Bámoe Yakɔ́bɔ, báomakea Pɛ́tɛɛ ka mɛkakɔ
12
1 Ka matu ndɔ, Moamɛ Ɛlɔ́dhɛa dákpangi tambisaga ka batɔa-kanisa. 2 Áomosa Yakɔ́bɔ, munamakɛ na Yoáni ka m'bɛngɛ. 3 Bii aɔni gea, nyɔngɔ ndɔ ɛ̌bɔngɛi baYúdha, â phɔtɔ ondhungisa Pɛ́tɛɛ. Nndɔ dágeani ka maseye á mokati kanga á cacub. 4 Mbusa á dhungisa akɛ, Ɛlɔ́dhɛ áommakisa ka mɛkakɔ, áososea ketoto gena á batɔa-emani. Ketoto moci n'ana batɔa-emani gena-gena gea, bánambɛ. Dásui tena á nyɔngɔ nɛkɛ mosá á bakpa mbusa á Pasáka. 5 Ka bondɔ, báonamba Pɛ́tɛɛ ka mɛkakɔ. Batɔa ka kanisa dába gǎkɛ ɔmɛma Mokonga ka nyɔngɔ akɛ phɛ̂.Malaeka ndea Mɔkɔta amphui Pɛ́tɛɛ ka mɛkakɔ
6 Dájigi esa moci ka gea Ɛlɔ́dhɛ á tenɛ nyɔngɔ ndea Pɛ́tɛɛ. Kiipha, Pɛ́tɛɛ áoda sɔsɔbɛ á batɔa-emani babɛ. Dábám'boege na ngoi ibɛ á ngɔa. Batɔa-emani babɛ dábatú obondeaga mosá á kǐo á mɛkakɔ. 7 Kɛ̌kɛ ndɔ, malaeka nde ba Mɔkɔta áonkidianea Pɛ́tɛɛ, oanga áobhɛnya subi á endu. Áonsuga Pɛ́tɛɛ ka mpamba, áonjujukisa, áongea: « Cɔ, ma mbangɔ! » Kɛ̌kɛ ndɔ, ngoi á ngɔa ndɔ áokodokana ka njaga á Pɛ́tɛɛ. 8 Mpɔ, malaeka áongodea Pɛ́tɛɛ: « Ɔ́bɔɛa mokaba nɛkɔ na ɔ́ɔlɛ beato nɛkɔ! » Pɛ́tɛɛ áogea bo. Malaeka áongodea: « Ɔla phɔtɔ bhɔngɔ nɛkɔ á pheɔ, ómobeɛ! » 9 Pɛ́tɛɛ áojuana ka mɛkakɔ, áom'bea malaeka. Dákaúbhi gǎkɛ gea, kema nde malaeka dági dátú á kodoni, áoúbha te aɔni mphaniɔ. 10 Báɔnyɛ́nya ɔma á babondigi-mɛkakɔ á ka mosá-mosá na ɔma á ko ibɛ, áojua ka kǐo á ngɔa nnde aɛnji nci á na kenombe. Kǐo ndɔ áoúkukana sasa akɛ. Báojuana, báɔsɛkɛda nci á n'aphe, mpɔ malaeka â ye tɔ on'doa.
11 Pɛ́tɛɛ aúbhaphi ye, áɔyɔnga te: «Neúbhi ye tɔ doni gea, Mɔkɔta anteki malaeka nɛkɛ ka phuia ani ka njaga á Ɛlɔ́dhɛ, na ka kanisia ájede bhui nde baYúdha bátú ně. »
12 Bii adigimisi ye gǎkɛ nyɔngɔ ndɔ, áoga mɔtɛ á Malía, amakɛ na Yoáni, mmbɔ báɔmɔphana Málikɔ. Kó, bakpa básii dábadhondanigi ka mɛma á Mokonga. 13 Cɔ, Pɛ́tɛɛ áogbondoaga kǐo á na ntanga. Mpɔ nke moci mbhɛdanigi, ina akɛ Lɔ́dha, áɔsɛkɛda ka kǐo ndɔ. 14 Bii aengekisi gea, ande ɛsɔ á Pɛ́tɛɛ, áoba na maseye. Kabondɔ, áosikianaga mbangɔ subi á endu, kanga á ukua á kǐo. Áǒúbhisa badhakɛ gea, Pɛ́tɛɛ ana nsɛngɛ. 15 Bɔ, báongea Lɔ́dha te: « Lɔ́dha, ona ganja! » Aǒsikisia te: «Nna mbɛa ani. » Báonsikisia te: «Ande bea oketi akɛ aungɔ. » 16 Pɛ́tɛɛ â tɔ osuia gbondoaga kǐo. Mpɔ, báomúkuia, báɔmɔɔna, báoyayama phɛ̂. 17 Pɛ́tɛɛ áǒdhakanisa na njaga akɛ, áɔ̌tɔmiaga bii Mɔkɔta anjuanisi ka mɛkakɔ. Â phɔtɔ ǒgea: « Múbhisani Yakɔ́bɔc na badhasu babeeki bunɛngbo nyɔngɔ ndee. » Mpɔ, áojuana, áoga ɔma nɛngbo. 18 Ka kodokana á esa, batɔ-émani báoyomboka phɛ̂. Báoúsianaga gǔ á kema nde ageani ka Pɛ́tɛɛ. 19 Ɛlɔ́dhɛ áososea gea, bánkabɛ, dábákámɔ̌ni gǎkɛ. Áoúsiaga babondigi, mbusa í, áososea gea bémoɛ. Mpɔ, Ɛlɔ́dhɛ áotoka na Yudhɛ́a, áoga na Kaisalía, áoika kó ka mbenɔ abɔa.
Mɔkɔta Ɛlɔ́dhɛ aku
20 Yɛ Ɛlɔ́dhɛ dɛ̌bɛɛi phɛ̂ batɔa ka Tílɔ na Sidhɔ́na. Kabondɔ, bɔbhu báobeekeana kimoci bhika mosá akɛ. Bâ phɔ́ oga mosá-mosá mɔtɛ á Bhalástɔ, mɔkɔta á bakpa ndea moamɛ Ɛlɔ́dhɛ, báɔɔkana na yɛ. Mpɔ, báɔmɛma bɔjɛjɛ mosá á Ɛlɔ́dhɛ. Dábagi bo ka nyɔngɔ nde, ea nɛbɔ dáotoka ka nji ndea moamɛ ndɔɔ. 21 K'esa nde dábaɔkɔani kau, Ɛlɔ́dhɛ áɔɔla ngɔmbɛ á kɔkɔta nɛkɛ, áoika ka kankaanga á kɔkɔta, áoabha mosá abɔ. 22 Bakpa bâ gǎkɛ okobisaga akpɛ gea: «Nna ye ɛsɔ á nkpa unge, a ye tɔ ɛsɔ á mɔkɔta á na kobha!d » 23 Kɛ̌kɛ ndɔ tɔ Malaeka ndea Mɔkɔta áɔm'bɛta Ɛlɔ́dhɛ na kukua á bamɔsɔ, ka nyɔngɔ á dokomisa akɛ bea Mokonga. Ɛlɔ́dhɛ áokua.