Yéso, mɔkɔta á sabato
12
1 Ka matu ndɔ, Yéso dáɔnyɛnya na bagoigi nɛkɛ ka ciko a moyangu. Nja áɔ̌bhɛda bagoigi. Báɔɔna moyangu ndɔ, báɔkɔda, báoea. Esa ndɔ dátú esa á sabato.2 Bii baPhaisáɔ báɔni bo, báongodea Yéso gea: «Bagoigi nɛkɔ bági kema nde nna anja esa á sabato. Nga, bábhɛdi ekuma esa á sabato.»
3 Yéso áǒsikisia te: «Bókótangimbɛ mɔnɔ nyɔngɔ nde Dhaúdhi dági, bii dátú na nja, yɛ na bakpa nɛkɛ bɔbhu ndɔ? 4 Dángi subi éndu a Mokonga, bakpa nɛkɛ bɔbhu báoea mbondo ndɔ dábamophi Mokonga. Nanga ɛɔphi kági bo ka bakpa, tɔ ka bakɔta á madhondanɔ. 5 Bókótangi goto subi á buku ɛ́ɔphi ndea Mósa gea te, baphɛ́i ndea baYúdha bundɔ báɔbhɛdanaga subi éndu a Mokonga, báuuja ɛɔphi á sabato nabáká tanda na bojede moti? 6 Nenógi gǎkɛe, moangɔ angbo phɛ̂ a oani, kɔnyɛnya nyɔngɔ éndu a Mokonga. 7 Ianagani phɔ nyɔngɔ ndea mɔtu-nyɔngɔ Ɔsɛ́a:
Mokonga agi te: Kékondi phɛa á banyama, tɔndɔ kuia á bakpa ngomi.
8 Nga, eme Muna-Nkpa, nende Mɔkɔta á sabato.»
9 Mbusa, Yéso áoga, áongia k'endu á bɔphɛi. 10 Subi éndu a bɔphɛi ndɔ, nkpa moti njaga akɛ dáphɛphi. Bakpa bundɔ dábatú oa, dábanɛkɛi Yéso mɛkɔ, báomǔsia te: «Ɛɔphi asósosi gea, béamisɛ basambi esa á sabato?»
11 Mpɔ Yéso áǒsikisia te: «Ka benu moti sina mbe mɔgɔgɔ nɛkɛ aoguia k'etia esa á sabato, aukande phuia akɛ subii? Eya, bámphuiande.»
12 «Nga, nkpa anyɛnyi mɔgɔgɔ ka bophombia. Ka bondɔ, ɛɔphi nɛsu asosi gea te, be na bukpɛkpɛ á amisa á basambi esa á sabato.»
13 Mpɔ Yéso áǒphaia ka nsambi, áongea: «Suia nanoa á njaga akɔ caa!»
Mpɔ nkpa ndɔ áonanoa njaga akɛ, áoama.
14 Oa ndɔ, bii baPhaisáiɔ báɔni ye bo, báojuana, báoga k'aphe á maca á moa a Yéso.
Yéso ande mbhɛdanigi nde Mokonga dánsɔmbu
15 Bii Yéso dáɔki nyɔngɔ á maca akɛ, áotoka oa. Bakpa ba asi báombea, áǒamisa basambi bɔbhu. 16 Déngodi gǎkɛ bundɔ déamisi gea te, bákɛ̌̀tɔmiɛgɛ mɔnɔ bakpa buangbo. 17 Dáyɔngi bo ka gea, nyɔngɔ nde mɔtu-nyɔngɔ Isáia dáyɔngi átɔtɔkɛanɛ.
18 Mokonga agi: Mɔ̌nani mbhɛdanigi nɛmɔ, mmbe dɛ́nsɔmbu, nenkondi phɛ̂. Ne na maseye ka yɛ.
Nebhisande Měma ani ka yɛ, ěngodeande batɔa-k'ekuna bhui nyɔngɔ nde nekondi.
19 Kásanɛeka na nkpa, kákogɛeka n'ɛsɔ akpɛ ka ntanga.
Cina á bukpɛkpɛ ndea Yéso
22 Cɔ, báombhikia Yéso na nkpa moti, mmbɔ dáosamba na kukua á bansombo. Nkpa ndɔ dátú keime-ime, goto kauma. Yéso áonamisa nkpa ndɔ. Bii aami ye, áokpanga yɔnga na ɔnapha. 23 Bakpa bɔbhu bundɔ dábatú oa, báoyayama ka ketangaɔ ndɔ Yéso dági. Báɔyɔngaga sɔsɔbɛ abɔ, báogea te: «Nna phɔ Mosuko á Dhaúdhi ambe?»
24 Bii baPhaisáiɔ báɔki gǎkɛ nyɔngɔ ndɔ, báogea te: «Mogaa ndɔ aóphumba bansombo k'ina á Bɛljɛbhúli, moamɛ á bansombo.»
25 Oa, Yéso áuubha ianaga ndea bakpa ndɔ, áogea te: «Aoba bakɔta á koboamɛ nabásani ngungu abɔ, doni, koboamɛ nɛbɔ kábɛku na kantiti. Aoba bakpa á ka nji nabásani sɔsɔbɛ abɔ, nji nɛbɔ káendɛku. Aoba bakpa á k'ekombo nabásani ngungu abɔ, bákatanagande. 26 Ka bondɔ, aobá́ koboamɛ ndea Bɛɛjɛbhúi na n'emani subii, akatanande. Bɛljɛbhúli kábɛku ye na koboamɛ. 27 Benu bogi te, Bɛljɛbhúli amopi bukpɛkpɛ á phumba á bansombo. Cɔ, animbe ěophi bagoigi nɛnu bukpɛkpɛ á phumba á basombo? Nga, kema nde bagoigi nɛnu báogea, auji nyɔngɔ nɛnu. 28 Bii něphumbi bansombo, cɔ ubhani gǎkɛ gea, koboamɛ ndea Mokonga a ye tɔ sɔsɔbɛ anu.»
29 «Nga, nna na nkpa nde aɔtɔka ngia k'endu ndea nkpa akpɛkpɛ ka uba a nkumba nɛkɛ. Ye phɔ ámboɛgɛ mosa pɛ! Ayéomboaga, mpɔ áuuba nkumba ndea k'endu nɛkɛ bhui.»
30 «Nkpa nde nna nkɛkɛɔ ani ande mbibia ani. Nkpa nde nnaɔ́ɔphana bakpa kimoti n'eme, ande mphanji-bakpa.»
31 «Ka bondɔ, nenógie, Mokonga aboseande bojede bhui nde bakpa báogea. Nkpa nde ambhomi gǎkɛ Měma á Mokonga, Mokonga káboseɛku bojede nɛkɛ. 32 Nkpa nde aomobhoma eme Muna-Nkpa, Mokonga aboseande bojede nɛkɛ. Nkpa nde a gǎkɛ ombhoma Měma-Anja ndea Mokonga, Mokonga káboseɛku bojede nɛkɛ, nanga kɛ̌kɛ nde, nanga bii abaeka.»
Me na mbuka akɛ
33 «Me anjanja, áɔgɔmba na mbuka anja. Me ajede, aɔgɔmba na mbuka ajede. Bomǔbhande me ka mbuka akɛ.»
34 «Cɔ, benu baPhaisáiɔ, ekombo á njɔka nde ca! Bɔ́kɔ́ɔtɔka nɔbɔyɔngi nyɔngɔ na anja, nga, bo ba ajede. Nyɔngɔ nde, aobá́ měma natumi na nyɔngɔ, aphe á nɔkɔ áɔyɔnga. 35 Nkpa anjanja aokanisia kema anja, áɔyɔnga yɔnga anja. Nkpa ajede a gǎkɛ okanisia kema ajede, áɔyɔnga yɔnga ajede.»
36 «Ubhani gea te, esa á tena a nyɔngɔ ndea Mokonga ka sungia á mokonda, bakpa básikisiaeka yɔnga á jai-jai nde báyɔngi nabá phɔtɔ ka mokonda. 37 Nga, yɔnga akɔ unge Abhabhisa atenaeka nyɔngɔ nɛkɔ ne. Aoba na anja, áotena nyɔngɔ nɛkɔ anja. Aoba na ajede, áotena nyɔngɔ nɛkɔ ajede.»
Mɛma á ketangaɔ
38 Mpɔ baphangigi-ɛɔphi buangbo na baPhaisáiɔ báongodea Yéso te: «Mphangigi, bekondi phɔ ógeɛ k'asu ketangaɔ á mphaniɔ.»
39 Yéso áǒsikisia te: «Ai! benu batɔ-ɛ́bɔkɔti ajede, batɔa-kanga-á-beekea a Mokonga! Boomǔsia ketangaɔ? Bɛndɔ. Tɔndɔ ketangaɔ bea kema ndɔ Mokonga dági ka mɔtu-nyɔngɔ Yɔ́na. 40 Nga, bíndɔ Yɔ́na dáde esa isaɔ subi á sɔphɔ á su angbongbo, áɔmɔ̌ka na phɔtɔ koonda, a unge eme Muna-Nkpa nedande esa isaɔ subi á bhota. 41 Esa á tena a nyɔngɔ ndea Mokonga ka sungia a mokonda, batɔa ka Nináu bátɔngaeka ɛbɔkɔti nde ka nyɔngɔ nde dábaɔki bɔphɛi ndea Yɔ́na, báɔbɔngisiaga bojede nɛbɔ. Nga, nenóngodi te, moangɔ nde a oani, anyɛnyi nyɔngɔ á ka matu ndea Yɔ́na. 42 Goto, k'esa á tena nyɔnyɔ ndɔ, nke-moamɛ á ka Sɛ́bha amamaeka, atɔngaeka, ka nyɔngɔ nde atoki danga phɛ̂ ka digimisa á ubhapha á Sɔɔmɔ́na. Negie, moangɔ nde a oani, anyɛnyi nyɔngɔ á ka matu ndea nke-moamɛ á ka Sɛ́bha.»
Phumba, na ja á nsombo
43 «Mbenɔ nde báomphumba nsombo moti subi á nkpa, áɔkɔba k'osaa naokaba ɔma á buiki, kaɔnɛ. 44 Bii káɔni, áokanisia te, asikianagande k'endu nɛkɛ bii atoki. Aoja, áodhonda endu jai, nabáphuu, nabɔngi. 45 Mpɔ áoga k'aphe á bhɛda a badhakɛ saba bundɔ bá ajede phɛ̂ kɔnyɛnya yɛ. Báobhika bɔbhu kimoti, báongia, báoika oa. Nkpa nde bansombo bángi goto subi akɛ, áoba ajede phɛ̂ kɔnyɛnya buiki nɛkɛ á mosa. Abande bende ka bakpa á k'ɛbɔkɔti ajede nde.»
Ekombo ndea Yéso
46 Yéso na phɔtɔ ɔphɛa, amakɛ na bamunamakɛ báokidia. Báomama ka nsɛngɛ éndu, báuusia gea te báyɔngɛgɛ na yɛ.
47 Nkpa moti áongodea Yéso te: «Enga, amakɔ na bamunamakɔ bákobondi na nsɛngɛ. Bákondi yɔngaga n'obɛ.»
48 Yéso áonsikisia te: «Animbe ande ayi? Bani bunde bánde bamunayi?»