Dokomisa á Yoáni-Mbatisi
11
1 Bii Yéso dágɔbi phɛa á bagoigi nɛkɛ bundɔ nkama na babɛ, áoma, áoga k'aphe á phɛa na goisaga á bakpa nyɔngɔ á Mokonga ka nji danga-danga ndea Galiláia.2 Oa, Yoáni dátú ka mekakɔ. Aɔɔka boombia ékuma ndea Kiísito. Aǒteka bagoigi nɛkɛ k'aphe á ga á usia akɛ. 3 Bii báju ye, báomǔsia te: «Obɛ ambe obhikande? Bémbondeɛgɛ goto ba angbo?»
4 Yéso áǒsikisia te: «Sikianagani, bógɛ bóngodeɛ Yoáni nyɔngɔ nde bɔɔki na nnde bɔɔni: 5 Bakeime-ime báɔnaphi, badɔti bátambi anja, batɔa-suu bétutu, badakekanigi-ketue báɔkaphi, basi bájujuki, batɔa-buyɛnɛ báɔki nyɔngɔ anja á koboamɛ ndea Mokonga. 6 Maseye ka mmbɔ nna na ngaka k'eme.»
7 Bii bagoigi ndea Yoáni básikianigi, Yéso áokpanga yɔnga na usɛsɛ á bakpa nyɔngɔ ndea Yoáni: «Eke nde botóge kɔɔnjia k'osaa? Kema bea sombiɛ? Bɛndɔ, Yoáni ande nkpa akpɛkpɛ. 8 Eke nde botóge kɔɛnjia? Nkpa naɔli ngɔmbɛ anja? Bɛndɔ. Bakpa nde báɔɔla ngɔmbɛ anja, báoika k'endu a bakɔta. 9 Cɔ, botóge k'aphe á ɔnjia ani? Mɔtu-nyɔngɔ? Eya, goto ɛ̌̀nyɛnyi baɔtu-nyɔngɔ bɔbhu. 10 Nga, Yoáni a ambe mɔtu-nyɔngɔ Maláki dándundu nyɔngɔ akɛ gea:
Mokonga ayɔngie: Ɔna, nenteki nsɔndɔi nɛmɔ mosa akɔ. Abɔngisiagande aphe mosa akɔ.»
11 «Nenógie, nna na nkpa nde abɔkɔtɛani ka mokonda nde na angbongbo phɛ̂ kɔnyɛnya Yoáni-Mbatisi. Cɔ, ntɔa-abhɔbhɔa phɛ̂ ka koboamɛ ndea Mokonga, a ambe a ngbongbo kɔnyɛnya yɛ. 12 Kpanga ésa ndɔ Yoáni-Mbatisi dáphɛi na ka mbenɔ nde, bakpa báosuganea ngia ka koboamɛ ndea Mokonga. Bakpa ba akpɛkpɛ bá unge bábhɛdi.»
13 «Baɔtu-nyɔngɔ bɔbhu, n'ɛɔphi ndea Mósa, dábaɔtu nyɔngɔ á koboamɛ ka matu ndea Yoáni. 14 Aoba nɔbɔmɔɔki, Yoáni a ye tɔndɔ mmbɔ dɔ́bɔɔki gea abhikande nande mpɛnɛ á Ɛlía. 15 Cɔ, mmbe a na kecue, áɔkɛ!»
16 «Nekengeanisande ekombo nde neke? Bákengeani na baniki nabáiki ka mosomba, nabáotobeanaga be: 17 ‹Bɛbɛti ende á maseye, bókobinɛ! Beogama, bókobɛ n'oiɔ!› 18 Cɔ, Yoáni dákáoeaga asi, dákátú gǎkɛ onoa makana. Bakpa bâ ndiu ogea te, ande ama-nyai. 19 Mpɔ eme Muna-Nkpa, nebhiki oeaga anja, néonoa. Bákámokondi goto. Báogea te, nende nu-makana na kakutɛ, neneodhondana na bakpa ba ajede bea baphendisigi-manjanja. Ka bondɔ, nephui mɛni nde be:
Ubhapha ndea Mokonga auubhikana ka kema anja nde aogeana.»
Oyeyɔ ka nji ibɛ
20 Mpɔ Yéso áokpanga yeya á batɔa ka nji ndɔ dági ketangaɔ asi kau, nga, dábákáketi tambea abɔ ajede. Aogea te:
21 «Ayo! batɔa ka Koasíni na Bhɛtɛsaídha! Nga, dátúoba ketangaɔ ndɔ dágeani mɔtɛnu, dátú ye phɔ ogeana ka nji á Tílɔ na Sidhɔ́na, ámbe bakpa á ka nji ndɔ dábaɔli ngɔmbɛ na na nkiki, báǒsia eka k'iso, ába mphaniɔ á bɔngisia á bojede nɛbɔ. 22 Nenógie, tena á nyɔngɔ á Bhɛtɛsaídha, anyɛnyaeka nndɔ á Tílɔ na Sidhɔ́na.»
23 «Cɔ, benu batɔa ka Kapɛɛnaúmu, bûubha te boombande kɔnyɛnya nji bhui? Gbati. Bogaeka tɔ k'oanga á nsa. Nga, dátúoba ketangaɔ ndɔ nadágeani tɔ mɔtɛnu, dátú ye phɔ ogeana ka nji á Sɔdhɔ́ma, nji ndɔ dátúbaeka tɔ béi k'esa nde. 24 Nenógie, tena á nyɔngɔ nɛnu anyɛnyaeka nndɔ á Sɔdhɔ́ma.»
Yéso ɛ̌̀ɔphani bakpa
25 Ka matu ndɔ, Yéso áɔmɛma Mokonga be: «Abhɛ, mɛna-mokonda na kobha, neobhebhi phɛ̂, nga, okodi nyɔngɔ nde ka babhobho, ɔ́ɔsɔmɛa ka batɔa-ubhapha á ka mokonda. 26 Eya, abhɛ! nnde dókondi a ungɔ.»
27 «Nga, abhɛ amopi tɔ kema bhui. Nna gǎkɛ na nkpa nde aomuubha, tɔndɔ abhɛ. Goto, nna na nkpa nde aomǔbha abhɛ, tɔndɔ eme anakɛ. Eme miki, něubhisi bundɔ nɛ̌̀sɔmbu nyɔngɔ á abhɛ.»