Animbe ande ngbɛga ka koboamɛ ndea Mokonga?
18
1 Mbenɔ ndɔ, bagoigi ndea Yéso báombhikia, báomǔsia: «Animbe ande ngbɛga ka koboamɛ ndea Mokonga?»2 Ka sikisia abɔ boabhi, Yéso áɔmɔphana miki abhɔbhɔa, áomamisa mosa abɔ, 3 áɔyɔnga: «Nenógie, aobá́ nobókóketi tambea anu ábɛ bea tambea á miki nde, bókóngiɛku ka koboamɛ ndea Mokonga. 4 Nkpa nde ɛ̌̀bhɔbhɔmisi gǎkɛ bea miki nde, abande ngbɛga phɛ̂ ka koboamɛ ndea Mokonga. 5 Mmbɔ aonsesea miki abhɔbhɔa bea mmbe k'ina ani, amosesi eme. 6 Nkpa nde aongusa ka baniki ndɔ amobeeki, atókeni bámboɛgɛ phɔ na moimba ka kingo pɛ! Bámakeɛ ka kibha du!»
7 «Ayo! batɔa ka mokonda, ka nyɔngɔ nde nyɔngɔ danga-danga aógusa ka bojede. Nga, nyɔngɔ ndɔ ageanande. Ayo! ka nkpa ndɔ aongusa dhakɛ. 8 Aoba njaga n'ecinji akɔ naokobotea ga ka bojede, tena, ómakɛ danga n'obɛ. Akeni óbɛ ndɔti ka koboamɛ ndea Mokonga, kanga á makea nyama akɔ bhui k'oanga á nsa. 9 Aoba mbuk'iso akɔ naokodhemaga, mphongota ómakɛ danga n'obɛ. Akeni óngiɛ ka koboamɛ ndea Mokonga na mbuk'iso moti, kanga á maka akɔ n'iso ibɛ k'oanga á nsa.»
10-11 «Ka bondɔ, óengani. Bɔ́kɔ̌bɛnjiɛgɛ mɔnɔ babeeki bea baniki nde, ka nyɔngɔ nde bá na bamalaeka nɛbɔ bundɔ bá esa bhui mosa á abhɛ mmbɔ a na kobha.»
Mɛni á mɔgɔgɔ nabungigi
12 «Bookanisia bo, aobá́ nkpa na na bamɔgɔgɔ mia, ka bɔ moti nabungigi, ageande bo? Edeketande bundɔ nkama tisa na tisa guá mamba, áoga onkaba mmbɔ abungigi. 13 Aoba namɔ̌ni, abande na maseye ka yɛ, kɔnyɛnya bundɔ bákábungigi. 14 A gǎkɛ tɔ bo k'abhanu mmbɔ a na kobha. Nnaokonda ka babeeki nɛkɛ moti ábungɛgɛ.»
Bɔphɛi gu á mbeeki nagi ajede
15 «Aoba dhakɔ nagi ajede, ga óndhondɛ, ɔ́mphɛ̂ ka nyɔngɔ á bojede nɛkɛ. Bani tɔ na yɛ bakpa babɛ. Aoba naɔki bɔphɛi nɛkɔ, a bea nkpa ndɔ abungigi, nɔmɔ́ni goto. 16 Cɔ, a gǎkɛ oba nakákondi ɔka á bɔphɛi nɛkɔ, mɔphana mbeeki moti, kabɛ babeeki babɛ, ósikiɛ goto bɔphɛi nɛkɔ mosa abɔ, bíndɔ buku á Mokonga asóngodi gea:
Aoba nɔntɔngi nkpa, ambe bakpa babɛ bundɔ bátɔ́ɔni kema ndɔ nanyɛnyi, bákomameɛ.
17 Aoba nkpa ndɔ nanókpɛmɛi, ntɔngani nkpa ndɔ mosa á madhondanɔ á babeeki. Aoba nkpa ndɔ nakpɛmi nyɔngɔ ndea madhondanɔ, mbeagani. Abɛ ka benu bea mphendisigi-manjanja na moPaganɔ.»
18 «Nenógie, nyɔngɔ bhui nde boboagande ka mokonda, Mokonga aboagande phɔtɔ na kobha. Nyɔngɔ nde bo gǎkɛ okodaga ka mokonda, Mokonga akodagande phɔtɔ na kobha.»
19 «Nenóngodi goto gea, aobá́ bakpa babɛ sɔsɔbɛ anu ka mokonda nabáɔkani k'ɛmɛmi, abhɛ mmbɔ a na kobha ěophande. 20 Nga, ɔma nde bakpa babɛ, kabɛ basaɔ nabádhondani k'ina ani, eme ne sɔsɔbɛ abɔ.»
Mɛni á mbhɛdanigi kanga á ngomi
21 Cɔ, Pɛ́tɛɛ áoga ondhonda Yéso, áomǔsia: «Mɔkɔta, nédeketɛ bojede ndea dhani mɔngɔ kunga ani, aobá́ naɔsɛkisiaga gea ani ajede? Mɔngɔ saba?»
22 Yéso áonsikisia: «Bɛndɔ, nna mɔngɔ saba. A ndiu mɔngɔ nkama saba na saba, 23 ka nyɔngɔ nde koboamɛ ndea Mokonga a bende: Moamɛ moti dákondi tanga á bangɔa nɛkɛ na bagbɛga ékuma nɛkɛ. 24 Bii dákpangi tanga ndɔ, báombhikia na ngbɛga moci mmbɔ dátú na nyɔngɔ óphendɔ á basaga nkama moti na bɔku ékuma. 25 Mogaa ndɔ dákátú gǎkɛ na bukpɛkpɛ á sikisa á bangɔa ndɔ. Ka bondɔ, moamɛ áososea gea, bánsombisɛ bea nkɔbɛ: yɛ, nkakɛ, baanakɛ na nkumba nɛkɛ bhui ndɔ dátú ne, ka phenda á nyɔngɔ nɛkɛ. 26 Mbhɛdanigi ndɔ, â gǎkɛ ogbuka muanku mosa á moamɛ ndɔ, áondengemisaga: ‹Omokuia phɔ ngomi, nga, nekophendande bangɔa nɛkɔ bhui.› »
27 «Moamɛ ndɔ, áonkuia mogaa ndɔ ngomi. Aonsagea nyɔngɔ ndɔ bhui. Mogaa ndɔ áoga nɛkɛ. 28 Toka ake oa, áodhondana na dhakɛ moti mmbɔ dátú na nyɔngɔ óphendɔ ésa mia moti ékuma nɛkɛ. Aondhunga, áonkpata ka kingo, áongeae: ‹Phenda bangɔa nɛmɔ bhui kɛ̌kɛ nde!› »
29 «Dhakɛ áogua k'ecinji akɛ, áondengemisaga: ‹Dhani, ómokuia phɔ ngomi, nekophendande.› »
30 «Cɔ, mogaa ndɔ kakondɛ. Aondhungisa dhakɛ, áomakisa ka mekakɔ na ka bii amphendakuma.»
31 «Bii badhakɛ babhɛdanigi dábaɔni ye kema ndɔ agi, báoianaga phɛ̂. Báoga ɔntɔmiaga mɛna-ékuma nɛbɔ kema bhui ndɔ dágeani.»
32 «Mpɔ moamɛ, mɛna-ékuma ndɔ, áɔmɔphana mogaa ndɔ, áombhoma: ‹Mbhɛdanigi ajede nde ca! netósagi nyɔngɔ nɛkɔ bhui, ka nyɔngɔ nde otómodengemisigi. 33 Atókeni phɔtɔ obɛ ónkuiɛ dhakɔ ngomi, bíndɔ eme phɔtɔ netóokui ngomi.› »
34 «Moamɛ áɔbɛa phɛ̂, áondhungisa mogaa ndɔ, áomakisa ka mekakɔ. Ko, áososea bindisa akɛ na ka bii aphendaeka bangɔa nɛkɛ bhui.»
35 Yéso áotutuisa yɔnga be: «Abhɛ mmbɔ a na kobha ageaeka tɔ bo, ka nkpa ndɔ nnaokonda bosea á bojede ndea dhakɛ ka měma akɛ bhui.»