Pɛ́tɛɛ aɔtɔ̌miaga nyɔngɔ ka kanisa á ka Yɛusalɛ́ma
11
1 Cɔ, bateki na babeeki bundɔ dábatú ka Yudhɛ́a, dábaɔki gea te, batɔa-k'ekuna nɛngbo bábeeki nyɔngɔ á Mokonga. 2 Bii Pɛ́tɛɛ asikianigi ye na Yɛusalɛ́ma, babeeki bundɔ baYúdha báopua na yɛ, 3 báogea: « Moko! Ongi subi á endu ndea bauoa na eaga na bɔ? » 4 Mpɔ, Pɛ́tɛɛ áokpanga tɔ̌miaga abɔ nyɔngɔ bhui moci-moci, áǒgea te, 5 « Mbenɔ nde détú ɔmɛma Mokonga ka kenombe á Yɔ́pa, nɛɔɔna mphaniɔ. Nɛɔɔna kema bea bhɔngɔ na ǎgbae n'atoki na kobha, n'aodhidha mosá ani na báboege ɛɔkɔ i bhui gena na ngoi. 6 Nɛ́ɔɛnjia subi í bhîbhíbhí, nɛ́ɔɔna banyama á ka odo á ecinji gena, banyama á k'osaa, na bunde báotamba n'egogo na bambǔ á ka mpɛna. 7 Nɛ́ɔɔka phɔtɔ ɛsɔ n'amogi be, ‹ Pɛ́tɛɛ, ma, ómoa banyama ndɔ, óeɛ. › 8 Néonsikisia te, ‹ Bɛɛndɔ Mɔkɔta. Nga, bii nɛ́bɔkɔtɛanɛ, kéimbɛ mɔnɔ tanda ea á otáɔ na nnde aɔjɔɔkisa.› 9 Nê goto ɔɔka ɛsɔ n'atoki na kobha gea, ‹ Kema nde Mokonga asokosi, ɔbɛ kogeɛmbɛ ajɔɔkani. › 10 Mphaniɔ ndɔ áosikianaga mɔngɔ isaɔ. Mpɔ, kema ndɔ bhui â goto otaia na kobha. 11 Ka mbenɔ ndɔ tɔ, nɛɔ̌bɔna bakpa basaɔ bunde dáběteki mɔtɛmɔ ka toka na Kaisalía na bámamege k'iso á mpume á endu nde débetu kau. 12 Měma á Mokonga áomongodea gea, negɛ tɔ na bɔ kanga á ngaka. Badhani babeeki ngia á njaga (6) bunde nebiki n'abɔ, bɔ baunge dábage omodeketa. Mpɔ béokidia ka Kaisalía na ngia besu bɔbu mɔtɛ á Kɔnɛlía. 13 Yɛ, áɔsɔ́tɔ̌miaga bii dámɔ̌ni malaeka n'amamege k'endu nɛkɛ áongodea te, ‹ Óteka bakpa na Yɔ́pa, bága m'boɛ Simɔ́ni, mmbɔ báɔmɔphana Pɛ́tɛɛ. 14 Yɛ aámbé akongodeagande nyɔngɔ nde akoamisande ka měma, na batɔa k'endu nɛkɔ bɔbhu. › 15 Mbenɔ nde nekpangi gǎkɛ yɔnga, Měma á Mokonga áokia gǔ abɔ bíndɔ dákpangi kia gǔ asu. 16 Oa, dénekanisi nyɔngɔ á Mɔkɔta Yéso nnde dági te, ‹ Yoáni dátúobatisa n'ibo. Benu gǎkɛ, banóbatisande ka bukpɛkpɛ á Měma á Mokonga. › 17 Cɔ, Mokonga débophi Měma á Momkonga bíndɔ dásophi mbenɔ nde débem'beeki Mɔkɔta Yéso Kiísito. Nende gǎkɛ ani, ka pua na Mokonga? » 18 Bii báɔki ye nyɔngɔ ndɔ, bɔbhu báɔphɔnga. Báombhebha Mokonga, báogea te: « Ande doni, Mokonga ěbophi batɔa-k'ekuna nɛngbo bukpɛkpɛ á kětia á tambea abɔ mosá akɛ, ka bá na enda á kɛ̌kɛ. »Kanisa á ka Antiɔkía akpangi
19 Mbusa á moa á Sɛtɛphánɔ, babeeki dáphanjekani ka nyɔngɔ á tambaga. Bɔ báoga na Phɔinikía, buangbo na Kipúɔ, buangbo na Antiɔkía. Kó, dába tɔ ɔphɛa nyɔngɔ á Mokonga ka baYúdha. 20 Ka babeeki ndɔ, dábatú batɔa ka Kipúɔ na batɔa ka Kuɛ́nɛ. Dábáoga ndiu na Antiɔkía ka tɔ̌mia á Mbino Anja ndea Mɔkɔta Yéso ka bunde báná baYudha. 21 Mɔkɔta áǒbopha bukpɛkpɛ. Ka bondɔ, bakpa básii báobeekea nyɔngɔ á Mɔkɔta na kětia á tambea abɔ ájede. 22 Bii batɔa ka kanisa á ka Yɛusalɛ́ma dábaɔki nyɔngɔ ndɔ, báonteka Bhaanábha ágɛ na Antiɔkía. 23 Aju ye kó, áɔɔna bii Mokonga dégii bakpa nɛkɛ bonjánja, áoba na maseye. Áǒgbagisaga babeeki bhɔbhu ka měma ka gea bambhɛdaneɛgɛ Mɔkɔta na měma mo. 24 Bhaanábha dátú ntɔa-doni, mmbe atumi na Měma á Mokonga phɔtɔ na beekea. Ka bondɔ, bakpa básii báǒyamea ka beekea Mɔkɔta Yéso.
25 Mpɔ Bhaanábha áoga na Táasɔ k'aphe á kabaga á Saúlɔ. 26 Andhondi ye, áonga ne na Antiɔkía. Kó báodhondana na batɔa ka kanisa, báoika na bɔ ka saga moci. Báǒphangiaga bakpa básii nyɔngɔ á ka měma. Ka Antiɔkía unge bakpangi ɔphana á bagoigi baKiísito. 27 Cɔ, ka matu ndɔ, baɔtu-nyɔngɔ báotoka na Yɛusalɛ́ma, báoga na Antiɔkía. 28 Ka bɔ moci ina akɛ Agábhɔ, áɔɔtɔa nyɔngɔ ka bukpɛkpɛ á Měma á Mokonga gea, monganya aguande ka mokonda bhui. Monganya ndɔ dágu gǎkɛ ka matú á moamɛ ndea Lɔ́ma, ina akɛ Kɔɔdhíɔ. 29 Cɔ, bagoigi á ka Antiɔkia báosuia gea, báphuiɛ bangɔa bíndɔ nkpa na nkpa átɔande, bátekɛ ka enga á badhabɔ babeeki á na Yudhɛ́a. 30 Bagbɛga báogea bo. Bhaanábha na Saúlɔ báɔtanga bangɔa ndɔ ka bagbɛga á kanisa á ka Yudhɛ́a.