15
Blong duoyap yakay genang-a se
1 Dem debui blong duoyap! Dabui don maning kua kok go andua nogo, gigling ey, imot dabui don kok golo se tebok! Imot tang go nogo-a kua duduing. 2 No, andua meno go wali teguop go, buong genang ey imot klay-klay lo se duing. 3 Blong Dem nogo ey se duing: Nemot tang go-a kua duing. Wali Sam klaut no Nemot sogo ngge mo klik,
“Ki Wali Iram so wayang go ide,
Genam blo sono mo gluik sang.” a
4 Se senong: Wali Sam klaut nogo naklay ngga, imot nguok genang so mo klik. Wali Sam klaut sik sogo nebut logo so, imot don kok go, dabuisusuot so mea suing. Ngga ey, don ey Iram Yesus nogo duduingbubung genang. 5 Don ey suing genang, dabuisuot nuik Ki Wali Iram-a gabe. Way-way so dabui klaya ngengam so wali genang ngga, motnang Iram Yesus lo mo pu. 6 Dabui klaya motnang iti go, Ki Wali Iram, imot go Woy Dem, Iram Yesus go Nglangin nogo, iway klay gono mea i-iti.
Saula-saula sono deguo teguop pen go
7 Yahudi saula ey, saula meno eygo sik sogo blong duoyap! Way-way sogo motnang, Iram Yesus lo wawi go kalik, se uwawi! Yang! Ngga tang so, blo sono Ki Wali Iram nogo iway i-iti genang. 8 Se tup! Sikabung Yahudi nogo-a, kebalisedue so Blong Dem mo lemoy. Ngga lo taling genang: kekeng genang, nemudi sogo, Ki Wali Iram-a gabe. Tegadi so babuasi no dok go ngga, Ki Wali Iram tang golo gabe lelemoy! 9 No, Danon pung golo, ngge lemoy dali genang: Ki Wali Iram go gualaklum, saula temu no taling go tang so, blo sono go Nglangin nogo iway i-iti genang. Wali Sam klaut ba no ngge mo klik,
“Saula-saula nesip sik so,
Mot nogo iway, genam lo mea keklak.
Blo sono Mot go sui pu genang usam, genam lo mea kukluo.” (Mazmur 18:50)
10 Ngge kalik go mo klik dali gabe,
“Ki Waliblung kuoy go ey
saula-saula ey yakay se pepla!” (Ulangan 32:43)
11 Ngge mo klik dali,
“Saula-saula naklay Ki Wali Iram sono iway se iti!
Blo sono Nemot go sui iway sikabung naklay lo se pu!” (Mazmur 117:1)
12 Nggano, nabi Yesaya logo ngge mo pu dali,
“Isay lo tui go srang sik so tip mea pung;
Saula-saula tamlak genang Blong Iram Nemot gemang.
Sesuoy genang so duduing ey,
Nemot sogo-a saula-saula mea bubung.” (Yesaya 11:10)
13 Gabe pen-asitugu: imot dabui lo bubung genang nuik, Ki Wali Iram gabe. Dabui iti go tang so, Nemot sik sogo ngengam yakay lo motnang mea tram. Ngga ey, Ki Wali Waglo go don logo so, don ey Nemot sogo motnang lo bubung genang.
Kebali Paulus lo pupluok go don
14 Ayanang, mianang, blong duoyap! Ngge genam dabui lo mo senong: teguop go tap-a usey so motnang lo duduing. Senong duduing ey go, motnang-a gemang. Ngga tang so, way-way sogo nebutmang, motnang logo mea kiking dali. 15 Tap meno-meno, don ey sam ngge ba no mo pen-asitu! Nemot-a, mo senong go, tandali motnang duing genang so gabe mo klik. 16 Se senong! Iram Yesus go kebalisedue so genam-a, Ki Wali Iram go taitiklum lo mo temuit. Yangga: saula-saula nogo, Ki Wali Iram lo iti go deguo teguop, dabui lo penklong genang. Ngga ey saula-saula, Ki Wali Waglo lo teguop go, Ki Wali Iram lo iwat go taiti so nemotnang-a leguit genang.
17 Yang! Ki walikebali genam lo pupluok goso, yakay ey dabui ta genam lo tegue go, ngga Iram Yesus go don logo tang so gabe. 18 Iram Yesus lo pluok go-a, genam ba lo gabe tetaling. Yangga: genam lo pepen go, pupluok go ikum golo, saula-saula Ki Wali Iram no kengduk genang. 19 Ngge kalik so: takebali, tasam-tasam dega, Ki Wali Waglo go don logo so gabe tetaling. Ngga kalik golo, nan-nan naklay nogo Iram Yesus go deguo teguop, genam lo gabe penklong. Yakena Yerusalem idi sik so iti go, e… nan Ilirikum b idi sono gabe koklong. 20 Don ey ngge-a klaya genam lo mo duing: maning kua tup go sikabung sono, Iram Yesus sogo deguo teguop-a yambeto go genam lo se penklong. Yang! Tamot meno go kutrui tui go blo no klik genang, genam moyso. 21 Ngga kalik genam lo semu go, Wali Sam klaut ba no mo klik,
“Maning kua nguok go sikabung lo
Nemot sogo deguo pung go, mea ikum;
maning kua tup go sikabung lo
seni mea mlak.” (Yesaya 52:15)
Paulus Roma no klong genang atuia
22 Saula-saula miam ey Iram Yesus sogo deguo teguop maning kua tup go tang so, motnang Roma sogo blong duoyap ey tegu genang, maning kua lemoy. 23-24 No, nggeasui go nan-nan ngge nogo, genam go kebali mo yam gabe. Se senong: yaguiyam-yaguiyam, motnang klong go ikum so genam mo duen-sanyu. Nan Spanyol sono genam koklong go nogo, motnang yakena Roma sogo mit no, namboy mea degut. Suey so motnang eygo mea tegu. Ngga ey, Spanyol sono go tap masi, motnang tebok golo lemoy genang.
25 No, nggeasui go, yakena Yerusalem no banim mea belu, Ki Waliblung ngga sogo tebok genang taiti, iti go klong genang. 26 Se senong! Nan Makedonia ey, nan Akaya eygo blong duoyap logo taiti, Yerusalem sogo blung, taut kua go sono, iti go mea klong. 27 Ta lo kua plong gono no, dabui lo Makedonia ey Akaya eygo lo taiti mo iti. No, gabe pen-asitugu, “Sikabung Yahudi tang sogo so, banim temu no saula-saula nogo suey so taitiwalipega Ki Wali Waglo logo mo uwasey-sing. Ngga tang so, blong duoyap Yerusalem sogo nogo, saula-saula go taut lo way so se tebok dali. Nemotnang go ide temu, ngga lo tebuo genang.”
28 Ayanang, mianang! Taiti yaluim go ey klong go, suey so Yerusalem sogo blong duoyap go ta sono mea iti. Ngga ey, nan Spanyol sono genam mea klong. Tap masi ngga koklong go nogo, yakena Roma no namboy motnang ey mea tegu. 29 Se senong! Motnang mit no genam pung go nogo, Iram Yesus logo taitiwalipega dega motnang nogo ey, mea pung-abalu.
30-31 Ayanang, mianang! Imot go Woy Dem Iram Yesus go sui no, nggano, Ki Wali Waglo go gualaklum lo, motnang genam ey Ki Wali Iram sono, dabui lo dewi ngge don ey se uwadong: Yudea sogo sikabung kua keng golo uwayang go sik sogo, genam sesuoy genang; nggano dabui yakay ey, taiti ngga Yerusalem sogo Ki Waliblung lo iti genang. 32 Yang! Ngga kalik klong genang, Ki Wali Iram lo iwat go, motnang mit no pung go yakay lo, genam go dabui don mea kok.
33 Ki Wali Iram, ngengam yakay go nuik senang so motnang naklay ey mea susuing. Seni!