Moa á Yoáni-Mbatisi
14
1 Ka matu ndɔ, Ɛlɔ́dhɛ moamɛ á ka Galiláia, dáɔki nyɔngɔ á boombia á Yéso, 2 áǒngodea babhɛdanigi nɛkɛ te: «Ande Yoáni-Mbatisi a ambe ajujuki ka kukua. Nndɔ unge ana bukpɛkpɛ á gea ketangaɔ ne.»3-4 Nga, Ɛlɔ́dhɛ dámbu Ɛlɔdhía, nka-munama-Philípɔ. Ka bondɔ Yoáni-Mbatisi dátúɔmphɛaga Ɛlɔ́dhɛ te: «Kákeni ómukɛ nka muna-amakɔ.»
Ka bondɔ, Ɛlɔ́dhɛ áososea gea, bándhungɛ Yoáni. Báomboaga, báomakea ka mekakɔ. 5 Dákámoe gǎkɛ, ka nyɔngɔ nde débangi baYúdha. Nga, dábaɔni gea Yoáni ande mɔtu-nyɔngɔ.
6 Mbusa á makea á Yoáni ka mekakɔ, bii esa á maseye á bɔkɔtɛana a Ɛlɔ́dhɛ dákpeengeani ye, nseka ndea Ɛlɔdhía áobina mosa á Ɛlɔ́dhɛ na mosa á bakpa bundɔ dɛ́ɔphani. Ɛlɔ́dhɛ áoba na maseye phɛ̂, áokonda mbina ndɔ phɛ̂, 7 áonoa esomba á mɔkɔ ka nseka ndɔ te: «Nekophendande kema bhui nde ɔmɔmɛmande.»
8 Amakɛ aɔki ye bo, áɔmphɛa nseka nɛkɛ. Mpɔ nseka ndɔ áongodea Ɛlɔ́dhɛ: «Tenisa k'ani mɔ á Yoáni-Mbatisi, ɔ́bhisɛ k'ɔphɛphɛ, óbhikisɛ oani.»
9 Ɛlɔ́dhɛ áǒngongonisa ka nyɔngɔ á kema nde nseka ndɔ dákondi. A ndiu ososea gea bátenɛ mɔ á Yoáni ka nyɔngɔ ésomba ndɔ dánu mosa á bakpa.
10 Cɔ, báotena mɔ á Yoáni subi á mekakɔ. 11 Mpɔ báobhika ne k'ɔphɛphɛ, báobhisa ka njaga a nseka ndɔ. Nseka ndɔ áoga omopha amakɛ.
12 Mbusa, bagoigi ndea Yoáni báɔbhɛda monda akɛ, báoga uumba. Mpɔ báoga ongodea Yéso nyɔngɔ ndɔ dágeani.
Bikisa á eea
13 Bii Yéso dáɔki nyɔngɔ á kukua á Yoáni, áokambea ka koko, ka deketana akɛ na bakpa.
Bakpa ba asi báɔmɔ̌na Yéso mbenɔ nde akambi ka koko. Báotoka na nji nɛbɔ danga-danga, báǒkumba basambi, báombea Yéso, nabáotamba kubhi.
14 Cɔ, koko áodhundua, Yéso áokia. Aɔ̌bɔna bakpa ba asi, áǒkuia ngomi phɛ̂. Aokpanga amisa á basambi ndɔ bakpa dáběkumbi.
15 Mbusa, esa áɔgɔgɔmana. Bagoigi báɔsɛkɛda ka mpɛphɛ á Yéso. Báongodea te: «Esa age. Nji nna bhibhi. Oteka bakpa bágɛ na nji ka somba a eea.»
16 Yéso áǒsikisia te: «Kákeni bakpa nde bájɛ na nji. Kabani k'abɔ eea sasa anu.»
17 Bagoigi báongodea Yéso te: «Oani, be na bambondo bɔku na basu babɛ tɔndɔ.»
18 Yéso áǒngodea te: «Bhikisani koni.»
19 Bagoigi báomopha bambondo na basu ndɔ. Yéso áɔbhɛda, áǒikisa bakpa ka odo, áoenga na kobha, áombhebha Mokonga k'ɛmɛmi nɛkɛ. Aobunaga mbondo, áǒopha bagoigi nɛkɛ, mbusa, bagoigi nɛkɛ báǒgabhea bakpa.
20 Cɔ, bakpa báoea, báokuta, báodeketa dhue. Mbusa á eaga, bagoigi nɛkɛ báɔkɔngɔa dhue ndɔ, báomakea subi á jɔ. Báotumisa jɔ nkama na ibɛ.
21 Bakpa ndɔ dábatú bea ɛlɛphu bɔku, kanga á tanga a bake na baniki.
Tamba á Yéso gu á ibo kanga á koko
22 Mbusa á isa a bakpa ɛlɛphu bɔku ndɔ, Yéso áǒsosea bagoigi nɛkɛ gea bákambeɛ ka koko, bájabhɛ mosa akɛ kubhi ibo.
Bagoigi báokambea ka koko, báokpanga jabha.
Yéso áojiga sasa akɛ sɔsɔbɛ a bakpa ndɔ déisi, ka ɔkɔa abɔ.
23 Mbusa á ɔkɔa á bakpa ndɔ, áodapha gu á mamba k'aphe á mɛma á Mokonga. Dátú tɔ oa kipha sasa akɛ.
24 Cɔ, bagoigi nɛkɛ dábasɛi phɛ̂. Maphopho na maiphianɔ áokpanga bɛta á koko nɛbɔ, áogea áinisɛ.
25 Ɔsa á kɔkɔ, Yéso áǒbea bagoigi nɛkɛ naotamba gu íbo kanga á koko. 26 Bii bagoigi nɛkɛ bámɔ̌ni, báoima, báokoga, báobanga phɛ̂. Báuubha te: «Ande oketi.»
27 Yéso áǒngodea te: «Bani na bukpɛkpɛ. Eme ambɔ. Bókobangɛ mɔnɔ.»
28 Mbusa, Pɛ́tɛɛ áɔyɔnga te: «Mɔkɔta, aobá́ nande obɛ doni, ɔ́mɔɔphana phɔ nébhikɛ bhibhi akɔ, nétambɛ gu íbo bea obɛ.»
29 Cɔ, Yéso áɔmɔphana: «Bhika.»
Pɛ́tɛɛ áokia ka koko, áotamba gu ibo bea Yéso, áombhikia. 30 Mbusa, áɔɔna maphopho, áobanga. Ka bondɔ, áokpanga sɔda. Aokoga te: «Mɔkɔta, ómoamisa!»
31 Mɔngɔ moti, Yéso áonanoa njaga, áondhunga, áompobisa. Aongodea te: «Obɛ ntɔa-beekea-abhɔa nde ca! nyɔngɔ sina nde o na ngaka ne bende?»
32 Mbusa, Yéso na Pɛ́tɛɛ báobea koko, báokambea subii. Mɔngɔ moti maphopho áɔphɔnga.
33 Ka bondɔ, bagoigi nɛkɛ ndɔ dábatú subi á koko, báogbuka muanku mosa á Yéso, báombhebha te: «Onde Muna-Mokonga doni!»
Amisa á basambi ka Gɛnɛsaɛ́ti
34 Mbusa á Yéso na bagoigi nɛkɛ gɔba á jabha á ibo, báojua ka Région á Gɛnɛsaɛ́ti. 35 Bii batɔa ka nji ndɔ dábamǔbhi ye Yéso, báoteka mbino ka nji ndɔ ɔma bhui. Báombhikia na basambi bɔbhu bundɔ dábatú ka nji ndɔ. 36 Báondengemisaga Yéso gea te, bádhungɛ ye phɔ sese á ngɔmbɛ nɛkɛ. Bundɔ dábandhungi ka ngɔmbɛ ndɔ, báoama bɔbhu.