Tena á nyɔngɔ ka měma
7
1 «Konteneɛ mɔnɔ nkpa nyɔngɔ ajede ka měma, ka gea Mokonga kaoteneɛ mɔnɔ phɔtɔ nyɔngɔ ajede. 2 Nga nnde oteni, a unge Mokonga aoteneaeka. Ɛɔphi ndɔ ɔmɔphisi na dhakɔ, a unge Mokonga akɔɔphisaeka phɔtɔ ne. 3 Eke nde ɔɔɔna gbɛɛkɛsɛ ndɔ a k'iso á dhakɔ, nɔkɔ́ɔɔna gbutuka a me ndɔ a k'iso akɔ? 4 Eke nde oongodea dhakɔ: ‹Nékophuiɛ gbɛɛkɛsɛ k'iso›, no na gbutuka a me k'iso akɔ? 5 Ntɔa-maibhe nde ca! Tokisa phɔ gbutuka a me ndɔ a k'iso akɔ. Mpɔ ómphuiɛ dhakɔ gbɛɛkɛsɛ nɛkɛ.»6 «Kǒophɛ mɔnɔ bambɔa bɔnɛnɛ ndea Mokonga. Nga, báingitanande, báokokoka. Komakɛ mɔnɔ nsanga ésombi akpɛ mosa á bangɛa, ka gea bákadɛtɛgɛmbɛ.»
Bɔphɛi gu ɛ́mɛmi
7 «Mɛmani kema ka Mokonga, anóphande. Kabani kema ka Mokonga, bɔɔnande. Gbondoaga kio, Mokonga akuukuiande. 8 Nga, mmbe aɔmɛma kema, Mokonga amophande. Mmbe aokaba, aɔnande. Mmbe aogbondoaga kio, Mokonga amukuiande. 9 Mokonga a bea abha-miki. Aoba miki namɛmi mbondo, abhakɛ amophande ɛtɛ? 10 Aoba miki namɛmi su, amophande njɔka na phɔtɔ koonda? Bɛndɔ! 11 Nga, nanga bókói bakpa ba anja, bûubha opha á bananu egabhɔ anja. Mokonga kɛ́nyɛnyi phɔ bakpa? Kégabheɛku batɔ-ɛ́mɛmi kema anja?»
Bɔphɛi angbo subi á buku á Mokonga
12 «Ogeeani bakpa bonjanja bíndɔ bokondi bánogeɛ. Nnde ande cina ɛ́ɔphi bhui ndea Mósa na ka buku ndea baɔtu-nyɔngɔ.»
Babeeki ba abhɔa
13 «Gani k'aphe áɔkɔtɔkana. Nga, aphe agbae a unge aogesa k'oanga á nsa. Bakpa ba asi báoga k'aphe ndɔ. 14 Aphe ndɔ akɔtɔkani a akpɛ. A unge aogesa ka boamia. Bakpa ba abhɔa ba unge báoga kau.»
Baɔtu-nyɔngɔ á mbɛa
15 «Ɔɛnjiani na baɔtu-nyɔngɔ á mbɛa. Bá bea mabhianga naɔli nkeke á mɔgɔgɔ. 16 Ka bondɔ, buubhande baɔtu-nyɔngɔ ndɔ ka tambea abɔ. Bakpa ndɔ, bá bea tomba. Nnaɔgɔmba mbuka anja bíndɔ tambea abɔ nna anja.»
17 «Baɔtu-nyɔngɔ bɔbhu bá bea etete á bame nabágɔmbi. Me anjanja aɔgɔmba mbuka anja. Me ajede aɔgɔmba mbuka ajede. 18 Me anjanja nnaɔgɔmba mbuka ajede. Me ajede nnaɔgɔmba mbuka anja. 19 Bame bɔbhu ndɔ bánaɔgɔmba mbuka anja, báǒbhia, báǒmaka ka nsa. 20 Ka bondɔ buubhande baɔtu-nyɔngɔ ka tambea abɔ bíndɔ bǔubha bame ka mbuka abɔ.»
21 «Nna tɔ nkpa ndɔ aɔmɔphana ‹Mɔkɔta oo! Mɔkɔta!› a ambe angiande ka koboamɛ ndea Mokonga. Tɔndɔ nkpa ndɔ aɔtɔtɔkisa ekondi ndea abhɛ, mmbe a na kobha. 22 Nga, esa ndɔ nebhikaeka, bakpa ba asi bámogeaeka ‹Mɔkɔta oo! Mɔkɔta!› Bakpa moti-moti sɔsɔbɛ abɔ bágeaeka te: ‹Dɛ́kɛ́ɔtu phɔ nyɔngɔ ndea Mokonga k'ina akɔ? Déképhumbi phɔ bansombo k'ina akɔ? Dékégi phɔ ketangaɔ asi k'ina akɔ?› 23 Eme netenaeka gǎkɛ nyɔngɔ nɛbɔ be: Tokani oa caa, badhemigi nde! Dékénuubhi phɔ tanda esa moti.»
Ɔka á Yéso ande ubhapha
24 «Nkpa nde aɔɔka bɔphɛi nɛmɔ, na gea á kema nde nekondi, a bea mǔbhaphi nacumi endu nɛkɛ akpɛ. 25 Nanga mbua áɔka, nanga ibo átuma, nanga sumbu akpɛ ábɛta endu ndɔ, káudukanɛku, ka nyɔngɔ nde nkpa ndɔ acumi endu nɛkɛ akpɛ phɛ̂.»
26 «Nkpa nde aɔɔka bɔphɛi nɛmɔ, nǎnaogea kema nde nekondi, a bea mbhobho nakácumi endu nɛkɛ akpɛ. 27 Mbua áɔɔka, ibo áotuma, sumbu akpɛ áɔbɛta endu ndɔ, áuudukana, áogua gbu! ka nyɔngɔ nde mbhobho ndɔ kácumi endu nɛkɛ akpɛ.»