Eketia á keongi á Yéso
17
1 Mbusa ésa sita, Yéso áɔ̌bhɛda Pɛ́tɛɛ, Yakɔ́bɔ na munamakɛ Yoáni, báoga ka mamba endanda. 2 Ko, keongi akɛ áǒketia mosa abɔ, áǒtoboa bea mani. Ngɔmbɛ nɛkɛ áobhusumana phɛ̂. 3 Mpɔ bagoigi báɔ̌bɔna Mósa na Ɛlía, nabáoabha na Yéso. 4 Ka bondɔ, Pɛ́tɛɛ áongodea Yéso te: «Mɔkɔta, a anja ka besu ba oa. Aoba nokondi, nɛphɛkande ngbangba isaɔ: moti k'obɛ, moti ka Mósa, moti ka Ɛlía.»5 Na phɔtɔ ɔyɔnga, egugu á boombia ndea Mokonga áǒgbukumia. Ɛsɔ á Mokonga áɔɔkɛkana k'egugu ndɔ be: «Mmbe ande miki nɛmɔ ékondi, mɔ̌kani.»
6 Bagoigi báɔki ye ɛsɔ ndɔ, báobanga phɛ̂. Báokpungbumanaga.
7 Yéso áǒbhiimisia, áǒdhunga, áǒsosea: «Mani. Bókobangɛ mɔnɔ.»
8 Báoma, báokoda iso, bâ yetɔ ɔmɔ̌na Yéso sasa akɛ.
9 Mpɔ báodhidha mamba. Nabá phɔtɔ odhidha, Yéso áǒsosea te: «Bɔ́kɔntɔmiɛ mɔnɔ nkpa nyɔngɔ nde bɔɔni koni, na ka bii eme Muna-Nkpa nejujukaeka ka kukua.»
10 Mpɔ bagoigi báomǔsia Yéso te: «Nyɔngɔ sina nde baphangigi-ɛɔphi bámáɔyɔnga te, akeni Ɛlía ábhikɛ phɔ mosa á bhika á Kiísito?»
11 Yéso áǒsikisia: «Doni, Ɛlía aobhika. Abɔngisiande nyɔngɔ bhui. 12 Cɔ, nenóngodi gǎkɛe: Ɛlía abhiki mɔnɔ tɔ kala. Bakpa dábákándigimisi gea, ande Ɛlía. Báongea na kema bhui ndɔ dábakondi. Bondɔ unge bámotambisagande, eme Muna-Nkpa.»
13 Oa, bagoigi báoengetisa gea, aɔyɔnga nyɔngɔ á Yoáni-Mbatisi.
Amisa á ntɔa-ega
14 Mbusa, Yéso na bagoigi báojua bii bakpa ba asi dábaombondea, kusi á mamba. Oa, nkpa moti áombhikia Yéso, áongbukia muanku, áondengemisaga gea: 15 «Mɔkɔta, nkuia phɔ miki nɛmɔ ngomi. Nga, a na ega. Mbenɔ nde aɔnkpɔkpɔmisaga, áoguia ka nsa, goto k'ibo. 16 Nembhikima ne ka bagoigi nɛkɔ, bákátɔkima gǎkɛ amisa akɛ.»
17 Yéso áogeae: «Benu ɛbɔkɔti á batɔa-kanga-á-beekea na babungigi nde ca! Niikande mɔnɔ na benu mbenɔ kuunga ani? Mbenɔ kuunga ani nde nenóphiphiande? Cɔ, mbhikisani miki ndɔ koni.»
Mpɔ báombhika ne.
18 Yéso aubhi ye gea te kukua ndea miki ndɔ ande kukua á bansombo, áophumba kukua ndɔ, nsombo, áotoka. Mɔngɔ moti, miki ndɔ áoama.
19 Mbusa, bagoigi báɔsɛkɛda mosa á Yéso, báomǔsia sasa akɛ: «Nyɔngɔ sina nde bɛ́kɛ́tɔkima phumba á nsombo ndɔ ne?»
20-21 Yéso áǒgeae: «Beekea anu a abhɔa phɛ̂. Nenógie, atúoba nobo na beekea abhɔa bea mbuka á kpɔngbɔ, botóngeande mamba nde: ‹Toa oa, ógɛ ko!›, áoga. Kema kátónokpageɛku gǎkɛ.»
Ko ibɛ á ɔtɔa a kukua á Yéso
22 Esa moti, Yéso na bagoigi ba asi dábadhondani ka Galiláia. Yéso áǒgeae: «Eme Muna-Nkpa, bámobhisande ka njaga a babibia. 23 Bámomoande, néokua. Mbusa ésa isaɔ, Mokonga amojujukisande ka kukua.»
Ka bondɔ, bagoigi báoianaga phɛ̂.
Phendisa á manjanja subi éndu a Mokonga
24 Mbenɔ nde Yéso na bagoigi nɛkɛ bákidi ka Kapɛɛnaúmu, baphendisigi-manjanja á subi éndu a Mokonga, báɔnsɛkɛdɛa Pɛ́tɛɛ, báomǔsia: «Mphangigi nɛnu nnaophenda manjanja éndu a Mokonga?»
25 Pɛ́tɛɛ áonsikisia: «Eya, a mɔnɔ ophendaga.»
Bii Pɛ́tɛɛ angi ye gǎkɛ subi éndu, Yéso â phɔ okpanga usia akɛ: «Semó, okanisi bo? Ba ani baamɛ á ka mokonda nde báǒphendisa manjanja: baniki á nji? bakɛni?»
26 Pɛ́tɛɛ áonsikisia: «Bakɛni tɔndɔ.»