Ekuma Ndea Bateki 10

Bamɔphani Pɛ́tɛɛ mɔtɛ á Kɔɔnɛlíɔ

1 Ka Kaisalía, dátú na mǒko moci ina akɛ Kɔɔnɛlíɔ. Dátú gǎkɛ mɔkɔta á ekombo á batɔa-emani. Ina á ekombo ndɔ dátú « ekombo Italía. » 2 Yɛ na batɔa k'endu nɛkɛ bɔbhu dábatú om'banga Mokonga na bhebha akɛ. Dá phɔtɔ ogabha bangɔa nɛkɛ ka bauki na mɛma á Mokonga kanga deketa. 3 Cɔ, esa moci ka yɛga á mani ka akpaala, áɔmɔɔna malaeka ndea Mokonga bhase n'angi mɔtɛkɛ ka mphaniɔ. Malaeka ndɔ áɔmɔphana: « Kɔɔnɛlíɔ! » 4 Kɔɔnɛlíɔ áontumia n'iso, n'ana kɔbɔbɔkɔ. Aomúsia: « Mɔkɔta, ama bo? » Malaeka áonsikisia te: « Mokonga aɔki ɛmɛmi nɛkɔ na beekea á kema nde ǒgabhei bauki. Ka bondɔ, aokokanisia. 5 Cɔ, óteka bakpa kɛ̌kɛnde na Yɔ́pa, bágamɔphanɛ kakɔ Simɔ́ni mmbɔ báɔmɔphana Pɛ́tɛɛ. 6 Aiki mɔtɛ á Simɔ́ni, m'bɔngisigi kema á mpokɔ, mmbɔ endu nɛkɛ a ka mpɛphɛ á obenge. » 7 Bii Malaeka nde dáɔyɔngaga na yɛ age, Kɔɔnɛlíɔ áɔ̌ɔphana ka babhɛdanigi nɛkɛ babɛ na ntɔa-emani moci, ka bunde dábaɔbhɛdanaga bhíbhí akɛ phɛ̂ n'aom'banga Mokonga. 8 Cɔ, Kɔɔnɛlíɔ áɔ̌tɔmiaga nyɔngɔ bhui nde dágeani. Mpɔ, áǒteka na Yɔ́pa.

9 Mama í, bii bakpa nde Kɔɔnɛlíɔ déteki dábabhiimisi kenombe á Yɔ́pa, Pɛ́tɛɛ dáodapha gǔ á endu k'aphe á mɛma á Mokonga, dátú bea kantende. 10 N'aphɔ́tɔ ɔmɛma, nja áɔmbhɛda, áobá na siki á eaga. Mbenɔ nde dábaɔɔmba kakɛ ea, áɔɔna mphaniɔ. 11 Aɔɔna kobha n'akodokani. Kema moci bea ngɔmbɛ n'ǎgbae áodhidha ka odo, na báboege ɛɔkɔ i bhui gena na ngoi. 12 Subi í dátú n'etete bhui á banyama á ecinji gena na bunde báotamba n'egogo ka odo na bambǔ á ka mpɛna. 13 Mpɔ, áɔɔka ɛsɔ n'angi be: « Cɔ, Pɛ́tɛɛ, ma, ómoɛ, óeɛ. » 14 Pɛ́tɛɛ áonsikisia te: «Bɛɛndɔ Mɔkɔta. Nga, bii nɛ́bɔkɔtɛaneɛ, kéimbɛ mɔnɔ tanda ea á otáɔ n'inde áɔjɔɔkana. » 15 Â goto ɔɔka ɛsɔ ndɔ be: « Kema nde Mokonga asokosi, kogeɛmbɛ mɔnɔ ajɔɔkani. » 16 Mphaniɔ ndɔ áosikianaga mɔngɔ isaɔ. Kɛ̌kɛ ndɔ, kema ndɔ áotaia na kobha.

17 Mbusa, áoianaga ka měma akɛ kantíti á mphaniɔ nde dáɔni. N'aphɔ́tɔ oianaga, bakpa ndɔ Kɔɔnɛlíɔ déteki k'aphe á ɔphana á Simɔ́ni, báoúsianaga ɔma sina nde endu ndea Simɔ́ni dátú bei. Báju ye k'endu kau, báomamaga k'iso á mpume, 18 báɔɔphana na úsia te: « Endu nde Simɔ́ni mmbɔ báɔmɔphana Pɛ́tɛɛ aɔikaga kau aunge? » 19 Pɛ́tɛɛ na phɔ́tɔ oianaga ka phɔa mphaniɔ ndɔ, Měma á Mokonga áongea te: «Bakpa basaɔ báoani bune báokokaba. 20 Cɔ, ma, dhidha, gǎ tɔ na bɔ kanga á ngaka. Nga, eme aámbé něteki. » 21 Mpɔ, Pɛ́tɛɛ áodhidha, áojua mosá á bakpa ndɔ, áǒgea: « Eme yɛ, mmbe boonkaba. Eke nde bobhiki i? » 22 Báonsikisia te: « Moamɛ á batɔ-emani Kɔɔnɛlíɔ aámbé asóteki. Ande ntɔa-doni na mmbe áom'banga Mokonga. BaYúdha bɔbhu, bá phɔtɔ ombhebha phɛ̂. Malaeka ndea Mokonga angodi gea, ákɔɔphanɛ mɔtɛkɛ, ka ɔka nyɔngɔ nde ongodeande. » 23 Ka bondɔ, Pɛ́tɛɛ áǒsesea, báoda ko.

Mama i, báodhunga aphe, Pɛ́tɛɛ áoga na bɔ. Ka babeeki a ka Yɔ́pa, bâ phɔtɔ oga na bɔ. 24 Bâ mama i, báojua ka Kaisalía, báoga mɔtɛ á Kɔɔnɛlíɔ. Yɛ dátú ǒbondeaga kimoci n'ekombo nɛkɛ, na badhakɛ á ka měma bundɔ dɛ́ɔphani. 25 Bii Kɔɔnɛlíɔ dámɔni Pɛ́tɛɛ na báobhika mosá á endu, áojuana k'aphe á sesea akɛ. Áogbuka muanku endondo akɛ áogbondoa odo mosá á Pɛ́tɛɛ ka nyɔngɔ á dokomisa akɛ. 26 Cɔ, Pɛ́tɛɛ áommesia, áongea: « Kɔɔnɛlíɔ, má! Ne phɔtɔ nkpa bea ɔbɛ. » 27 Mpɔ, báongia k'endu na bá tɔ ɔyɔngaga. Oa, Pɛ́tɛɛ áǒdhonda bakpa básii na bákingimani. 28 Aǒngodea te: «Boúbha gea, ɛɔphi á esomba nɛsu baYúdha, aimisi ɛmbana na batɔa-k'ekuna nɛngbo phɔtɔ na ngia á kendu nɛkɛ. Mokonga dámophangi gǎkɛ gea, kakeni nɛmɔɔnɛ ka nkpa bea ntɔa-bɔjɔɔkiɔ na ótaɔ. 29 Ka nyɔngɔ indɔ unge, kétú na ngaka kabhika mbenɔ nde dɔ́bɔmɔɔphani. Nekondi phɔ́, nédigimisɛ nyɔngɔ sina nde dɔ́bɔmɔɔphanei. » 30 Kɔɔnɛlíɔ áonsikisia te: « Anyɛ́nyi esa isaɔ, bea mbenɔ nde, ka kengetana á mani, détú ɔmɛma Mokonga mɔtɛmɔ. Mɔngɔ moci, nkpa áɔmɔsɛnɛkɛa n'aɔli bhɔngɔ n'aophenuaga. 31 Áomongodea te: « Mokonga aɔki ɛmɛmi nɛkɔ, aokokanisia ka nyɔngɔ á kema nde ǒgabhei bauki. 32 Cɔ, óteka bakpa na Yɔ́pa, bága m'boɛ Simɔ́ni mmbɔ báɔmɔphana Pɛ́tɛɛ. Aiki mɔtɛ a Simɔ́ni, m'bɔngisigi kema á mpokɔ, mmbɔ endu nɛkɛ a ka mpɛphɛ á obenge. » 33 Mongɔ moci, děteki bakpa ka ɔphana akɔ. Cɔ, ogi anja ka kidia. Kɛ̌kɛnde, besu bɔbhu be ye tɔ mosá á Mokonga ka ɔka á nyɔngɔ bhui nde Mɔkɔta aoteki ně ka ngodea asu. »

Pɛ́tɛɛ aoabha mɔtɛ á Kɔɔnɛlíɔ

34 Mpɔ, Pɛ́tɛɛ áɔyɔnga be: «Neúbhi ye tɔ doni gea, Mokonga nna om'baya ka nkpa, 35 Batɔ-ekuna bhui, bunde báom'banga Mokonga na tɔtɔkisa á kodoni, bɔ báunge bám'bɔngɛi Mokonga . 36 Cɔ, Mokonga dátekisi moyo akɛ ka baIsilaɛ́li. Yéso Kiísito aámbé abhiki na moyo ndɔ, n'ande Mbino Anja á bɔjɛjɛ. Yɛ aámbé ande Mɔkɔta á bakpa bɔbhu. 37 Bo ye tɔ oúbha nyɔngɔ nde dákidiani ka Yudhɛ́a bhui, nnde dákpangi ka kenombe á Galiláia mbusa á bɔphɛi ndea Yoáni kaphɔa obatisɔ. 38 Bɔ phɔtɔ oúbha bii Mokonga dátúmisi bukpɛkpɛ á Měma akɛ ka Yéso ba Najalɛ́ti. Bɔ phɔtɔ uúbha bii Yéso dátambi ásii ka nji bhui n'aogea anja, n'aǒamisa bakpa ka měma, bunde dábatú ka kɔkɔbɛ á Nketi. Nga, Mokonga dátú kimoci na yɛ. 39 Cɔ, bende bamamei á kema nde Yéso dági ka Yɛusalɛ́ma na ka nji bhui ndea baYúdha. Dábamoe gǎkɛ, báonkɔkɛa ka me á nkpatɔ. 40 Mokonga â gǎkɛ onjujukisa yɛ ka kukua, esa á ko isaɔ. Áomopha bukpɛkpɛ á ɔnɛkana bhase, 41 nna ka bakpa bɔbhu, tɔndɔ besu íbunde Mokonga dásɔsɔmbu mosá gea, bébɛ bamamei nɛkɛ. Besu bamamei ndɔ, débeigi, béonoa kimoci na yɛ mbusa á jujuka akɛ ka kukua. 42 Dásosǒsi tɔ̌mia á Mbino Anja ka bakpa na digimisa gea, ande mmbɔ aámbé Mokonga amamisi ka tena á nyɔngɔ ndea bakpa nde baoenda na bunde básí. 43 Baɔtu-nyɔngɔ bɔbhu dában'yɔngɛi gea, nkpa bhuakɛ, mmbe aom'beekea, Mokonga áimande bojede nɛkɛ ka bukpɛkpɛ a ína á Yéso. »

Měma á mokonga aki gǔ á bakpa nde báná baYúdha

44 Pɛ́tɛɛ n'aphɔ́tɔ ɔyɔnga, Měma á Mokonga áodhidha gǔ á bakpa bɔbhu bunde dábaɔɔka nyɔngɔ nɛkɛ. 45 Babeeki bunde bande baYúdha bundɔ dábabhiki na Pɛ́tɛɛ, báotangaaga ka bii Měma á Mokonga nnde Mokonga dátekisi, dáɛmbi phɔtɔ ka bakpa nde báná baYúdha. 46 Nga, dábɛ̌ɔki na báombhebha Mokonga ka yɔngɛa nengbo. Mpɔ, Pɛ́tɛɛ áogea, 47 « Ani mmbe aɔtɔka n'aimisii ye ébatisa á bakpa nde k'ibɔ, bii dá ba ye tɔ na Měma á Mokonga bea besu? » 48 Ka bondɔ, áǒsosea gea bébatisɛ k'ina á Yéso Kiísito. Mbusa á batisa abɔ, báon'dengemisaga Pɛ́tɛɛ gea, áikɛ phɔ́ na bɔ k'esa babhɔa.