Ɛɔphi á kokpa n'ɛɔphi ndea Mokonga
15
1 Oa ndɔ, baPhaisáiɔ na baphangigi-ɛɔphi dábatoki na Yɛusalɛ́ma, báombhikia Yéso. 2 Báomǔsia te: «Nyɔngɔ sina nde bagoigi nɛkɔ bábuni ɛɔphi ndɔ batatasu dábadu? Nga, bánaosokosa njaga mosa á eaga bíndɔ ande ɛɔphi nɛsu.»3 Mpɔ Yéso áǒsikisia te: «Benu gǎkɛ, nyɔngɔ sina nde boobuna ɛɔphi ndea Mokonga, k'ina ɛ́ɔphi ásii nɛnu? 4 Nga, Mokonga agi te:
Mɔ̌ka abhakɔ n'amakɔ.
Goto:
Nkpa nde aombhoma abhakɛ n'amakɛ, akeni bámoɛ.
5 Cɔ, benu bogi gǎkɛe: Nkpa nde aongea abhakɛ n'amakɛ: ‹Nkumba nde netóogea nénophɛ, ande ɔphɛɔ ka Mokonga.› 6 Nkpa ndɔ nna na siki á enga a abhakɛ. Ka bondɔ, bobuni ɛɔphi ndea Mokonga k'ina asii nɛnu. 7 Badhemigi nde ca! Mɔtu-nyɔngɔ Isáia dáɔtu doni nyɔngɔ gu anu te:
8 Mokonga agi: Nanga bakpa nde bámobhebha k'aphe á nɔkɔ, měma abɔ a danga n'eme. 9 Báogbuka muanku abɔ mosa ani etiti, nyɔngɔ nde báǒgoisaga badhabɔ ɛɔphi á kokpa, báogea te, ande ɛɔphi ndea Mokonga.»
Kema nde aonjenanisa nkpa
10 Mbusa, Yéso âkɔ̌ɔphana bakpa, áǒngodea te: «Bhisani phɔ ketue, bɔ́ɔkɛ nyɔngɔ nde. 11 Nna kema nde aongia k'aphe á nɔkɔ á nkpa, a unge aomǔja. Nnde aotoka k'aphe á nɔkɔ, a ndiu unge aomǔja nkpa.»
12 Mpɔ bagoigi báɔnsɛkɛdɛa Yéso, báongeae: «Uubha ka gea te, mɛni ndɔ ɛ̌̀bɛisima baPhaisáiɔ phɛ̂?»
13 Yéso áǒsikisia te: «Mbo bhubhui nde abhɛ mmbɔ a na kobha kákoni, bákpoande.»
14 «Odeketani baPhaisáiɔ. Nga, bánde bakeime-ime bundɔ báobotanaga. Aoba keime-ime moti naombota dhakɛ, bɔ babɛ báguiande k'ecia du!»
15 Mpɔ Pɛ́tɛɛ áongodea Yéso te: «Osongodea phɔ cina á mɛni á kema ndɔ aotoka k'aphe á nɔkɔ.»
16 Yéso áɔyɔnga te: «Caa baya! na benu phɔtɔ. Bókûubhapha? 17 Bókóengetisimbe? Bókûubha gea te, eea bhubhui nde nkpa aoea, a unge aɔtɔngana ka sɔphɔ, mbusa áomaka ka ntɔbɔ? 18 Kema nde a gǎkɛ otoka ka měma a nkpa, a unge aojuana k'aphe á nɔkɔ akɛ, na kema ndɔ unge aonjenanisa nkpa. 19 Nga, kanisia ajede aotoka subi á měma a nkpa, áombota gea á kema ajede bea: moa á nkpa, otungɔ, komusɔngɔ, kuba, yɔnga á mbɛa mosa á nteni-nyɔngɔ, mbhoma. 20 Nndɔ unge aonjenanisa nkpa. Cɔ, eaga gǎkɛ kanga á sokosa á njaga bíndɔ baPhaisáiɔ báoimisia, nna ndɔ unge aɔtɔka nanjenanisi nkpa.»
Beekea ndea mɔkɛni
21 Yéso áotoka oa, áoga bhibhi á Tílɔ na Sidhɔ́na. 22 Oa, nke moti dátú ntɔa-ka-Kanána, áombhikia Yéso naokoga k'ɛsɔ akpɛ: «Mɔkɔta, Mosuko á Dhaúdhi, ómokuia phɔ ngomi. Nseka nɛmɔ aosamba phɛ̂ na kukua á bansombo.»
23 Yéso dákánsikisii tanda nyɔngɔ moti. Bagoigi nɛkɛ báombhikia, báondengemisaga: «Mbeaga nke nde, nga, asúundi n'eongo nɛkɛ phɛ̂!»
24 Yéso áǒsikisia te: «Mokonga amoteki ndiu tɔ ka baIsilaɛ́li bundɔ bá bea bamɔgɔgɔ nabábungigi.»
25 Oa ndɔ gǎkɛ, nke ndɔ áombhikia, áogbuka muanku mosa akɛ, áongeae: «Mɔkɔta, ɔ́mɔɛnjia phɔ cɛɛ!»
26 Yéso áonsikisia ka mɛni be: «Kákeni bhɛda á eea ndea baniki, na makai sɔsɔbɛ a bambɔa.»
27 Nke ndɔ áɔyɔnga te: «Eya Mɔkɔta, nndɔ ɔyɔngi ndɔ, ande doni akɔ. Bambɔa phɔtɔ báoea ɛgbɛdua á moko abɔ.»
28 Mpɔ Yéso áonsikisia: «Onde ntɔa-beekea angbo phɛ̂. Kema nde okondi, átɔtɔkɛanɛ.»
Kɛkɛ ndɔ, nseka nɛkɛ áoama.
Amisa á basambi ba asi
29 Mbusa, Yéso áotoka oa, áɔnyɛnya ka nkpangba á Galiláia. Aodapha mamba, áoika. 30 Usɛsɛ á bakpa báombhikia. Bâ goto ombhikia na basambi buangbo ba asi phɛ̂ bea: badɔti, bakeime-ime, babhetu, bakauma, báǒbhisa k'ecinji akɛ, áǒamisa.
31 Bakpa báoyayama phɛ̂, bii bɛ́ɔni bakauma nabáɔyɔnga, babhetu nabáami, badɔti nabáotamba, bakeime-ime nabáɔɔnapha. Ka bondɔ, báombhebha Mokonga ndea Isilaɛ́li.
Isa á usɛsɛ á bakpa
32 Oa ndɔ, Yéso áɔ̌ɔphana bagoigi nɛkɛ, áǒngodea te: «Někui bakpa nde ngomi phɛ̂. Nga, niiki n'abɔ oani esa isaɔ. Kɛkɛ nde, bána ye gǎkɛ n'eea. Kékondi gǎkɛ básikianɛgɛ mɔtɛbɔ kanga á eaga. Nga, básiande na nja k'aphe.»
33 Bagoigi nɛkɛ báomǔsia: «Bɛɔnande eea k'osaa nde ka isa a bakpa nde bɔbhu oa?»
34 Yéso áǒngodeae: «Bo na mbondo kunga oa?»
Báonsikisia: «Saba, na baniki á basu ba abhɔa bende.»
35 Cɔ, Yéso áǒsosea bakpa báikɛ ka odo. 36 Aɔbhɛda mbondo saba na baniki á basu ndɔ, áombhebha Mokonga, áobunaga, áǒgabhea bagoigi nɛkɛ, bâkoopha bakpa.
37 Báoea bɔbhu, báokuta. Mbusa, bagoigi nɛkɛ báɔkɔngɔa dhue á bakpa ndɔ, báotumisa jɔ saba. 38 Bundɔ dábai, dábatú boko ɛlɛphu gena, kanga á tanga a bake na baniki.
39 Mbusa á jisa a bakpa, Yéso áokambea ka koko, áoga na Magadháni.