Ekuma Ndea Bateki 9

Saúlɔ am'beeki Yéso

1 Ka matu ndɔ, Saúlɔ dásui bangisa na moa á bagoigi ndea Mɔkɔta. Aɔngɛndɛa ntobei-phɛa angbóngbó 2 áɔmmɛma baobá́ á ngiai ně k'endu á bɔphɛi ndea baYúdha á ka Dhamasíki, ka gea, aobá́ nědhondi bǒko na bake, bunde báotamba k'aphe ndea Yéso, édhungɛ, éboɛgɛ, égɛ n'abɔ na Yɛusalɛ́ma. 3 N'a phɔ́tɔ k'aphe bhíbhí á nji ndɔ, mɔngɔ moci oanga áotoka na kobha, áonkomba, njuaa! 4 Saúlɔ áogua ka odo gbu! áɔɔka ɛsɔ n'aongea: « Saúlɔ, Saúlɔ, eke nde oomotambisaga kau ně? » 5 Yɛ áomuisia te: « Mɔkɔta, onde ani? » Mɔkɔta áonsikisia te: «Nende Yéso, mmbɔ oontambisaga. 6 Cɔ, má, ógɛ ka kenombe á Dhamasíki. Kó, báongodeande kema nde akeni ógeɛ u. » 7 Bakpa bunde dábatambi na Saúlɔ, báomama, báodheeba, báobanga phɛ̂. Dábaɔki ɛsɔ, bákamɔɔnɛ gǎkɛ nkpa. 8 Cɔ, Saúlɔ áoma, áokoda iso, kaɔnaphɛ ye. Mpɔ, báondhunga Saúlɔ ka njaga, báontámbisaga, báoga ojua ka Dhamasíki . 9 Sáulɔ́ dáiki k'esa isaɔ, kanga ɔnapha, kanga á eaga na noa á ibo.

10 Cɔ, ngoigi moci dátú ka Dhamasíki , ina akɛ Ananía. Kó, Mɔkɔta Yéso áonkidianea ka mphaniɔ, áɔmɔphana: « Ananía! » Ananía áobeekea: « Mɔkɔta, eme yɛ. » 11 Mɔkɔta áongodea: « Ma,ógɛ k'aphe nde báɔɔphana Écuma-dhɛ, mɔtɛ á Yúdha.Oa, ónkabɛ nkpa moci, ina akɛ Saúlɔ ntɔa ka Táasɔ. Nga, yɛ aɔmɛma Mokonga. 12 Ande gea te amɔ̌ni nkpa moci ka mphaniɔ. Nkpa ndɔ báɔmɔphana Ananía, dángi k'endu moci, áobhisa njaga gǔ akɛ ka gea áɔnaphɛ goto. » 13 Ananía áonsikisia te: « Mɔkɔta, bakpa básii bámɔtɔ̌migi nyɔngɔ á nkpa ndɔ na bojede bhui nde dégii babeeki nɛkɔ, bundɔ bá ka Yɛusalɛ́ma. 14 Bakɔta á batobei-phɛa ndea Mokonga, bámɔphi kɔkɔta ka bhika dhunga á bakpa bɔbhu bunde báɔmɛma Mokonga k'ina akɔ. » 15 Mɔkɔta â gǎkɛ ongodea te: « Ga tɔndɔ nga, nɛnsɔmbu ye nkpa ndɔ. Nɛmɔphani, ábɛ mbhɛdanigi nɛmɔ ka úbhisa ina ani k'ekuna bhui na baamɛ nɛbɔ, na baIsilaɛ́li phɔtɔ. 16 Eme gǎkɛ, nemphangiande tambisaga bhui nde bángeeande ně ka nyɔngɔ ani. » 17 Mpɔ, Ananía áoga. Akidi ye k'endu, áobhisa njaga gǔ á Saúlɔ, áongea te: « Saúlɔ dhani, Mɔkɔta Yéso, mmbɔ aokidianeima k'aphe bii otúma obhika, amoteki mɔtɛkɔ gea, ɔ́ɔnaphɛ goto, Měma á Mokonga átumɛ phɔtɔ subi akɔ. » 18 Mɔngɔ moci, kema bea kpase áojuana k'iso á Saúlɔ, áogua. Yɛ, â goto ɔɔnapha. Mpɔ, áoma, áoga k'aphe á batisa akɛ. 19 Mbusa, áoeaga. Nyama akɛ â goto ogbaga.

Saúlɔ aɔphɛa nyɔngɔ á Mokonga ka Dhamasíki

Saúlɔ dáiki esa abhɔa kimoci na bagoigi bundɔ dábatú ka Dhamasíki. 20 kɛ̌kɛ ndɔ, áɔtɔmiaga k'endu á bɔphɛi gea, Yéso ande Muna-Mokonga. 21 Bakpa bɔbhu bundɔ bámɔɔki, báoianaga phɛ̂, báɔyɔngaga sɔsɔbɛ abɔ te: «Nna phɔ́ nkpa nde aámbé dátú ootambisaga bakpa nde dábaɔmɛmaga Mokonga k'ina á Yéso? Kákidi phɔ́ oani ka dhunga á babeeki na gǎ na bɔ na Yɛusalɛ́ma mosá á batobei-phɛa bangbóngbó ? » 22 Cɔ, bɔphɛi ndea Saúlɔ áonyanga phɛ̂. BaYúdha bunde á ka Dhamasíki, dábáká ye na nyɔngɔ nde báonsikisia bii déphangisi gea, Yéso ande Kiísito.

23 Mbusa esa ásii, baYúdha bâ ndiu ɔɔkana gea, bámoɛ. 24 Saúlɔ ǎ gǎkɛ ɔɔka maca ndɔ. Bɔ́, dábaom'bondeaga ka ngba á kenombe keiphe n'esa gea bámoɛ. 25 Mpɔ bagoigi nɛkɛ báɔmbhɛda kǐpha, báomakea subi á jɔ, báodhidhisa jɔ ndɔ ka nsinɔ, bhâ-bogaɔ á kenombe ndɔ. Mpɔ, Saúlɔ áokia, áoga nɛkɛ.

Saúlɔ aobhedanaga ka Yɛusalɛ́ma

26 Aju ye ka yɛusalɛ́ma, áokengea dhondana na bagoigi. Bagoigi bɔbhu, bâ gǎkɛ om'banga ka nyɔngɔ nde, dábatú na ngaka gea, ande ngoigi doni. 27 Bhaanábha â gǎkɛ ɔmbhɛda Saúlɔ, áonga ně mosá á bateki. Âɔɔtɔmiaga etete á bii Saúlɔ dámɔɔni Mɔkɔta Yéso k'aphe, na bii dáyɔngi na yɛ. Â phɔtɔ ɔ̌tɔmiaga etete á bii Saúlɔ dáɔphɛa k'ina á Yéso ka Dhamasíki kanga ngaka. 28 Mbusa á bii bateki bám'beeki ye, Saúlɔ áoika na bɔ. Dáoga na áoja na Yɛusalɛ́ma, dáɔphɛa k'ina á Mɔkɔta Yéso kanga ngaka. 29 Â phɔtɔ ɔyɔngaga na pua na baYúdha, bundɔ báɔyɔnga kiGiíki. BaYúdha ndɔ bâ gǎkɛ okaba moa akɛ. 30 Mbenɔ nde badhakɛ babeeki báɔki maca ndɔ, báɔmbhɛda Saúlɔ, báondhidha ně na Kaisalía. Mpɔ báonteka na Táasɔ.

31 Ka matu ndɔ, batɔa-kanisa dábatú na bɔjɛjɛ subi á Yudhɛ́a bhui, Galiláia, na Samalía. Báɔmɔta ka měma na banga á Mɔkɔta, Měma á Mokonga áǒbikisa phɛ̂.

Pɛ́tɛɛ anamisi Ainɛ́a

32 Ka matu ndɔ, Pɛ́tɛɛ dáotamba ka ɛnjia á babeeki á ka nji ndɔ bhui. Esa moci, â phɔtɔ oga na Lúdha, k'aphe á ɔna ábabeeki bunde dábaiki oa. 33 Kó, áondhonda nkpa moci n'ana ngobho á phɛphisa a nyama, ina akɛ Ainɛ́a. Nkpa ndɔ dáde k'eka ka basaga ngia á njaga isaɔ (8). 34 Pɛ́tɛɛ áongea te: « Ainɛ́a, Yéso Kiísito akoamisi. Cɔ, ma! Ɔ́bɔngisɛgɛ eka nɛkɔ. » Kɛ̌kɛ ndɔ, Ainɛ́a áoma. 35 Bii batɔa ka Lúdha na batɔa ka-Salɔ́ni bɔbhu bámɔ̌ni ye naami, báom'beekea Mɔkɔta.

Pɛ́tɛɛ anjujukisi Tabíta ka kukua

36 Nke ngoigi moci dáoikaga ka Yɔ́pa, ina akɛ Tabíta mmbé báɔmɔphana «Dhɔlíka», ka kiGiíki ande gea te: «ncɔcɔdɛ». Dáogea ekuma anjanja, na gabhea á bauki.

37 Ka matu ndɔ gǎkɛ, áosamba, áokua. Mpɔ, báosokosa mǒnda akɛ, báobhisa subi éndu á tɔ, nnde a k'ego. 38 Bagoigi á ka Yɔ́pa dábaɔki gǎkɛ gea, Pɛ́tɛɛ a ka Lúdha, bhíbhí na Yɔpa. Ka bondɔ, báǒteka bakpa babɛ na mbino gea: « Kamisaga bhika mɔtɛsu. » 39 Pɛ́tɛɛ áokamisaga gǎ kimoci na bɔ. Ai bii aju, báonga ně subi á endu nndɔ a k'ego. Bake á k'ekusa báonsesea Pɛ́tɛɛ na báogama, báɔmɔ̌nisa Pɛ́tɛɛ nkanjo na bhɔngɔ bhui nde Dhɔlíka déphophei na kákumbɛ. 40 Cɔ, Pɛ́tɛɛ áǒjuanisa bakpa bɔbhu, áogbuka muanku ka mɛma á Mokonga. Mbusa, áǒphaia ka mǒnda, áogeae: «Tabíta má! » Tabíta áokoda iso. Amɔ̌ni ye Pɛ́tɛɛ, áǒmesia. 41 Pɛ́tɛɛ áondhunga ka njaga, áonenga ka mesia akɛ. Mpɔ, áɔ̌ɔphana babeeki na bake á k'ekusa bɔbhu, áɔ̌ɔnisa Tabíta n'aoenda. 42 Nyɔngɔ ndɔ áoúbhikana ka Yɔ́pa bhui. Ka bondɔ, bakpa básii báombeekea Mɔkɔta. 43 Mbusa, Pɛ́tɛɛ áoika k'esa ásii ka Yɔ́pa mɔtɛ á Simɔ́ni, m'bɔngisigi kema á mpokɔ.