14
Andua blong duoyap sogo ta kua nat
1 Ayanang, mianang! Motnang eygo andua temu Iram Yesus nogo don ey maning kua keng go gemang. Demu-demu no keng sogo, maning nemotnang lo ne duduing. No, suey so nemotnang se uwawi, nebut-a kua sosok. 2 Don eygo lo pu go, “Tendam budrop naklay genam logo mea dam.” No, dabui don kua kok go logo, ulum seguong-a mea dedam. 3 Ngga kalik, tang kua pleng goso tebadali nando lo dedam go, tang ey pleng go andua-a ku sono nemot lo kua kenok. Way so mot sogo andua meno lo ta kua nat! Kua kay: andua ngga Ki Wali Iram lo mo wawi dali gemang. 4 Se duing: koybutasemu meno sono, sogo temoy no mot logo ta ya nat? Dabui lo nemot keng go, kua keng go, don eygo, don kua go, ngga nemot go woy dem go ba so gemang! Yang! Wisi so don ey andua ngga ip genang, Woy Wali Iram lo iti go mea kong.
5 Ayanang, mianang! Blong duoyap go tap bumeno-bumeno so gabe. Andua meno lo pu go, “Woy Wali Iram go walop ku, tang ey se usi: ku ngge-a teguop, ku ngga-a piam.” No, tang ey kua usi go andua lo pu go, “Ku naklay kerlam wa!” Gabe pen-asitugu, “Nemot tang so dabui iku lo iwat go-a se mlak.” 6 Nando lo tang ey usi go: walop pla genang ku ngga-a teguop! Woy Wali Iram nogo ta kokong genang so, nemot lo pu go. Tang kua pleng goso, tendam budrop go, Woy Wali Iram nogo takong genang so se pluok dali. Yang, ten so lemoy-ngam go nogo-a, taitisuey ey pu go se dedam. Andua meno-a kagot sogo, Woy Wali Iram no takong dali genang. Taitisuey ey, Ki Wali Iram sono gemang pupu.
7 Kua kay! Duduing tang go nogo so, klaya nang go imot ngge kua uwali. Ngga ey, duduing tang go nogo so, imot kebong go kua dali. 8 Wali sogo, kebong sogo, ngga Woy Dem seguong nogo so gabe.
9 Se duing: sikabung kebong go ey wali sogo ey tamlak genang so, Blong Dem Yesus kebong sik so tandali mo nglong. Nemot Iram gabe! 10 Ngga kalik, teguopey andua-andua sogo so motnang lo ne bebat? Ku sono, sogo so ne kekenok? Se senong: Ki Wali Iram go suongku no neyboy sogo, imot naklay mea ip-lak! 11 Yang, Wali Sam klaut no klik go,
“Woy Wali Iram lo pu go,
‘Seni so, sikabung klay-klay Genam go
suongku no mea unuik-sing.
Ngga ey, Ki Wali Iram sono, iway sikabung naklay lo mea pu.’ ” (Yesaya 45:23)
12 Ngga tang so, Ki Wali Iram go suongku no, imot klay-klay go takebali, tang mea pen.
Mot logo tang so anduasi pui genaning
13 Imot go takebali naklay Ki Wali Iram lo ya neyboy go, way-way sogo, tandali go imot ta kua nenat! Ngge-a se duing go pluok: genam tang go, sogo-sogo pupluok golo anduasi meno ikum go, masi kling go, kuklue ba no pui genaning.
14 Yang, Woy Dem Yesus ey klaya so genam lemoy go, dabui lo senong goso ngge gabe pu, “Seni so, tendam budrop klaya nang go, kagot sogo, kua gabe!” No, blong duoyap tang so pu go, “Kagot!”, nemot seguong nogo-a, gemang kagot. 15 Yang, tendam budrop logo so, andua meno-a mot lo wayang go, mot klum go tap lo kua koklong gemang! Yang, andua ngga sesuoy dali genang so, Blong Dem mo kebong. Gabe pen-asitugu, “Mot lo dedam go sik so, waluk genang tap kua taling!” 16 Teguop go, motnang nogo so, Ki Wali Iram lo iti go, paysing genaning!
17 Yang! Woy Wali Iram ta mlak go blongdon duduing ngga, tendam budrop tap kua. No, seni eygo, nemudi sogo, ngengam, yakay tap-a, Ki Wali Waglo lo pupluok go gabe. 18 Yang! Iram Yesus no nando tupduk keng go, Ki Wali Iram lo iwat go-a nemot lo gemang pupluok. Nemot nogo ta ey sikabung meno logo mea kong.
19 Ngge-a imot se usey: way-way so ngengam lo buong genang tap-a, se. 20 Kua kay! Blong duoyap ba no Ki Wali Iram lo pluok go kebali, tendam sik so kua waluk. Tendam naklay ngga teguop! No, ten ngga sik so, andua meno dabui ba nogo lekluik ey piam so lemoy go, ngga-a mot lo mo kuklue gemang. 21 Menay, anggul, lomdam meno-meno dedam golo, andua go dabui ba no piam so lelemoy go, mot logo kua dedam dali go-a, suey!
22 Ki Wali Iram go suongku no, mot go duduing, neyboy sogo-a se itak! Ki Wali Iram lo ikum go, iwat go, ngengam yakay-a mot blo sono mea li. Ngga tang so, dabui iku lekluik mea kua. 23 Se senong: dabui ba lekluik eygo tendam go, piam so Ki Wali Iram lo gemang mo pu. Ngga kalik lekluik ey pupluok go, dabui lo keng go tang sogo kua lelemoy. Kua kay: dabui klaya iti golo kua pupluok go, kuklue gemang.