonga. 3 Aokoda buku ndɔ, áɔtɔmiaga na phangea abɔ gea, dákeni Kiísito átambɛgɛ na kua, mpɔ áojujuka ka kukua. Aǒgea te: « Yéso, mmbe nɛɔnɔ́tɔmiaga nyɔngɔ akɛ, yɛ aámbé ande Kiísito. » 4 Ká baYúdha báobeekea, báǒdakatea Pɔ́lɔ na Síla. BaGiíki básii, babangi-Mokonga na bake á koomba, bâ phɔtɔ obeekea. 5 BaYúdha bâ ndiu oba na nsengo, báodhondanisa usɛsɛ á bakpa jǎi-jǎi bundɔ dábědhondi k'ɔma danga-danga, báoyombokisa kenombe. Báokidia k'endu ndea Yasɔ́ni, báǒkaba Pɔ́lɔ na Síla ka gǎ na bɔ mosá á madhondanɔ. 6 Bii bákɛ́bɔni gǎkɛ, báǒbotaga Yasɔ́ni na badhakɛ babeeki buangbo mosá á bakɔta á kenombe na báokoga te: «Bakpa nde dábáyombokisi mokonda bhui, kɛ̌kɛ nde bákidi oani, 7 Yasɔ́ni ěsesi gǎkɛ mɔtɛkɛ. Bagáa ndɔ bɔbhu bákáobea ɛɔphi ndea Moamɛ á baLɔ́ma nga, bági te mɔamɛ baangbo abei, ina akɛ Yéso. » 8 Nyɔngɔ ndɔ áɔ̌bɛisa usɛsɛ á bakpa na bakɔta á kenombe. 9 Bakɔta á kenombe báǒphendisa Yasɔ́ni na badhakɛ babeeki bangɔa, mpɔ, báǒdeketa bágɛ.

Pɔ́lɔ na Síla bákidi ka Bɛlɔ́ia

10 Ka ipha á esa, mɔngɔ moci badhabɔ babeeki báoga ɔ̌ɔkɔa Pɔ́lɔ na Síla, ka gǎ á bɔ na Bɛlɔ́ia. Ka kidia á bɔ, báongia subi á endu á bɔphɛi ndea baYúdha. 11 BaYúdha á ka Bɛlɔ́ia, dábatú na měma anja kɔ̌nyɛ́nya baYúdha á ka Tɛsalɔníka. Dábaokonda phɛ̂ ɔka á nyɔngɔ á Mokonga. Esa bhui, dábaokaba kodoni subi á buku á Mokonga ka digimisa bɔphɛi ndea Pɔ́lɔ. 12 BaYúdha básii sɔsɔbɛ á bɔ báobeekea. Ka baGiíki, bake á koomba dábabeeki na bǒko básii phɔtɔ. 13 Cɔ, bii baYúdha á ka Tɛsalɔníka báɔki gǎkɛ gea, Pɔ́lɔ a phɔtɔ ɔphɛa nyɔngɔ á Mokonga ka Bɛlɔ́ia, báɔ̌gɛndɛa kó ka yombokisa na dengisa á bakpa. 14 Kɛ̌kɛ ndɔ, badhabɔ babeeki báongesa Pɔ́lɔ nci á obenge. Síla na Timɔtɛ́ɔ, bâ gǎkɛ ojiga na Bɛlɔ́ia. 15 Bundɔ dábantambisi Pɔ́lɔ, báonjusa ka Atɛ́nɛ. Ka ja á bɔ, Pɔ́lɔ áǒngodea gea, ambe Síla na Timɔtɛ́ɔ bákamisɛgɛ gǎ dhonda akɛ.

Pɔ́lɔ akidi ka Atɛ́nɛ

16 Bii Pɔ́lɔ dátú ǒbondea Timɔtɛ́ɔ na Síla ka Atɛ́nɛ, měma akɛ áoujukana ka ɔna á bii kenombe ndɔ atumi na iii á bakɔta á na kobha. 17 Cɔ, subi á endu á bɔphɛi ndea baYúdha, áoabha na baYúdha na babangi- Mokonga bunde báná baYúdha. Dá phɔtɔ ogea bo na bakpa nde dáǒdhonda ka mosomba esa bhui. 18 Ka batɔa-ubhapha á ka nkindi ndea baIpikulíɔ na baSitɔíkɔ, báokpanga pua na Pɔ́lɔ. Bunengbo báɔyɔnga gea: «Ntɔa-eongo nde akondi yɔnga á kema sina? » Buangbo goto: « A bea nkpa n' aɔtɔmɛaga nyɔngɔ á bakɔta á na kobha bunde békéǒúbha. » Dábayɔngi bó nga, dábaɔmɔɔka Pɔ́lɔ n'aɔtɔmɛaga Mbino Anja ndea Yéso na nyɔngɔ á jujuka á basí ka kukua. 19 Mpɔ, báɔndhunga Pɔ́lɔ, báonga ně mosá á ntua á tena nyɔngɔ nde dábaɔɔphana: Alɛɔpágɔ. Oa, báongodea te: «Bé phɔ ɔtɔka na beúbhi kantíti á bɔphɛi á kɛ̌kɛ nde ɔɔsɔphɛa? 20 Nga, beɔkɔɔka n'ɔyɔngaga nyɔngɔ nnde békéɔkimbɛ mɔnɔ. Betókondi gǎkɛ béúbhɛ kantíti i. » 21 (Nga, batɔa ka Atɛ́nɛ bɔbhu na bakɛni nde dábaiki kó, dábaikii tɔ tɔ̌miaga kabɛ n'ande ka ɔka á mbino danga-danga á kɛ̌kɛ.) 22 Cɔ, Pɔ́lɔ áomama mosá á nkindi á bakpa ka Alɛɔpágɔ, áogea te: «Baya, batɔa ka Atɛ́nɛ, nɛɔni gea bobhisi měma anu phɛ̂ ka bakɔta á na kobha. 23 Nga, bii déotámbaga ka kenombe nɛnu, dɛ́ɔɔnjia bhîbhíbhí ɔma á esomba nɛnu. Dɛ́ɔni ɛtɛ-ɔphɛɔ nde badundu kau be, ‹A kaphɔa mɔkɔta á na kobha mmbe nn'aoúbhikana. › Cɔ, mɔkɔta ndɔ boon'dokomisa kanga úbha akɛ, aámbe nɛɔnɔ́tɔ̌miaga mbino akɛ kɛ̌kɛ nde. 24 Yɛ ande Mokonga, mmbe aconji mokonda na kema bhubhui nde a kau. Ande Mɔkɔta á kobha na odo. Nn'aoika subi á endu nde nkpa aphɛki na njaga. 25 Nna gǎkɛ njaga á kokpa aunge aɔmbhɛdaneaga, bea bíndɔ atúoba n'ana siki á kema nga, yɛ aámbé aobopha bakpa bhɔbhu enda, ɛphɛu na kema bhui. 26 Dáconji ekuna bhui á ka mokonda kpangea á ka nkpa moci, ka gea, báikɛ k'ɔma bhui ka mokonda. Dábhisi matú danga-danga na bhisa á moɔ á ɔma á boiki nɛbɔ. 27 Mokonga dági bondɔ ka gea, bakpa bánkabɛgɛ na kenga ɔna akɛ, yɛ nna danga ka nkpa na nkpa ka besu. 28 Nga, ‹ Ka nyɔngɔ akɛ unge, beoenda, beotamba, bebei. › A bíndɔ batɔmigi-mɛní nɛnu, bági, ‹ Bende banakɛ. › 29 Cɔ, bii bende bana-Mokonga, kákeni békanisiɛ te, Mokonga akengeani na iii nde bakpa bákanisii na bɔngisiaga i na ɔ́lɔ, ngɔa n'ɛtɛ ka bá bakɔta á na kobha. 30 Mokonga nna ye gǎkɛ obea nyɔngɔ nde bakpa dábagi na bákáomúbha. Kɛ̌kɛ nde aebɔphani ye tɔ bakpa bɔbhu á k' ɔma bhui ka kětia á tambea abɔ. 31 Mokonga a ye bhisi esa nde atenaeka nyɔngɔ á batɔa ka mokonda bhui ka kodoni, na ka njaga a nkpa nde ansɔmbu. Dánengekisi nkpa kaye mosá á bakpa bɔbhu ka jujukisa akɛ ka kukua. »

32 Bii batɔa ka Atɛ́nɛ báɔki ye nyɔngɔ á jujuka á basí ka kukua, buangbo báɔntɛbhɛa, buangbo bâ gǎkɛ ogea te: «Bɛɔkande goto n'ɔyɔnga nyɔngɔ ndɔ esa nɛngbo. » 33 Ka bondo unge, Pɔ́lɔ áokatana na bɔ. 34 Nanga bó, bakpa buangbo báobeekea, báojukana na yɛ. Sɔsɔbɛ abɔ, dátú Diɔnisíɔ, ka batɔa á ka ntua Alɛopágɔ na nke Dhamáli na bakpa bunɛngbo phɔtɔ.