Bɔphɛi gu á keye
19
1 Bii Yéso agɔbi ye bɔphɛi nɛkɛ danga-danga subi á Galiláia, áɔmɛa, áoga na Yudhɛ́a, kubhi a Yɔɔdháni. 2 Oa, usɛsɛ á bakpa báombea. Akǒamisa basambi. 3 BaPhaisáiɔ buangbo báombhikia ka tomba akɛ, báomǔsia: «Ɛɔphi nɛsu asosi gea moko a na bukpɛkpɛ á ya a nkakɛ ka nyɔngɔ bhui?»4 Yéso áǒsikisia: «Bókótangimbɛ mɔnɔ subi á buku á Mokonga nyɔngɔ á conja á mokonda, bii agi, Abhabhisa déconji moko na nke? 5 Ka bondɔ, Abhabhisa agi:
Moko andeketande abhakɛ n'amakɛ, áomboa nke, báoba bea nkpa moti.
6 Ka bondɔ, bákábɛku ye bakpa babɛ, bábande ndiu bea nkpa moti. Cɔ, nkpa kěkatanisɛmbɛ bundɔ Mokonga ědhondanisi.»
7 BaPhaisáiɔ bâ goto omǔsia: «Cɔ, nyɔngɔ sina nde Mósa dádundu gǎkɛ ɛɔphi gea, akeni moko ámophɛ nkakɛ kasa á keye mbenɔ nde akondi ya akɛ?»
8 Yéso áǒsikisia: «Mósa dánophi ɛɔphi ndɔ ka nyɔngɔ á gbaga á měma anu, benu baYúdha. Dákátú gǎkɛ bo mosa. 9 Nenógie, aobá́ nkpa nanye nkakɛ jai-jai na nna ka nyɔngɔ ótungɔ, aobá́ nambu nke ba angbo, atungani ye tɔ yɛ sasa akɛ.»
10 Mpɔ bagoigi nɛkɛ báongea ka nkpangba te: «Nyɔngɔ á nke na moko ayéoba bondɔ, cɔ, kákeni ye pɛ ɔmana?»
11 Yéso áǒgeae: «Doni, bakpa bɔbhu bákábeekeɛku nyɔngɔ nde, tɔndɔ bundɔ Mokonga ěophi bukpɛkpɛ ka měma. 12 Nyɔngɔ danga-danga unge aóimisia bakpa ɔmana. Buangbo bábɔkɔtɛani kanga á bukpɛkpɛ á boa á nke. Bakpa buangbo bá unge bétongu. Buangbo bánaɔɔmana ka nyɔngɔ á bhɛdaneaga a Mokonga ka koboamɛ nɛkɛ. Nkpa nde a na bukpɛkpɛ á beekea nyɔngɔ ndɔ, ábeekeɛ.»
Yéso na baniki
13 Bakpa moti-moti dáběbhiki na baniki nɛbɔ gea Yéso ábhisɛ njaga na mɛma gu abɔ. Bagoigi bâ ndiu ǒpheneaga babɔkɔti ndɔ. 14 Bii Yéso aɔni gǎkɛ bo, áogeae: «Odoani baniki bábhikɛ mosa ani. Bókǒpheneɛ mɔnɔ. Nga, koboamɛ ndea Mokonga a ka bundɔ bá bea baniki ndɔ.»
15 Oa ndɔ, Yéso áobhisa njaga akɛ gu á baniki ndɔ, áɔmɛma, mpɔ áoga.
Animbe aamaeka?
16 Dáitɔ esa moti, nkpa moti áombhikia Yéso, áǒmǔsia: «Mphangigi, kema anja sina nde négeɛ nébɛ na enda bea mɛyɔ?»
17 Yéso áǒsikisiae: «Nyɔngɔ sina nde omuusi nyɔngɔ á kema anja? Mmbe a anjanja, a tɔ Mokonga. Aoba nokondi ba na enda bea mɛyɔ, cɔ, amba pɛ ɛɔphi bhubhui ndea Mokonga.»
18 Nkpa ndɔ â goto uusia: «Ɛɔphi sina?»
Yéso áonsikisia: «Komoɛ mɔnɔ nkpa, kotunganɛ mɔnɔ, kuubɛ mɔnɔ, kɔnyɔngɛɛ mɔnɔ dhakɔ mbɛa, 19 mɔ̌ka abhakɔ n'amakɔ, nkonda dhakɔ bíndɔ ǒkondi obɛ sasa akɔ.»
20 Moganda ndɔ áongodeae: «Neambi ɛɔphi ndɔ bhubhui. Kema sina nde amojiganei goto?»
21 Yéso áongea te: «Aoba nokondi ba ntɔa-anjanja phɛ̂, ga ósombisɛ nkumba nɛkɔ bhubhui, óophɛ batɔa-buyɛnɛ bokambia nɛkɔ bhui. Bhika ómobeɛ, mpɔ obande n'ɛtɔi asi na kobha.»
22 Bii moganda ndɔ aɔki ye bo, áoga nabɛi, ka nyɔngɔ nde dátú ntɔi-phɛ̂.
23 Cɔ, mpɔ Yéso áǒngodea bagoigi nɛkɛ: «Nenógie, abande akpɛ ka batɔi ngia abɔ ka koboamɛ ndea Mokonga. 24 A akpɛ ka nyama bea njae phoda ka kubhu á muphi. A goto akpɛ phɛ̂ ka ntɔi ngia ka koboamɛ ndea Mokonga.»
25 Bii bagoigi báɔki ye bo, báoyayama phɛ̂, báomǔsia: «Cɔ, animbe aamaeka?»
26 Yéso áɔ̌ɛnjia, áǒsikisia: «Nkpa nnaɔtɔka, tɔndɔ Mokonga mmbɔ a na bukpɛkpɛ bhui.»
27 Oa, Pɛ́tɛɛ áongodea Yéso: «Na besu gǎkɛ, uubha gea bedeketi kema bhui ka bea akɔ. Bɛtɔande kema sina?»
28 Yéso áǒngodea: «Ubhani doni gea, eme Muna-Nkpa, niikaeka gu á kakaanga á mokonda á kɛ̌kɛ. Mpɔ benu babeeki nkama moti na babɛ bundɔ dóbomobi, boikaeka goto gu á kakaanga nkama na ibɛ. Bóotena nyɔngɔ ékuna á ketoto nkama na ibɛ ndea baIsilaɛ́li. 29 Na bundɔ dábadeketi endu nɛbɔ, banamabɔ, basae nɛbɔ, babhabɔ, bamabɔ, baniki nɛbɔ, na ciko nɛbɔ ka nyɔngɔ ani, něsikisiande kema bhubhui ndɔ mɔngɔ mia. 30 Bakpa ba asi bundɔ bá na boombia ka mokonda, bábaeka kanga á boombia ka koboamɛ ndea Mokonga. Na bundɔ bána na boombia ka mokonda, bábaeka na boombia ka koboamɛ ndea Mokonga.»