Bagoigi á doni, bábande bo?
5
1 Bii bakpa ba asi dábaombea Yéso, áodapha gu á mamba, áoika ka ntɔngai ka phɛa abɔ. Bii bagoigi nɛkɛ bántimbi ye, 2 áǒgoisaga be:3 Maseye ka bundɔ báoianaga bojede ka měma abɔ, ka nyɔngɔ nde koboamɛ ndea Mokonga ande abɔ.
4 Maseye ka batɔ-óiɔ, ka nyɔngɔ nde Mokonga ɛ̌̀tɛbhisande.
5 Maseye ka batɔ-aphɔngɔ, ka nyɔngɔ nde báeande nji ndɔ Mokonga ɛ̌̀ɔku.
6 Maseye ka bundɔ bá na siki a gea kema ndɔ Mokonga akondi, ka nyɔngɔ nde ěophande bukpɛkpɛ á tɔtɔkisa ékondi nɛbɔ.
7 Maseye ka bundɔ báǒkuia badhabɔ ngomi, ka nyɔngɔ nde Mokonga ěkuiande phɔ tɔ ngomi.
8 Maseye ka batɔa-měma anja, ka nyɔngɔ nde bámɔ̌nande Mokonga.
9 Maseye ka baɔnganisi, ka nyɔngɔ nde Mokonga ɛ̌̀ɔphanande banakɛ.
10 Maseye ka bundɔ bakpa báǒtambisaga ka nyɔngɔ nde báogea bíndɔ Mokonga akondi, nga, koboamɛ ndea Mokonga, ande abɔ.
11 «Maseye ka benu, mbenɔ nde báonóbhoma, báonótambisaga, báonógeea ajede na yɔngɛa anu mbɛa, bíndɔ dáběgii baɔtu-nyɔngɔ á kala, ka nyɔngɔ nde bonde bagoigi nɛmɔ. 12 Bani na maseye, bónjokoɛ, ka nyɔngɔ nde bokambia nɛnu a angbo na kobha.»
Tambea anu, ábe anja
13 «Bo bea mɔnɛi ka bakpa. Cɔ, aobá́ mɔnɛi na nna aɛkɛ, osikisande goto bɔɛkɛi bo? Aoboboa. A ye tɔ boai, óomaka ka nsɛngɛ, bakpa báɔdɛtɛaga.»
14 «Bani na boombia bea nji nabáphɛki gu á mamba. Nji ndɔ nnaɔtɔka nɛ̌̀sɔmɛani. Ka bondɔ, bɔ́kɔ́ɔtɔka na bɔsɔmi tambea anu mosa á bakpa.»
15 «Nna na nkpa nde aotoboa ɔbhɛa nɛkɛ, áobhisa kusi a mbungu. A ndiu obhisa k'ego gea bakpa báɔnapheɛ subi éndu. 16 Ka bondɔ, ye phɔ bakpa báɔnɛ tambea anu na anja. Mpɔ bámbhebhɛ abhanu mmbɔ a na kobha.»
Dokomisa ɛ́ɔphi á kala
17 «Bókokanisiɛmbɛ gea nebhiki ɔngbɔa ɛɔphi ndea Mósa na bɔphɛi ndea baɔtu-nyɔngɔ. Kébhiki k'aphe á ngbɔai. Nebhiki ndiu k'aphe á kpeengeanisai. 18 Nenóngodi doni gea te, mosa-mosa á sungiaga á kobha na mokonda, miki á nyɔngɔ abhɔa moti káimikɛku ka buku ɛ́ɔphi na ka bii nyɔngɔ bhui atɔtɔkɛanande. 19 Cɔ, nkpa nde aɔngbɔa ɛɔphi moti nde a subi á buku á Mokonga, nanga na abhɔa, na phɛa á badhakɛ gea bábeɛ ɛsɔ akɛ, abande ntɔa-jai-jai ka koboamɛ ndea Mokonga. Nkpa nde a gǎkɛ obeekea ɛɔphi, na goisaga badhakɛ gea bábeɛ, abande na boombia ka koboamɛ ndea Mokonga.»
20 «Nenógie, akeni tambea anu ányɛnyɛ tambea á baPhaisáiɔ. Kanga á bo, bókongiɛku ka koboamɛ ndea Mokonga.»
Deketa á bojede bhubhui sɔsɔbɛ akɔ na dhakɔ
21 «Bɔɔki gea, dáběngodi batatasu te: ‹Bókomoɛmbɛ nkpa. Nkpa nde aomoa dhakɛ, bánjusande ka keboka.› 22 Cɔ, eme nenóngodi gǎkɛ be: Nkpa nde aɔmbɛɛa dhakɛ, akeni bánjusɛ ka ntua á tena a nyɔngɔ. Mmbe aombhoma dhakɛ, bánjusande ka ntua angbo. Mmbe aongea dhakɛ te: ‹O na ganja!› akeni bámakeɛ k'oanga á nsa.»
23 «A gǎkɛ oba nobhiki na sadaka nɛkɔ ka Mokonga, aobá́ nokanisi te, dhakɔ a na nyɔngɔ nobɛ, 24 deketa phɔ sadaka nɛkɔ ka njaga a ngbɛga moti k'endu á Mokonga, ógɛ ɔ́bɔngisiɛgɛ nyɔngɔ nɛkɔ na dhakɔ. Mpɔ ósikianɛgɛ goto k'endu á Mokonga, ɔ́bhɛdɛ sadaka ndɔ, ómophɛ Mokonga.»
25 «Aoba nkpa nakondi ákɔtɔngɛ, beekea, ógɛ na yɛ ka ntua á tena a nyɔngɔ. Ɔkanani phɔ mosa na yɛ nɔbɔ phɔtɔ k'aphe gea, ntɔngi nɛkɔ kakokidianisɛmbɛ mosa á nteni-nyɔngɔ, nteni nyɔngɔ ndɔ kakobhisɛ ka njaga á nengi-ntua, nengi-ntua ndɔ kakomakeɛ mɔnɔ gǎkɛ ka mekakɔ. 26 Nekongodie, kótokɛku ko nokophendi ngɔa bhui nde ajigi k'ophendɔ.»
Deketa ótungɔ
27 «Bɔɔki gea, dáběngodi batatasu te: ‹Kotunganɛmbɛ mɔnɔ.› 28 Eme nenóngodi gǎkɛ te: Nkpa nde aɔmɔnjia nka-dhakɛ n'iso ótungɔ, agɔbi ye natungani na yɛ ka měma.»
29 «Aoba no n'iso ótungɔ, iso á bojede bhui, ambe óphongotɛ, ómakɛ danga nobɛ. Akeni óbɛ ndɔti, kanga á makea á nyama akɔ bhui k'oanga á nsa. 30 Aoba njaga akɔ naokobotaga ga k'aphe á bojede, tena ómakɛ danga nobɛ. Akeni óbɛ ndɔti kanga á makea nyama akɔ bhui k'oanga á nsa.»
31 «Dáběngodi goto batatasu gea: ‹Nkpa nde aonya nkakɛ, akeni ámophɛ nke ndɔ kasa á keye.› 32 Cɔ, eme nenóngodi gǎkɛ te, aobá́ nkpa nanye nkakɛ jai-jai na nna ka nyɔngɔ ótungɔ, antunganisi ye tɔ, aobá́ naɔmani goto. Nkpa nde a goto omboa nke ndɔ bánye ndɔ, atungani phɔtɔ bo.»
Bɔphɛi gu á ɔpha á nyɔngɔ
33 «Bɔɔki goto gea dáběngodi batatasu te: ‹Bɔ́kɔɔphɛ mɔnɔ mbɛa mosa á Mokonga. Tɔtɔkisia ndiu ɛɔphi nɛkɔ nndɔ dɔ́ɔphi.› 34 Eme nenóngodi gǎkɛ te: kɔɔphɛmbɛ. Kɔɔphɛ mɔnɔ k'ina á kobha. Nga, kobha ande kakaanga á koboamɛ ndea Mokonga. 35 Tanda ka mokonda, nga, ande ɔma á bhisa ecinji akɛ. Tanda ka Yɛusalɛ́ma, nga, ande nji ndea moamɛ angbongbo Mokonga. 36 Kɔ̌yɔphisanɛgɛ mɔnɔ sasa akɔ. Nga, kɔ́ɔtɔka noketi sikamɔ akɔ naindi ábɛ bhusu. 37 Aoba nobeeki, beekea tɔ doni. A gǎkɛ oba nongani, ngana tɔ doni. Nga, nyɔngɔ ɛ́ɔphi ndɔ bhubhui aotoka ka Ndhemigi.»
Bɔphɛi gu á gisia
38 «Bɔɔki gea dáběngodi batatasu te: ‹Dhakɔ aobhoma iso akɔ, óobhoma nɛkɛ. Aotena minyɔ akɔ, óotena nɛkɛ.› 39 Eme nenóngodi gǎkɛ te: nkpa aokogeea ajede, kogisiɛ mɔnɔ. Aoba nakɔbɛti gǎkɛ ka ngaga á njaga á muku, óphaia goto áɔbɛtɛ ka ngaga á njaga á nkei. 40 Aoba nkpa naɔtɔngi mosa á bateni-nyɔngɔ ka uta akɔ ngɔmbɛ á k'egogo, ndeketea ngɔmbɛ ndɔ, óndeketeɛ goto ngɔmbɛ nɛkɔ á phiɔ. 41 Aoba mɔkɔta nakososi kumba á nkumba nɛkɛ, óndeketeɛ ka nji moti, akeni ókumbɛ nkumba ndɔ. Aoba mɔkɔta ndɔ na phɔtɔ otamba, phoda nji ndɔ, ɔ́sɛkɛdɛ ka nji nɛngbo, óndeketeɛ nkumba ndɔ ko. 42 Aoba nkpa nakɔmɛmi kema, mopha. Aoba nakondi ɔ́nɛkisɛ, kɔnkpɛmɛɛmbɛ.»
43 «Bɔɔki goto gea dáběngodi batatasu te: ‹Nkonda dhakɔ, ónkangeɛ ndiu mbibia nɛkɔ.› 44 Eme nenóngodi gǎkɛ te: ókondani babibia nɛnu, bɔ́mɛmɛ ndiu Mokonga ka bundɔ báonótambisaga. 45 Aoba nobogi bo, bobande bana-Mokonga mmbɔ a na kobha. Nga, yɛ aɔbɛtisa mani na ɔkisa mbua ka ciko ndea bakpa ba anja na bakpa ba ajede. 46 Aoba nabǒkondi tɔ bundɔ báonókonda, boobondea ophendɔ ka Mokonga ka bo? Bakpa ba ajede bea baphendisigi-manjanja, bá phɔtɔ ogea bo. 47 Aoba nobo tɔ ǒsesea banamanu, kema anja sina nde boogea? Bundɔ bánaomǔbha Mokonga, bá phɔtɔ ogea bo. 48 Nenóngodie, bani batɔa-doni phɛ̂, bíndɔ abhanu mmbe a na kobha ande ntɔa-doni.»