Amisa á batɔa-ngobho ba asi
8
1 Bii Yéso agɔbi ye phɛa á bakpa, áodhidha mamba k'ɔma á bɔphɛi, bakpa ba asi báombea. 2 Cɔ, ntɔa-suu moti dátú oa, áɔsɛkɛda ka mpɛphɛ á Yéso, áogbuka muanku mosa akɛ, áongea te: «Mɔkɔta, aobá́ nokondi, ómosokosea.»3 Yéso áonkuia ngomi, áonanoa njaga akɛ, áondhunga, áongea te: «Nebeeki. Otutua.»
Kɛkɛ ndɔ, nyama akɛ â gǎkɛ ǒtutua yede!
4 Bii aami ye, Yéso áongodea te: «Ga, kɔntɔmiɛgɛ mɔnɔ nkpa. Ga ndiu ka mphɛ́i ndea Mokonga, ómophɛ sadaka, bíndɔ Mósa dásongodi, ka nyɔngɔ á ubhisa a bakpa boami akɔ.»
Amisa á mbhɛdanigi ndea ngbɛga á batɔ-émani
5 Bii Yéso dáongia ka Kapɛɛnaúmu, ngbɛga ékombo émani ndea baLɔ́ma áobhika ka mpɛphɛ akɛ, áondengemisaga, áogeae: 6 «Mɔkɔta, mbhɛdanigi nɛmɔ, nyama akɛ aphɛphi, aɔ́yɔka phɛ̂.»
7 Mpɔ Yéso áongea te: «Negande onamisa.»
8 Ngbɛga ékombo émani ndɔ áonsikisia, áongea: «Mɔkɔta, kékeni óngiɛ k'endu nɛmɔ. Yɔnga tɔ nyɔngɔ moti, mbhɛdanigi nɛmɔ aamande. 9 Eme phɔtɔ, ne na bagbɛga bundɔ bá gu ani. Goto, ne na batɔ-émani bunde bá kusi ani. Neongodea moti te: ‹Ga!› Aoga. Neongodea moti: ‹Bhika!› Aobhika. Ne goto ongodea mbhɛdanigi nɛmɔ: ‹Gea be!› Aogea.»
10 Bii Yéso aɔki tɔ nyɔngɔ ndɔ, áoyayama, áǒgea bundɔ dábatúombea te: «Nenógie, kɛ́mɔ̌nimbɛ mɔnɔ nkpa na na beekea angbo sɔsɔbɛ a baIsilaɛ́li bea mmbe.»
11 «Nenógie: Bakpa ba asi bábhikande toka n'okomɔ n'eonga ka ngia ka koboamɛ á na kobha. Báikande ka maseye kimoti na batata-baIsilaɛ́li, Abhalaámu, Isáka, na Yakɔ́bɔ. 12 Mokonga ěyande baIsilaɛ́li bundɔ dábakeni na koboamɛ nɛkɛ. Bábande banduamɔ bɔbhu. Ko, abaeka ngamɔ na ea á minyɔ.»
13 Mpɔ Yéso áǒphaia, áongea ngbɛga ékombo émani ndɔ te: «Ga mɔtɛkɔ! Abɛ bíndɔ obeeki.»
Kɛkɛ ndɔ, mbhɛdanigi nɛkɛ áoama.
14 Yéso â gǎkɛ ojua mɔtɛ a Pɛ́tɛɛ. Aju ye, áondhonda ama-nkakɛ na Pɛ́tɛɛ nade k'eka, naosamba. Nyama akɛ na ajo. 15 Yéso áonanoa njaga akɛ, áondhunga. Kɛkɛ ndɔ, jonga áɔmphɔnga. Aami ye, áokpanga unanaga.
16 Ɔgɔgɔ ndɔ, báombhikia goto na bama-nyai ba asi, bundɔ bansombo dáběngi. Yéso áǒphumba, báotoka subi á bama-nyai ndɔ. A goto kǒamisa batɔa-ngobho bɔbhu bundɔ dábatú oa. 17 Cɔ, nyɔngɔ ndɔ áɔtɔtɔkɛana bíndɔ mɔtu-nyɔngɔ Isáia dáyɔngi:
Dáamisi ngobho nɛsu.
Enda á ngoigi ndea Yéso
18 Bii Yéso dáɔni usɛsɛ á bakpa nabántimbi, áososea jabha kubhi ibo angbongbo Galiláia. 19 Oa ndɔ, mphangigi-ɛɔphi áɔsɛkɛda ka mpɛphɛ akɛ, áongeae: «Mphangigi, neobeande ɔma bhubhui bii ogande.»
20 Yéso áongeae: «Bakɛnsɛngɛ bá na kubhu, bambu bá na ibɔ. Cɔ, eme Muna-Nkpa, ké gǎkɛ na endu.»
21 Mbusa, ka bagoigi nɛkɛ moti áongodea te: «Mɔkɔta, ɔ́mɔɔkanɛa phɔ, négɛ némǔmbɛ abhɛ.»
22 Yéso áongeae: «Omobea. Odeketa bundɔ bási ka měma báumbanɛ.»
Bukpɛkpɛ á Yéso gu á kɛtɛmbɔ
23 Mpɔ Yéso áokambea ka koko, bagoigi nɛkɛ báombea, báokambea, báokpanga kaia. 24 Nabá phɔtɔ okaia, Yéso áoda.
Mba, sumbu akpɛ na kɛtɛmbɔ áǒdhonda ka meme ibo. Ibo áongia subi á koko. 25 Bagoigi báonjujukisa Yéso: «Mɔkɔta, ósoamisa, besi!»
26 Yéso áojujuka, áǒsikisia te: «Batɔa-beekea-abhɔa nde ca! Eke nde bomáobanga ne bende?»
Yéso áoma, áokea sumbu na kɛtɛmbɔ ndɔ. Kɛkɛ ndɔ bɔjɛjɛ áoba.
27 Bagoigi bɔbhu báoyayama na gea: «Animbe! Sumbu n'obenge aɔmɔ̌ka bende?»
Amisa á bama-nyai
28 Bii bákidi ye kubhi ibo, báokia ka koko, báodhuia bhibhi na bhota k'osaa ndea baGɛɛ́si. Oa, báǒdhonda bama-nyai babɛ nabátoki ka bhota, nabáosamba na kukua á bansombo. Bakpa ndɔ dábakai phɛ̂. Nkpa dákáɔnyɛnya k'aphe ndɔ bii báiki ka nyɔngɔ á kokae abɔ. 29 Bii bama-nyai ndɔ bámɔ̌ni ye Yéso, báokoga be: «Obɛ Muna-Mokonga! kosúubɛ mɔnɔ! Oosótambisaga mosa á tena a nyɔngɔ nɛsu ka bo?»
30 Oa ndɔ, ekombo á bangɛa dábatúoeaga. 31 Bansombo bundɔ bá subi á bama-nyai, báondengemisaga Yéso gea te: «Aoba nosóbigi, ósososea pɛ béngiɛ subi á bangɛa ndosi.»
32 Yéso áǒgea: «Gani!»
Báojuana, bágaongia subi á bangɛa ndɔ. Kɛkɛ ndɔ, bangɛa báoga mbangɔ, báoingitanaga ka mamba ndɔ kubhi ibo, báoguia k'ibo, báosia bɔbhu ko!