Yéso atɔki odhemayɔ
4
1 Mbusa á batisa á Yéso, Měma á Mokonga áonanga ga k'osaa danga. Ndhemigi áontombaga ko bende:2 Yéso áoda esa nkama gena, sua mani na keiphe kanga á eaga. Oa, nja áɔmbhɛda. 3 Ka bondɔ, Ndhemigi áɔnsɛkɛdɛa Yéso, áongodea te: «Aoba nonde Muna-Mokonga doni, gaia phɔ ɛtɛ nde, ábɛ mbondo.»
4 Yéso áonsikisia te: «Be ndiu otanga subi á buku á Mokonga te:
Nkpa nnaoenda ka eaga tɔ. A ndiu ka beekea a nyɔngɔ á Mokonga.»
5 Mbusa, Ndhemigi áɔmɛɛa mosa na Yɛusalɛ́ma, nji ndea Mokonga. Aondaphisa Yéso bhǎ-kijɔ éndu ndɔ. 6 Aongodea Yéso te: «Aoba nonde Muna-Mokonga doni, ócicima phɔ ka odo. Nga, beotanga subi á buku á Mokonga te:
Mokonga ětekande bamalaeka nɛkɛ, bákoambɛ ka bangisa akɔ bunuka mbenɔ nde ɔɔbɛtɛkana.»
7 Mpɔ Yéso áonsikisia te: «Caa moko! beotanga goto subi á buku á Mokonga gea:
Kontombɛgɛ mɔnɔ Mɔkɔta nɛkɔ Mokonga.»
8 Mbusa, Ndhemigi áɔmɛɛa mosa, áondaphisa Yéso ka ntɔnga mamba angbongbo. Aɔmɔ̌nisa koboamɛ danga-danga, nndɔ aɔni ka mamba ndɔ. Koboamɛ ndɔ na na boombia angbo phɛ̂. 9 Ndhemigi áongodea Yéso te: «Nekophande koboamɛ á ka mokonda bhubhui, aobá́ nogbuki tɔ muanku akɔ mosa ani.»
10 Mpɔ Yéso áongeae: «Toka oa, Sɛtáni Moamɛ-Odhemayɔ nde ca! Nga, beotanga ka buku á Mokonga gea:
Ntendemisa Mokonga na bhɛdaneaga akɛ sasa akɛ.»
11 Mpɔ Ndhemigi áonsaga. Bamalaeka báombhikia, báɔmbhɛdaneaga.
Bɔphɛi ndea Yéso, a bea kodokana á mani subi á měma a bakpa
12 Dábandhungi Yoáni-Mbatisi. Bii Yéso aɔki bo, áoja na Nasalɛ́ti á ka Galiláia. 13 Mpɔ áoga na Kapɛɛnaúmu. Nji ndɔ dátú mpɛphɛ á Galiláia. Dáotamba k'ɔma ndɔ batɔa ka Jabulɔ́ni na batɔa ka Naphutái, ekombo ibɛ á kala ndea baIsilaɛ́li, dábaiki. 14 Cɔ, ngia á Yéso ka nji ndɔ áɔtɔtɔkɛanisa nyɔngɔ nde mɔtu-nyɔngɔ Isáia dáyɔngi:
15 Batɔa ka Jabulɔ́ni na batɔa ka Naphutái kubhi a Yɔɔdháni, bundɔ bánde bakɛni ka Galiláia.
16 Dábatambi ka keiphe ka nyɔngɔ nde dábákáuubha nyɔngɔ á Mokonga. Kɛ̌kɛ nde gǎkɛ, báɔni oanga angbo.
Bundɔ báotamba ka keiphe á kukua á měma, báɔni kidia á nyɔngɔ á Mokonga bea kodokana á mani.
17 Mbusa, Yéso áɔ̌phɛa bakpa be: «Sagani bojede nɛnu bhui, nga, koboamɛ ndea Mokonga a bhibhi.»
Yéso ɛ̌̀ɔphani bakpa, báobeekea
18 Yéso dátú otambaga kubhi á Galiláia bhibhi na Kapenaúmu. Aɔ̌bɔna batɔ-éphenga babɛ nabáophenga na moabɔ ka koko. Ina abɔ dátú Semó, mmbɔ báɔmɔphana Pɛ́tɛɛ, na munamakɛ Andeé. 19 Yéso áɔ̌ɔphana: «Omobeani. Nenóketiande, bóbɛ baphengi á bakpa.»
20 Kɛ̌kɛ ndɔ, báosaga moabɔ nɛbɔ, báombea. 21 Yéso áɔsɛkɛda mosa, áǒdhonda goto bakpa babɛ. Yakɔ́bɔ muna-Jɛbhɛdháiɔ na munamakɛ Yoáni. Dábatú ka koko kimoti n'abhabɔ Jɛbhɛdháiɔ nabáɔbɔngisiaga moabɔ nɛbɔ. Yéso áɔ̌bɔphana. 22 Kɛkɛ ndɔ, báodeketa koko, n'abhabɔ, báombea.
Ekuma ndea Yéso
23 Yéso dátambigi ka Galiláia. Aǒgoisaga bakpa subi endu á bɔphɛi ndea Mokonga. Aophanja nyɔngɔ anja á koboamɛ ndea Mokonga. Mbenɔ angbo, áǒamisa batɔ-ésambɔ danga-danga. 24 Esambɔ ndɔ dátú bea: kukua á bansombo, ega, kidɔti écinji na njaga.
Boombia akɛ áɔɔkɛkana ka Sulía bhui. Báombhikia na batɔa-ngobho, áǒamisa bɔbhu.
25 Bakpa ba asi dábaombea. Dábatoki gǎkɛ ka nji nde: Galiláia, Yɛusalɛ́ma, Yudhɛ́a, Nji-Nkama, na kubhi á Yɔɔdháni.