Amisa á ndɔti
9
1 Yéso áokambea ka koko. Aojabha ibo, áojua ka nji nɛkɛ. 2 Bii angi tɔ, báombhikia na ndɔti nade gu éka. Bii aɔni ye beekea ndea bakpa bundɔ bánkumbi, áongodea ndɔti gea: «Muku amɔ, kobangɛ mɔnɔ, nebosei bojede nɛkɔ.»3 Cɔ, baphangigi-ɛɔphi dábatú oa. Báɔngɔngɔnaga gea: «Nkpa nde aókengeanisa na Mokonga phɛ̂.»
4 Bii Yéso aubhi ye ianaga abɔ, áǒngodea te: «Eke nde bo na ianaga ajede bondɔ? 5 Kema sina nde aáphoo ka yɔnga te, ‹Nebosei bojede nɛkɔ.› Na yɔnga, ‹Ma! ótambɛ!›? 6 Cɔ, nekondi gea búubhɛ te, eme Muna-Nkpa, ne na bukpɛkpɛ á bosea á bojede ndea bakpa ka mokonda nde. »
Mbusa, Yéso áǒphaia, áongodea ndɔti ndɔ te: « Ma! Ikita kɛsɛ nɛkɔ, ójɛ mɔtɛkɔ. »
7 Ndɔti ndɔ áoma, áoikita kɛsɛ nɛkɛ, áoja mɔtɛkɛ.
8 Bakpa ba asi dába gǎkɛ oa. Báɔɔna ketangaɔ ndɔ. Báoyayama, báombhebha Mokonga ka opha á bakpa nɛkɛ bukpɛkpɛ á amisa á bakpa.
Ɔphana á Matáiɔ
9 Bii Yéso asɛkɛdisi tamba, áondhonda nkpa moti ina akɛ nande Matáiɔ. Matáiɔ dáiki ka ntua á phendisaga á manjanja. Oa, Yéso áongodea te: « Omobea! »
Mɔngɔ moti Matáiɔ áosaga ekuma nɛkɛ, áombea Yéso. 10 Aoga na Yéso na bagoigi nɛkɛ mɔtɛkɛ. Baphendisigi-manjanja, na batɔ-ajede báombhikia, áoeaga na bɔ.
11 Nabá phɔtɔ oeaga, baPhaisáiɔ báɔmɔ̌na Yéso naoeaga kimoti na bakpa ba ajede ndɔ. Mbusa á Yéso gɔba á eaga, baPhaisáiɔ báɔsɛkɛda ka mpɛphɛ á bagoigi nɛkɛ, báuusia te: «Baya, nyɔngɔ sina nde mphangigi nɛnu aoeaga na batɔ-ajede, na baphendisigi-manjanja?»
12 Bii Yéso aɔki bo, áǒsikisia te: «Basambi bá na siki á nsaku. 13 Ianagani phɔ nyɔngɔ ndea mɔtu-nyɔngɔ Ɔsɛ́a:
Mokonga akondi bókuiɛ bakpa ngomi, kákondi ɔphɛɔ.
Nga, kébhiki ókaba bakpa ba anja, nebhiki ndiu ókaba bakpa ba ajede.»
Moangɔ á kɛ̌kɛ na moangɔ á kala
14 Mbusa, bagoigi nɛkɛ ndea Yoáni-Mbatisi báombhikia Yéso, báomǔsia te: «Nyɔngɔ sina nde besu na baPhaisáiɔ beogina eea mɔngɔ bhui k'ina á Mokonga, cɔ, bagoigi nɛkɔ bána gǎkɛ ogina?»
15 Yéso áɔ̌yɔngɛa sasa akɛ gea: «Batɔ-ɛ́kɛka bá na bɔmbɛ na moko-ɛ́kɛka na phɔ béi? Bɛndɔ. Esa nde abhikaeka gǎkɛ, bándhungande moko-ɛ́kɛka. Oa ndɔ, batɔ-ɛ́kɛka bábande n'oiɔ, mpɔ báogina eea. 16 Nga, bánaophopha bhɔngɔ á kɛ̌kɛ na phaeka a bhɔngɔ á kala, ka nyɔngɔ nde bhɔngɔ á kɛ̌kɛ anyuande nndɔ á kala. 17 Goto, bánaodukia makana akpɛ ka mboso á kala. Nga, aobá́ nande mboso á kala, áobhomoka, makana áoduukana. Aombana dukia á makana akpɛ ka mboso á kɛ̌kɛ.»
Beekea á bakpa danga-danga
18 Yéso, na phɔtɔ óngodea baPhaisáiɔ yɔnga, mɔkɔta moti ndea baYúdha áombhikia, áongbukia muanku, áongea te: «Nseka nɛmɔ adusukani tɔ kɛ̌kɛ nde. Bhika óbhisɛ njaga akɔ gua akɛ, najujukande ka kukua.»
19 Yéso áoma, áombea kimoti na bagoigi nɛkɛ bɔbhu. 20 Na phɔtɔ otamba, nke moti áǒbea mbusa, ka nyɔngɔ nde dátú na soni. Nga, nke ndɔ dáosamba kukua á dhua á magia ka saga nkama moti na ibɛ. Aodhunga sese á bhɔngɔ ndea Yéso, 21 áokanisia te: «Neodhunga ka bhɔngɔ nɛkɛ, ambe neamande.»
22 Yéso áotimana mbusa, áɔmɔ̌na, áongodea te: «Nseka, bhisa měma akɔ, beekea nɛkɔ akoamisi.»
Kɛkɛ ndɔ, â gǎkɛ oama.
23 Bii aami, Yéso áɔsɛkɛdisa tamba, áojua k'endu ndea mɔkɔta ndɔ dáge ɔmɔphana. Ko, áǒdhonda baembi na bakpa ba asi nabáogama. 24 Yéso áǒngodea te: «Juanani benu bɔbhu na nsɛngɛ. Nga, nseka ndɔ káku, ade ndiu.»
Báɔntɛbhɛa.
25 Báǒdhakanisa bakpa ndɔ. Mpɔ báǒjuanisa na nsɛngɛ.
Yéso â gǎkɛ ongia k'endu, áondhunga nseka ndɔ ka njaga, áonjujukisa ka kukua. 26 Nyɔngɔ á amisa á nseka ndɔ, áɔɔkɛkana ka nji ndɔ bhui.
Amisa á bakpa danga-danga
27 Bii Yéso anamisi nseka ndɔ, áoga. Bakeime-ime babɛ báombea mbusa nabáokogaga k'ɛsɔ angbo nabá danga gea: «Mosuko á Dhaúdhi oo, ósokuia phɔ ngomi ee, Mosuko á Dhaúdhi oo!»
28 Bii angi k'endu moti, bakeime-ime báɔsɛkɛda ka mpɛphɛ akɛ. Mpɔ áuusia te: «Bobeeki gea nɛɔtɔka amisa anu?»
Báobeekea: «Eya, Mɔkɔta!»
29 Aobhisa njaga k'iso abɔ, áǒgeae: «Mokonga ágeɛ ka benu bíndɔ bobeeki.»
30 Mpɔ iso áǒkodokana, báɔɔnapha. Mbusa, Yéso áǒimisia gea: «Bókongodeɛ mɔnɔ nkpa.»
31 Bâ ndiu oga, báɔ̌tɔmiaga batɔa ka nji ndɔ bii Yéso ěamisi.
32 Bii bakeime-ime báge ye, báombhikia na kauma moti na na nsombo. 33 Yéso áomphumba nsombo ndɔ. Cɔ, kɛ̌kɛ ndɔ, kauma ndɔ áokpanga yɔnga. Bakpa ba asi báoyayama, báɔyɔnga te: «Bɛ́kɛ́ɔnimbɛ mɔnɔ ketangaɔ bende subi á Isilaɛ́li!»
34 BaPhaisáiɔ bâ gǎkɛ ɔyɔnga te: «Moamɛ á bansombo, a ambe amophi Yéso bukpɛkpɛ á phumba á bansombo.»
Ngomi á Yéso ka bakpa
35 Yéso dáotamba ka nji bhui, naógoisaga bakpa subi endu á bɔphɛi nɛbɔ, naɔ́phɛa nyɔngɔ-anja á koboamɛ ndea Mokonga, naoamisa etete á ngobho, na kidɔti bhui. 36 Bii dɛ́ɔni bakpa ba asi, áǒkuia ngomi, ka nyɔngɔ nde bakpa ndɔ dábatú bea bamɔgɔgɔ kanga á babondigi. 37 Yéso áǒngodea bagoigi nɛkɛ te: «Dungu a asi, babhɛdanigi ba abhɔa. 38 Mɛmani Mokonga, mɛna-dungu, étekɛ babhɛdanigi buangbo.»