Banga óbhebhɔ mosa á bakpa
6
1 «Ɔɛnjiani, bókogeɛ mɔnɔ kema anja mosa á bakpa gea, bánobhebhɛ. Boyéogea bo, Mokonga kánophendɛku. 2 Ka bondɔ, mbenɔ nde oomopha muki kema, kɔbɛtɛ mɔnɔ ende gea bakpa bákobhebhɛ ka botea íso á bakpa bíndɔ bamɔ̌nɛka báogea k'aphe ka ntanga á nji, na k'endu á bɔphɛi. Nenóngodi doni gea, bundɔ báogea bo, ophendɔ nɛbɔ ande obhebhɔ á bakpa ndɔ. 3 Obɛ gǎkɛ, aobá́ nokondi opha á muki bangɔa, mopha ka bɔsɔmɛa, dhakɔ kaubhɛmbɛ. 4 Mbusai, abhakɔ mmbɔ aɔɔna kema ndɔ ogi ka bɔsɔmɛa, akophendande. »Goaga á ɛmɛmi
(Ɔna phɔtɔ Lóka 11.2-4)
5 «Mbenɔ nde bɔɔmɛma, bókobɛmbɛ mɔnɔ bea batɔa-bemboko. Báomama k'aphe k'ɛmɛmi ka ntanga á nji na k'endu á bɔphɛi. Nga, bákondi bakpa bɛ́ɔnɛ, na bébhebhɛ mbenɔ nde báɔmɛma. Nenógie, ophendɔ nɛbɔ ande obhebhɔ á bakpa ndɔ. 6 Obɛ gǎkɛ, aobá́ nokondi mɛma, ngia subi éndu nɛkɔ, óphatiɛ kio, ɔ́mɛmɛ abhakɔ Mokonga mmbe a ko. Mbusai, abhakɔ mmbɔ aɔɔna kema ndɔ ogi ka bɔsɔmɛa, akɔɔkande.»
7 «Mbenɔ nde bɔɔmɛma, bɔ́kɔyɔngɛ mɔnɔ nyɔngɔ asi na nna na kantiti bea baPaganɔ. Nga, báokanisia te, Mokonga ɛ̌̀bɔkande aobá́ nabáyɔngi asi. 8 Bókǒkengeɛ mɔnɔ, ka nyɔngɔ nde abhanu auubha siki nɛnu mosa ɛ́mɛmi. 9 Cɔ, mɛmani ndiu be:
Abhasu, obɛ imbe ona kobha,
ambe bádokomisɛ ina akɔ phɛ̂.
10 Ambe koboamɛ nɛkɔ ábhikɛ.
Ambe mɔphɛ nɛkɔ átɔtɔkɛanɛ ka mokonda bíndɔ a na kobha.
11 Osopha eea nnde akeni ka besu k'esa nde.
12 Íma bojede nɛsu, bíndɔ besu be phɔtɔ oíma ka bundɔ básogiii bojede.
13 Kosódeketɛmbɛ ka mbenɔ á tombaga, ósoamisa ndiu na Ntombigi.
[ Nga koboamɛ, bukpɛkpɛ na boombia ande akɔ ka saga na saga. Ábɛ bóa.] 14 Nga, aobá́ n'obosei bojede ndea bakpa ka nyɔngɔ nde bákogi ajede, abhakɔ Mokonga aboseande phɔtɔ bojede nɛkɔ. 15 Aoba nokóbosei bojede ndea bakpa bundɔ bákogi ajede, abhakɔ Mokonga káboseɛku bojede nɛkɔ.»
16 «Aoba nobogini eea k'ina á Mokonga, bókophindɛ mɔnɔ nkiki bea batɔa-bemboko. Nga, batɔ-ódhemayɔ bátɔogea bo. Báophinda kiki gea bakpa bɔbhu báubhɛ gea bágini eea k'ina á Mokonga. Nenóngodi doni gea, bundɔ báogea bo, ophendɔ nɛbɔ a tɔndɔ obhebhɔ á bakpa. 17-18 Cɔ, obɛ gǎkɛ, oogina eea k'ina á Mokonga, bakpa bákaubhɛmbɛ. Akeni ósokosɛ iso akɔ, goto, ɔ́bɔngisiɛgɛ sikamɔ akɔ. Abhakɔ Mokonga, mmbɔ aɔɔna kema bhubhui, auubha kema anja ndɔ ogi ka bɔsɔmɛa, akophendande.»
Bakɔta babɛ
19 «Bókobhisɛ mɔnɔ nkumba nɛnu ka mokonda, nga, bansɛngɛ na baankɛngɛɔ báujande. Goto bakukuba báobuna endu, báuuba nkumba ndɔ. 20 Bhisani ndiu nkumba nɛnu na kobha, kubii bansɛngɛ na baankɛngɛɔ bákaujɛku. Goto, bakukuba bákáubɛku. 21 Nga, oobhisa nkumba nɛkɔ ka mokonda, mɔphɛ akɔ ába tɔ ka mokonda. A gǎkɛ oba nobhisi nkumba nɛkɔ na kobha, mɔphɛ akɔ ába tɔ na kobha.»
22 «Iso, ande ɔbhɛa á ka nyama: aobá́ iso akɔ na anja, óotamba anja. 23 Cɔ, aobá́ iso akɔ na ajede, óotamba ka kindi. Aoba ɔbhɛa ndɔ a subi á měma akɔ naimiki, ande kindi angbo phɛ̂.»
24 «Nna na nkpa nde aɔtɔka bhɛdaneaga á bakɔta babɛ. Nga, ankondande moti áonkangea moti. Amɔkande moti, áonya moti. Kɔ́ɔtɔka bhɛdaneaga á Mokonga na bhɛdaneaga á Imɔna mɔngɔ moti.»
Mbhɛdaneaga tɔ Mokonga
25 «Bókoianeɛgɛ mɔnɔ gea te, ‹Beeande eke? Benoande eke? Bɛɔlande eke?› Cɔ, enda anu kányɛnyi phɔ eea? Nyama anu kányɛnyi phɔ ngɔmbɛ? Eya, anyɛnyi.»
26 «Engani phɔ bambu ka mpɛna. Bánaogubha, bánaodungua, bánaobhisa eea k'egbongbo. Abhanu, mmbe a na kobha a ndiu gǎkɛ kǒisa. Cɔ, benu bakpa, bɔ́kɔ́nyɛnyi phɔ? Ka bondɔ, abhanu kánoboseɛku. 27 Ka benu moti sina mbe aɔtɔka nasɛkɛdisi esa nde Mokonga dámophi?»
28 «Nyɔngɔ sina nde bo goto ɔkɔbɛa nyɔngɔ á ngɔmbɛ? Engani phɔ kasa nɛ̌̀tɔndi bea matɔkɔ. Nnaɔbhɛdanaga, nnaophopha ngɔmbɛ. 29 Něnongodie, moamɛ Sɔɔmɔ́na dátú ntɔi phɛ̂, dáɔ̌tɔnda phɛ̂. Dákáɔli gǎkɛ ngɔmbɛ ɛ́tɔndi bea maya ndɔ. 30 Mokonga aɔtɔnda kasa á ka ciko, mamai báomaka k'oanga. Benu batɔa-beekea-abhɔa, Mokonga kánɔtɔndɛku anja phɛ̂?»
31 «Ka bondɔ, bókotambeɛ mɔnɔ, bógeae: ‹Beeande eke? Benoande eke? Bɛɔlande eke?› 32 Bapaganɔ ba unge báokabaga kema ndɔ esa bhubhui. Abhanu, mmbe a na kobha auubha kema bhubhui nde bo na sikii. 33 Kabani phɔ koboamɛ ndea Mokonga mosa na kema nde akondi. Mbusa, anóphande kema bhubhui nde anójiganei. 34 Bókotambeɛ mɔnɔ kema ndea mama. Kema ndea mama, akeni tɔ ka mama. Nyɔngɔ ndea k'esa nde, akeni tɔ gǎkɛ ka k'esa.»