Mɛma á ketangaɔ angbo
16
1 BaPhaisáiɔ na baSadhukáiɔ dábambhikii Yéso. Báontombaga gea, éphangiɛ ketangaɔ á mphaniɔ ka ɔnisa abɔ gea, atoki na bukpɛkpɛ nɛkɛ ka Mokonga.2 Yéso áǒsikisia te: «Ɔgɔgɔ, boogea, mɔtɛsu egugu a ye tɔ anjɛ. Nga, mani abɛtande mama. 3 Ka mbimba, boogea, esa a ajede, ka nyɔngɔ nde ego anjɛnjɛmani nakpangi inda. Cɔ, boodigimisa esa, bɔɔɔna mphaniɔ nde aogeana ka matu nde, bókó gǎkɛ odigimisa tɔmiagai. 4 Ai! benu batɔ-ɛ́bɔkɔti ajede, batɔa-kanga-á-beekea Mokonga! Boomǔsia ketangaɔ? Bɛndɔ. Tɔndɔ ketangaɔ bea kema ndɔ Mokonga dági ka Yɔ́na.»
Ka bondɔ, áǒdeketa, áoga nɛkɛ.
Bɔphɛi gu á baPhaisáiɔ na baSadhukáiɔ
5 Mbenɔ nde Yéso na bagoigi nɛkɛ dábajabhi kubhi ibo, báobosea mbondo. 6 Yéso áǒngodeae: «Oambani na cacu ndea baPhaisáiɔ na baSadhukáiɔ.»
7 Bagoigi báɔyɔngaga sɔsɔbɛ abɔ: «Agi bo, béké na mbondo?»
8 Yéso áǔubhia, áǒgeae: «Eke nde bɔɔyɔngɛaga sɔsɔbɛ anu ka gea bókó na mbondo, benu batɔa-beekea-abhɔa nde ca? 9 Bókodigimisimbɛ mɔnɔ? Bókóokanisia bii débunigi mbondo bɔku ka bakpa ɛlɛphu bɔku ndɔ? Dóbotumisi jɔ kungaani? 10 Na mbondo saba ka boko ɛlɛphu gena ndɔ? Cɔ, dóbotumisi goto jɔ kunga ani? 11 Eke nde bókóodigimisa gea dékétúoabha nyɔngɔ á mbondo, mbenɔ ndɔ dénogi, óambani na cacu ndea baPhaisáiɔ na baSadhukáiɔ?»
12 Mpɔ bagoigi nɛkɛ báodigimisa gea, Yéso dákéngodi, béambɛ na cacu ndɔ a subi á mbondo. A ndiu nyɔngɔ á bɔphɛi á mbɛa ndea baPhaisáiɔ na baSadhukáiɔ.
Boabhi ndea Pɛ́tɛɛ, gu á magombo ndea Yéso
13 Yéso áoga na bagoigi nɛkɛ nkɛkɛɔ á Kaisalía-Philípɔ. Bii aju, áuusia te: «Bakpa báɔyɔnga gea, eme Muna-Nkpa, nende ani? »
14 Báonsikisiae: «Bakpa buangbo báɔyɔnga gea onde Yoáni-Mbatisi. Buangbo báɔyɔnga gea onde Ɛlía, buangbo goto Yɛɛmía, buangbo, ka baɔtu-nyɔngɔ.»
15 Yéso áuusia: «Cɔ, benu gǎkɛ, bogi te nende ani?»
16 Semó-Pɛ́tɛɛ áonsikisiae: « Onde Kiísito, mmbe Mokonga ansɔmbu, goto Muna-Abhabhisa-Mɛyɔ. »
17 Mpɔ Yéso áongodea: «Bosegi k'obɛ Semó Muna-Yoáni. Nga, nna nkpa ambe akophangigi nyɔngɔ nde. Abhɛ tɔndɔ mmbe a na kobha a ambe akophangi. 18 Eme neogi gǎkɛ be: Onde Pɛ́tɛɛ. Ande gea te ‹Ɛtɛ›. Gu ɛtɛ ndɔ, nɛphɛkande kanisa nɛmɔ. Goto, bukpɛkpɛ á Adhɛ́sɛ, nji á basi, kátɔkɛku nagusi mɔphɛkɔ ndɔ. 19 Nekophande phembekete á koboamɛ á na kobha. Nyɔngɔ bhui nde oboande ka mokonda, Mokonga aboande phɔtɔ na kobha. Goto, nyɔngɔ nde okodande ka mokonda, Mokonga akodande phɔtɔ na kobha.»
20 Mpɔ áǒimisia bagoigi nɛkɛ: «Bókongodeɛ mɔnɔ nkpa gea nende Kiísito. »
Boabhi á kukua na jujuka á Yéso ka kukua
21 Kpanga á oa, Yéso áǔubhisa bagoigi nɛkɛ bhase gea: «Akeni négɛ na Yɛusalɛ́ma ka tambaga ka njaga á bagbɛga á ka Yɛusalɛ́ma, bakɔta á baphɛ́i, na baphangigi-ɛɔphi. Bámokusande, esa á ko isaɔ, Mokonga amojujukisande ka kukua.»
22 Oa, Pɛ́tɛɛ áɔmɔphana Yéso ka mpɛphɛ, áokpanga phekeaga akɛ te: «Ai! Mɔkɔta, kabɛ mɔnɔ bondɔ. Mokonga ákpɛmɛ nyɔngɔ ndɔ!»
23 Yéso áǒphaia ka Pɛ́tɛɛ, áongeae: «Toka oa ca, obɛ Sɛtáni moamɛ á bansombo. Onde ephiphi ajede k'eme. Nga, kanisia akɔ nnaotoka ka Mokonga, tɔndɔ á kokpa.»
24 Mpɔ Yéso áǒngodea bagoigi nɛkɛ: «Aoba nkpa nakondi bea ani, ádeketɛ ekondi nɛkɛ, ákumbɛ me á nkpatɔ á tambisaga akɛ, ámobeɛ. 25 Mmbe akondi amisa á nyama akɛ, abungisande měma akɛ. Mmbɔ a gǎkɛ obeekea bungisa á nyama akɛ ka nyɔngɔ ani, Mokonga anamisande. 26 Nkpa abande n'ɛtɔi sina, aobá́ nakɔngu nkumba bhui á ka mokonda nde, nabungisi měma akɛ? Nga, nna na nkpa nde aɔtɔka namphendi Mokonga ka nyɔngɔ á sikisa a měma akɛ. 27 Eme Muna-Nkpa, nebhikaeka goto ka bophombia ndea abhɛ, kimoti na bamalaeka nɛkɛ. Oa ndɔ, nemphendande nkpa ka beana na tambea akɛ. 28 Nenógie, ka bakpa nde bá oani, buangbo bákákuɛku mosa á ɔna ani, eme Muna-Nkpa, neneobhika bea moamɛ ndea bakpa bɔbhu.»