Sɔmbɔa á bateki
10
1 Yéso áɔ̌ɔphana bagoigi nɛkɛ nkama moti na babɛ. Akoópha bukpɛkpɛ á phumba á bansombo na amisa etete á ngobho na kidɔti bhui. 2 Cɔ, nnde ande ina á bateki ndɔ nkama moti na babɛ: Semó igii á bateki, mmbɔ dábaɔmɔphana Pɛ́tɛɛ, ande gea te: «Ɛtɛ», na munamakɛ Andeé, Yakɔ́bɔ muna-Jɛbhɛdháiɔ na Yoáni munamakɛ, 3 Philípɔ na Batɔlɔmáiɔ, Tɔmá na Matáiɔ mmbɔ mphendisigi-manjanja, Yakɔ́bɔ muna-Alpháiɔ na Tadháiɔ, 4 Semó manei-ekuna na Yúdha Isikaliɔ́ta, mmbɔ dántɔngi Yéso mosa á babibia akɛ.Ekuma á bateki
5 Yéso áǒteka bateki ndɔ nkama moti na babɛ. Akɔ̌ɔkɔa be: «Bókongiɛ mɔnɔ k'ekuna nɛngbo. Goto bókongiɛ mɔnɔ ka nji danga-danga ndea baSamalía. 6 Gani ndiu ka baIsilaɛ́li. Nga, bá bea bamɔgɔgɔ nabábungigi. 7 Bii booga, ɔ́tɔmiagani bakpa nyɔngɔ nde: ‹Koboamɛ ndea Mokonga a ye tɔ bhibhi.› 8 Oamisani basambi, ójujukisani basi, ósokoseani batɔa-suu, óphumbani bansombo. Bii nenóphi bukpɛkpɛ jai, gabhani phɔtɔ jai. 9 Booga, bɔ́kɔbhɛdɛ mɔnɔ ka kema bea ngɔa, ɔlɔ, nsobe. 10 Bɔ́kɔbhɛdɛ mɔnɔ bǔku, ngɔmbɛ á ko ibɛ, beato, motumbɔ. Nga, mbhɛdanigi nnauuka eea. 11 Aoba nobokidi ka nji, nkabani phɔ nkpa nde anóseseande. Ikani tɔ mɔtɛ a nkpa ndɔ, na ka bii bɔmɛɛande. 12 Bii boongia k'endu, nsambeani phɔ mɛnɛi. 13 Endu nde báonósesea kau, ngiani oa, bɔjɛjɛ nɛnu áikɛ kau. A gǎkɛ oba nabákákondi, bɔjɛjɛ nɛnu áoja mɔtɛnu. 14 Aoba ka bakpa na kánosesi, goto na káɔki bɔphɛi nɛnu, juanani k'ɔma ndɔ, bótitiɛ nkaa á beato nɛnu. Ande bea phuia á bhɔngɔ. 15 Nenóngodi doni te, tena á nyɔngɔ á nji ndɔ, anyɛnyande Sɔdhɔ́ma na Gɔmɔ́a, nnde dásidi na nsa natoki na kobha.»
Tambisaga á bateki
16 «Cɔ, nenóteki sɔsɔbɛ a bakpa bea bamɔgɔgɔ sɔsɔbɛ a banyama nabá akae. Ɛngɛphani bea njɔka. Bani gǎkɛ ba aphɔngɔ bea mboe.»
17 «Oambani gǎkɛ anja, nga, bánɔtɔngande ka ntua á nyɔngɔ, bánobindande subi endu á bɔphɛi nɛbɔ. 18 Bánokidisande mosa á bakɔta na mosa á baamɛ á ka nji ka nyɔngɔ ani, gea bɔ́tɔmiɛgɛ nyɔngɔ ani mosa á bakɔta na mosa á bundɔ bána baYúdha.»
19 «Mbenɔ nde bánokidisande ka ntua á nyɔngɔ, bókoianɛgɛ mɔnɔ gea: ‹Bɛyɔngande bo?› Nga, Mokonga anúubhisande nnde bɔyɔngande. 20 Goto, Měma á Mokonga angiande subi anu, a unge anɔ́yɔngɛande.»
21 «Nkpa antɔngande munamakɛ, abha-miki antɔngande anakɛ, baniki bɛ́tɔngande babɔkɔti abɔ ka gea bémoɛ. 22 Ka bondɔ, bakpa ba asi bánokangeande ka nyɔngɔ ani. Nkpa ndɔ aphiphiande gǎkɛ nyɔngɔ ndɔ bhubhui, a ambe Mokonga anamisaeka.»
23 «Aoba nabáonótambisaga ka nji moti, teani ka nji nɛngbo. Nenógie, bɔ́kɔ́gɔbɛku timba á Isilaɛ́li mosa á ja ani, eme Muna-Nkpa, ka mokonda.»
24 «Ngoigi nnaɔnyɛnya mphangigi nɛkɛ. Mbhɛdanigi nna gǎkɛ ɔnyɛnya mɔkɔta ékuma nɛkɛ. 25 Ambe ngoigi ábɛ bea mphangigi nɛkɛ, mbhɛdanigi ábɛ gǎkɛ bea mɔkɔta nɛkɛ.»
«Ne bea mɔkɔta ékombo. Aoba nabámosu Bɛljɛbhúli mɔkɔta á bansombo, bésoande bundɔ ba k'ekombo nɛmɔ ina ajede phɛ̂.»
Banga á Mokonga tɔndɔ
26 «Ka bondɔ, bókǒbangɛ mɔnɔ bakpa ndɔ. Nga, kema nde báobhuniaga, aubhukanande. Kema nde báogea ka bɔsɔmɛa, angodokanande. 27 Ka bondɔ, nnde nɛyɔngi ngungu asu, ambe bɔ́phɛ̂ n'ɛsɔ akpɛ phɛ̂ ka ntanga mosa á bakpa ba asi.»
28 «Bókǒbangɛ mɔnɔ goto bundɔ báǒma bakpa ka nyama. Báomoa nkpa ka nyama, bákátɔkɛku nabámoe ka měma. Mbangani ndiu Mokonga, mmbɔ aomoa nkpa ka nyama na měma, áomaka k'oanga á nsa.»
29 «Báǒsombisa banjinji babɛ ka ngɔa moti. Cɔ, moti nnaɔtɔka nagu ka odo Mokonga nakáubhi. 30 Goto, auubha tanga á sikamɔ akɔ. 31 Ka bondɔ, bókobangɛ mɔnɔ. Nga, bo na bophombia kɔnyɛnya banjinji ba asi.»
Ya, na beekea á Yéso mosa á bakpa
32 «Nkpa nde amogamande mosa á bakpa, a ambe nengamaeka mosa abhɛ, mmbɔ a na kobha. 33 Nkpa nde amoyande mosa á bakpa, nenyaeka mosa abhɛ mmbɔ a na kobha.»
Bɔjɛjɛ? Bɛndɔ! Nkoso!
34 «Bókokanisiɛ mɔnɔ gea, nebhiki obhisa bɔjɛjɛ sɔsɔbɛ a bakpa. Nebhiki ndiu k'aphe á bhisa nkoso. 35 Nga, nekidi ka nyɔngɔ á bhisa emani sɔsɔbɛ a moganda n'abhakɛ, nseka n'amakɛ, nke á mambasa n'ama-munyakɛ. 36 Goto, babibia ndea nkpa, bá tɔ batɔa-k'etoa nɛkɛ sasa akɛ.»
37 «Nkpa nde aonkonda abhakɛ n'amakɛ phɛ̂ kɔmɔnyɛnya, kámokeni ne. Nkpa nde aonkonda anakɛ na nseka nɛkɛ phɛ̂ kɔmɔnyɛnya, kámokeni ne. 38 Nkpa nde kákondi kumba á me á nkpatɔ á tambisaga akɛ ka bea ani, kámokeni ne. 39 Mmbɔ aokaba amba á nyama akɛ, abungisande měma akɛ. Mmbe a gǎkɛ obeekea bungisa á nyama akɛ ka nyɔngɔ ani, Mokonga anamisande.»
Sesea á nteki ndea Mokonga
40 «Mmbɔ anósesi, amosesi ye tɔ. Mmbɔ amosesi, ansesi mmbe amoteki. 41 Nkpa nde ansesi mɔtu-nyɔngɔ ka nyɔngɔ ékuma nɛkɛ, Mokonga ansikisiaeka ophendɔ bíndɔ á mɔtu-nyɔngɔ. Nkpa nde ansesi ntɔa-doni ka nyɔngɔ á bonjanja nɛkɛ, ansikisiaeka ophendɔ bíndɔ á ntɔa-doni.»
42 «Nenógie, mmbɔ aomopha nkpa-abhɔbhɔa mɔkɔ́ɔ ibo á dhɛdhɛ ka nyɔngɔ nde nkpa ndɔ ande ngoigi nɛmɔ, Mokonga amphendaeka bokambia kanga á ngaka.»