Mɛni á nkoni
13
1 Esa ndɔ Yéso dájuani k'endu, áoika ka nkpangba íbo angbo ka phɛa. 2 Oa ndɔ, bakpa ba asi báontimba. Bii aɔni bo, áokambea ka koko, áǒdangamisa abhɔa. Bakpa báoika ka nkpangba íbo. 3 Aǒngodea bakpa nyɔngɔ ka mɛni be: 4 «Nkpa moti dáge okona mbo. Bii dáophanja mbo ndɔ ka ciko nɛkɛ, mbo angbo áogua k'aphe, bambu báoea. 5 Mbo angbo áogua ka odo na n'ɛtɛ, áɔtɛa mbangɔ. 6 Bii mani abɛti mbo ndɔ, nyɔngɔ nde migii dákásɛi gǎkɛ subi á odo, mbo ndɔ áɔɔmɔkaka. 7 Mbo angbo dágu gu á tomba, nnde dábadhɛmi kanga á phuia a migii. Mbo ndɔ, dátɛi kimoti, tomba áoingiaga mbo, mbo áokua. 8 Mbo angbo â gǎkɛ ogua ka odo anja, áɔtɛa anja phɛ̂, áɔbɔkɔta. Ka mbo ndɔ agu ka odo anja ndɔ, moti áɔbɔkɔta mbuka mia moti, nɛngbo nkama sita, nɛngbo nkama isaɔ.»
9 Yéso áɔgɔbɛa bɔphɛi nɛkɛ, áogea te: «Mmbe a na ketue áɔkɛ.»
Yéso aɔyɔnga ka mɛni ka bo?
10 Mbusa á bɔphɛi, bagoigi báondonda Yéso, báomǔsia: «Ɔɔ́phɛi bakpa ka mɛni ka bo?»
11 Yéso áǒgeae: «Mokonga anókodei ubhapha á kɔkɔta ndea na kobha. Mokonga kékodei gǎkɛ bɔ. 12 Nga, nkpa nde a na ubhapha, Mokonga amophande ubhapha asi phɛ̂. Mmbe a na ubhapha abhɔa, Mokonga amutande ubhapha ndɔ. 13 Nɛphɛi ka mɛni, nga, bakpa nde bá na iso, bána gǎkɛ ɔɔnapha. Bá na ketue, bána gǎkɛ ɔɔkapha. 14 Ka bondɔ, bɔphɛi ndea mɔtu-nyɔngɔ Isáia atɔtɔkɛani ka bɔ, gea:
Mokonga agie: Bakpa nde, báɔkande bɔphɛi ásii, bákádigimisɛku gǎkɛ. Báɔnande mphaniɔ asi, bákádigimisɛku. 15 Nga, bá na měma akpɛ. Bádaki ketue, báimi iso abɔ. Nga, bákákondi ɔnapha, bákákondi ɔkapha, bákákondi koda á měma abɔ ka bɔphɛi nɛmɔ. Bakpa nde bákákondi ketia á tambea abɔ ka bea ani gea, eme Mokonga, néamisɛ.»
16 «Cɔ, benu bo gǎkɛ na ngɔa. Nga, bɔɔɔnapha, bɔɔɔkapha. 17 Nenógie, baɔtu-nyɔngɔ ba asi na babeeki ba asi á kala, dábakondi ɔna á kema nde bɔɔɔna na ɔka á nyɔngɔ nde bɔɔɔka. Dábákátɔki gǎkɛ.»
Cina á mɛni ndea nkoni-mbo
18 «Cɔ, ɔkani cina á mɛni ndea nkoni-mbo. 19 Mbo nde agu ka meme aphe, a bea bakpa bundɔ báɔɔka bɔphɛi á koboamɛ, kanga á digimisai. Nga, Ndhemigi áuuja nyɔngɔ ndɔ ka měma abɔ. 20 Mbo ndɔ agu ka odo na n'ɛtɛ, a bea bundɔ báobeekea nyɔngɔ á Mokonga mɔngɔ moti báɔɔka. Nyɔngɔ ndɔ kángi gǎkɛ subi á mɛngɛ abɔ. 21 Nga, bánaoiphia ka beekea nɛbɔ. Aoba mbenɔ á tambisaga na ea á minyɔ ka nyɔngɔ á Mokonga nɛ̌̀bhɛdi bakpa ndɔ, báosaga mɔngɔ moti. 22 Mbo nde agu sɔsɔbɛ a tomba, a bea bundɔ bábeeki nyɔngɔ ndea Mokonga. Kanisia á buyɛnɛ na siki ɛ́tɔi áomoa nyɔngɔ ndɔ a ka měma abɔ. Nyɔngɔ á Mokonga nnaoketia tambea abɔ. 23 Mbo nde agu ka odo anja, a bea bundɔ babeeki. Nga, nyɔngɔ á Mokonga ěngi ka mɛngɛ. Bá bea mbo ndɔ dábɔkɔti moti mbuka mia moti, nɛngbo nkama sita, nɛngbo nkama isaɔ.»
Mɛni á ɔphɔ ajede
24 Yéso áǒngodea mɛni nɛngbo, áɔyɔnga te: «Koboamɛ ndea Mokonga a bende. Nkpa moti dákoni mbo anja bea mponga ka ciko nɛkɛ. 25 Cɔ, dái gǎkɛ kipha, bakpa bɔbhu nabá ka tɔ, mbibia áongia ka ciko ndɔ, áokona ɔphɔ ajede sɔsɔbɛ a mbo, áoga nɛkɛ. 26 Bii mbo ndɔ atɛi ye, áokpanga bɔkɔta. Babhɛdanigi báɔɔna te, ɔphɔ nɛngbo ajede atɛi. 27 Báombhikia mɛna-ciko, báomǔsia te: ‹Mɔkɔta, dókókoni phɔ mbo anja ka ciko nɛkɔ? Cɔ, ɔphɔ ajede nde atoki goto oa?› »
28 Mɛna-ciko áǒsikisia te: «Mbibia ambe aphanji mbo ndɔ.»
Babhɛdanigi báomǔsia te: «Okondi bégɛ béphuiɛ mbo ajede ndɔ?»
29 Mɛna-ciko áogea te: «Bɛɛndɔ. Nyɔngɔ nde boophuia ɔphɔ ajede, ámbe bophuiande kimoti na mbo anja. 30 Deketani, bhubhui átɛɛ kimoti ka sungia mbenɔ á dungu. Oa ndɔ, něngodeande batɔa-dungu te: ‹Phuiani phɔ ɔphɔ ajede mosa, bóboɛgɛ ntɔkɛ-ntɔkɛ ka toboai. Mpɔ bóbhisɛ mbo anja k'egbongbo nɛmɔ.› »
Mɛní á mbo á Aladháli
31 Yéso áǒngodea mɛni nɛngbo, áɔyɔnga te: «Koboamɛ ndea Mokonga a bende. Nkpa dábhɛdi mbo á Aladháli, áokona ka ciko. 32 Mbo ndɔ dá anyɛbɛ. Bii dátɛi ye gǎkɛ, áophonda phɛ̂, na ka bii bambu dábaphɛki ibɔ ka ntabhi i. »
Mɛni á cacu
33 Yéso áǒngodea mɛni nɛngbo, áogea te: «Koboamɛ ndea Mokonga a bende. Nke moti dádhausani cacu na jɔ moti á mpusu á nkɛkɛ. Nkɛkɛ bhui áobimba, áongbota phɛ̂.»
Yéso atɔmi nyɔngɔ ka mɛni ka bo?
34 Ka bondɔ, Yéso áǒngodea batɔa-madhondanɔ nyɔngɔ ndɔ bhui ka mɛni. Dákéngodi bakpa nyɔngɔ kanga á mɛni. 35 Dági bondɔ ka tɔtɔkɛana á nyɔngɔ ndɔ mɔtu-nyɔngɔ dáyɔngi:
Nɛ̌̀phɛande bakpa ka mɛni. Něngodeande nyɔngɔ á bɔsɔmɛa, nnde bakpa bɔbhu bákáubhimbɛ mɔnɔ ka kpanga á conja á mokonda.
Cina á mɛni á ɔphɔ ajede
36 Oa ndɔ, Yéso áodeketa madhondanɔ, áoga k'endu. Bagoigi nɛkɛ báombhikia, báongodea te: «Osongodea phɔ cina á mɛni á ɔphɔ ajede á ka ciko.»
37 Aǒsikisia te: «Nkpa nde akoni mbo anja, ande eme Muna-Nkpa. 38 Ciko ande mokonda. Mbo anja ande bakpa á koboamɛ ndea Mokonga. Ɔphɔ ajede ande bakpa ndea Ndhemigi. 39 Mbibia mmbɔ akoni ɔphɔ ajede, ande Ndhemigi. Dungu ande sungiaga á mokonda. Batɔa-dungu bánde bamalaeka. 40 Dhausana na toboa á ɔphɔ ajede, ande bea kema nde ageanande ka sungiaga á mokonda. 41 Muna-Nkpa ětekaeka bamalaeka nɛkɛ, báǒndhondanisa bakpa bɔbhu bundɔ báǒdhemaga badhabɔ, na bundɔ báogea ajede. 42 Bémakaeka bakpa ba ajede ndɔ k'oanga á nsa du! Ko, abaeka ngamɔ na ea á minyɔ. 43 Batɔa-doni ndea Mokonga báphenuagaeka bea mani, ka koboamɛ ndea Mokonga. Nkpa nde a na ketue, áɔkɛ!»
Mɛni áate na subi á ciko
44 «Koboamɛ ndea Mokonga a bende. Ndhɛmi-ciko moti dáɔni kema ésombi akpɛ bea aate subi á ciko moti. Aogbukumiaga. Aoba na maseye phɛ̂, áosombisa nkumba nɛkɛ bhubhui ka nyɔngɔ á somba ciko ndɔ.»
Mɛni á nsanga
45 «Koboamɛ ndea Mokonga a goto bende. Nsombisigi dáokaba somba á nsanga anja. 46 Bii dáɔni ye nsanga moti na anja phɛ̂, áoga osombisa nkumba nɛkɛ bhui, áosomba nsanga ndɔ.»
Mɛni á baphengi-basu ba angbongbo
47 «Koboamɛ ndea Mokonga a goto bende. Baphengi-basu ba angbongbo dábamaki moabɔ nɛbɔ k'ibo. Basu danga-danga báota kau. 48 Bii moabɔ atumi ye, báobota moabɔ ndɔ kubhi, báokoda, báɔ̌sɔmbɔa basu ba angbongbo, báǒmakea ka jɔ. Báǒmaka basu ba abhɔbhɔa.»
«Abaeka bende ka sungia a mokonda. 49 Bamalaeka békatisanaeka batɔ-ajede na batɔa-doni. 50 Bɛ́bhɛdaeka batɔ-ajede ndɔ, báǒmaka k'oanga á nsa. Ko, abaeka ngamɔ na ea á minyɔ.»
Amba á ɛɔphi á kɛ̌kɛ na nnde á kala
51 Yéso âkuusia bagoigi nɛkɛ te: «Boengetisi nyɔngɔ nde bhui?»
Báobeekea: «Eya.»
52 Mpɔ Yéso áɔ̌tɔmiaga mɛni nde: «Mphangigi-ɛɔphi mmbe abeeki nyɔngɔ á koboamɛ ndea Mokonga, akengeani na mɛna-endu, mmbe aphui k'obhisɔ nɛkɛ, kema á kɛ̌kɛ, na kema á kala.»
Ya á Yéso ka nji nɛkɛ
53 Bii Yéso agɔbi ye tɔmiaga á mɛni ndɔ, áotoka oa, 54 áoja ka nji nɛkɛ. Oa, áɔphɛa k'endu á bɔphɛi . Bundɔ dábatú oa, báoyayama, báuusiana te: «Mogaa nde atoki na ubhapha nde oa? Aɔtɔka gea á ketangaɔ bo? 55 Nna phɔ muna-mbɔngisigi kakaanga ambe? Amakɛ nna phɔ Malía? Banamakɛ bána phɔ Yakɔ́bɔ, Yɔsɛ́phu, Semó na Yúdha? 56 Baoakɛ bánaphɔ́koikaga ka nji nde? Atoki na bukpɛkpɛ nde oa?»
57 Báonseka. Yéso â gǎkɛ ǒngodea te: «Báonkonda mɔtu-nyɔngɔ ɔma bhui. Ka nji nɛkɛ na k'ekombo nɛkɛ, bána gǎkɛ onkonda.»
58 Ka nyɔngɔ á ngaka nɛbɔ, Yéso dákági ketangaɔ asi oa.