16
Timotius Paulus ey Silas eygo mit no klong go
1 Paulusnang koklong, e... yakena Derbe ey Listra ey gono gemang pung. Ngga sogo, Yesus no dabui iti go keng go ngguot meno gemang. Yangga, Timotius. Timotius go unen Yahudi kabung, Yesus no dabui iti go mo keng dali. No, nglangin-a, sedue Yunani. 2 Yakena Listra ey Ikonium eygo sik sogo blong duoyap lo Timotius go sui blo sono gemang pu. 3 Paulus lo duing go, “Ngge suey! Genam no tebok genang, Timotius se keng.” No, Timotius denok sogo nogo saduisuk maning kua tong. Seni so, Yunani saula saduisuk tong genang kua senong. No, Paulus lo kekeng go tap so, sedue Yahudi mata sogo ngga lo wayang genaning, Timotius go saduisuk Paulus lo gemang tong-nawon. Nemot go nglangin saula Yahudi kua go, ibe naklay mo senong.
4 Nemotnang yakena-yakena no koklong go, tamot 12 ey blong duoyap go woy-woy Yerusalem sogo lo klik go deguo, blong duoyap sono gemang motdak-kesiton, “Demu ngga suey so se keng!” 5 Deguo ngga keng go nogo, yakena-yakena ngga sogo blong duoyap, Woy Dem no dabui naklay kangok so gemang iti. Ngga ey, Ki Wali Iram go tap no keng genang sikabung miam dega ey gemang tetebok.
Yakena Troas sono nan Eropa sik so usi go
6 Ngga ey, Ikonium sik sogo nan Pligia ey nan Galatia eygo sono gemang klong. Nan Asia seguay go sono degut genang so nemotnang gemang usey. No, Ki Wali Waglo lo sak-a gemang kok. 7 Nggano, nemotnang nan Misia ey nan Bitinia eygo sang blo no pung go, Yesus go Wali Waglo lo waydang go gemang pu, “Nan-nan ngge nogo kua degut dali.” 8 Ngganemot sogo so, nan Misia go tap lo, yakena Troas a sono nemotnang gemang klong. 9 Nan Troas no, wadi go sedi ba no ngge kalik Paulus lo gabe ikum, nan Makedonia sik sogo sedue klay duo ip go gemang usi-santon, “Nan Makedonia sono weng go, atnang pla tebok-a!”
10 Sedi ba no ngga kalik Paulus lo ikum gono, atnang b ip go bayi no keda so klak go, nan Makedonia sono gemang klong. Sedi ba no ikum go, atnang mo senong, “Ngga sogo sikabung no deguo teguop pen klong genang so, atnang Ki Wali Iram lo mot-dak go.”
Lidia Yesus go walitap no keng go
11 Yakena Troas sik so bayi no atnang klak go, nantebot Samotrake no gemang pung. Ngga sik so ngga utep ip go nan Makenodia, yakena Neapolis no gemang pung. 12 Nggano, yakena Neapolis sik so koklong go yakena Pilipi no gemang degut. Se senong: yakena Pilipi seni so, nan Makedonia sogo Distrik meno sono mo degut. Banim nogo, yakena ngga sedue Roma lo ta mlak go. Ngga tang so, ngga sogo Roma sik sogo plesedue mata so gemang. Seni so, yakena ngga Roma go woy-woy lo ta gemang mlak. Yakena ngga sogo ku, nago yam so atnang gemang suing. 13 Ki Wali Iram go ku Sabat nogo, yakena sik sogo bu ketang idi no atnang gemang klong. Atnang lo duing go, “Sip ngga sogo, sedue Yahudi go dewi so pupu go yap gemang mo.” Ngga no pung gono, kabung-kabung yaluim go nogo, Ki Wali Iram go tap so gemang pepen. 14 Ngga sogo kabung meno, Lidia gemang. Nemot go unen yakena Tiatira, nan Asia Seguay go sik sogo. Lidia go kebali, amka kibam suk sogo suey-suey go-a duoy nay so idok go. Nemot-a Lidia Yahudi kabung kua, Ki Wali Iram no ta gemang kokong. Nebut so Paulus pepen gono, Lidia go dabui yatap Woy Dem lo mo tenuing. Seni so, Paulus lo pen go nebut naklay nemot go dabui ba no gemang tui-natun. 15 Woy ngganemot no, Lidia, nemot go yap tenglam naklay ey bu gemang degut-nenawon. Bu degut gono, nemot lo pu go, “Paulus! Genam mo senong! Genam kabung gabe. No, seni so mot lo duing go, Yesus Iram so dabui ba no genam mo wawi go degut-tu go, nggeasui go, genam no glop so motnang se weng!” Lidia go nebut ngga kalik plong go tang so, nemot no atnang se keng-lak.
Yakena Pilipi sogo boy ba no degut go
16 Ku meno no, Yahudi go dewi yap no atnang koklong go, kabung meno ey gemang tegu. Yangga, woy meno go koybutasemu. Seduetebok kabung ngga nogo mata so gemang. Ku santegun gono lemoy genang tasam-tasam naklay ikum go, duoynay so, sikabung temu nogo nemot lo mea pepen. Ngga kalik go kebali sesemu go nogo, duoy mata so nemot go wengkabui nogo so gemang iyaluim. 17 Ku ngganemot no, atnang Paulus eygo no, mesip so keng go kabung ngga gemang koklong. Ngga ey, ngge kalik taling sogo gemang tra-situgun, “Sesuoy tap Ki Wali Iram sik sogo taling genang so, sedue-sedue ngge lo pepen go gabe.” 18 Tong-kuatong goso ngga kalik seguong kabung ngga pepen golo, kama ey ketok goso, taton sono lekek-siwon go ngge kalik Paulus lo gemang pu, “Kukunan sik sogo kuasep! Kabung ngge ba sik sogo Yesus go sui no mot se pung!” Woy ngganemot no, kabung ngga sik sogo kukunan kuasep ngga pung go gemang kap.
19 Woy ngganemot dali no, kabung ngga go wengkabui-wengkabui se senong-nenawon, koybutasemu go kuasep mo kua, duoy yaluim genang ya kua ba! Ngga tang so, kangok so sagui gemang kong-nenawon. Dia sono idekeba taling genang so Paulus ey Silas ey mlak go, yakena go wengkabui-wengkabui mit sono wawi go, ku lo gemang lek. 20 Paulus so mlak go sedue-sedue lo yakena go iram-tegay sono gemang pen, “Imot go yakena nogo kuklue mata so sedue Yahudi ngge lo piam go. 21 Demu demening go Roma go demutrui ey kua kerlam go-a, nemotnang lo gabe ngunguok. Ngga kalik go demu nogo, sikabung Roma mea kua keng!” 22 Ngga no pluep go sikabung mata sogo lo, Paulus ey, Silas ey gono, sagui gemang kong-nenawon. Ngga ey, nemotnamon go saysuk temoy sik sogo amka iram-tegay lo pu goso tegek, tegan demun lo gemang suey-nenawon. 23 Demun kangok so but gono, boy ba sono nemotnamon gemang betep. 24 Ngga ey, boy wengkabui sono kalik gemang pu, “Sedue namon ngge kap genaning! Suey so yay se suing.” Ngganemot sogo so, ngga ba dega sogo degu ba no, masi namon-a diput ba sono boy wengkabui lo gemang ketok.
25 Wadi nesip go, boy ba so Ki Wali Iram nogo usam iway so, Paulus ey Silas ey golo lelek. Sikabung temu, usam ngga so tup-netenawon dali. 26 Woy ngganemot no kuysu kangok so kekayso gemang lek-anatun. Ngganemot lo, boy yap ey naklay gemang teglo-anatun. Boy yataput naklay kekayso tenuing go, sedue so dok go lante tegan ey kekayso se plet-sing. 27 Ngga ey, boy wengkabui pling go gemang bong-anawon. Nemu iti-biwon go, boy yatap naklay mo tenuing. Ngga kalik ikum go, nemot tang so uluk genang so tengang gemang sok-siwon. Nemot lo duing go, “Boy ba sogo sedue naklay mo kuek ba.” 28 No, kangok so Paulus lo gemang bega-nawon, “Mot go saysuk tang so kua uluk! Atnang naklay kua kuek, ngge so gabe!” 29 Boy wengkabui ngganemot, sagoy puit go, boy ba sono kap go gemang degut-siwon. Nggano, Paulus ey Silas ey go suongku no masi ba no bobong ey gemang unuik-nawon. 30 Ngga ey, nemotnamon wawi go pung go, gemang usi-tenawon, “Suey sono, sesuoy so genam pung genang, sogo-a ya pluok-lu?” 31 Way so Paulus ey Silas ey golo gemang pu go, “Woy Dem Yesus-a dabui ba sono wawi go se keng! Ngga ey, sesuoy so mot ey mot go yap tenglam eygo mea pung!” 32 Nggano, boywengkabui ey, nemot go yap ba sogo sikabung eygo nogo Woy Dem go deguo teguop suey so Paulus ey, Silas ey golo gemang pen-klenawon! 33 Ngganemot wadi dali, nemotnamon wawi go, saysuk koubu boywengkabui lo gemang ulu-nawon. Woy ngganemot dali no, boywengkabui ey, nemot go yap ba sogo sikabung naklay eygo bu gemang degut-sing. 34 Bu degut gono, Paulus ey, Silas eygo, nemot go yap ba no wawi go klong go, ten klay gono gemang dam-nenawon. Nemot ey, nemot go yap tenglam naklay eygo, yakay kangok dega. Seni so, nemotnang mo senong, “Nggeasui go Ki Wali Iram no dabui iti go atnang gabe kekeng.”
35 Ngga utep go, plesedue-a iram-tegay lo mot-dak go, Paulus ey, Silas eygo itak go klong genang so, boy ba no gemang nenawon. 36 Nggano, nebut ngga Paulus sono boywengkabui ngga lo gemang pen-nawon, “Iram-tegay lo mot-dak go, motnamon itak go se klong! Motnamon suey gemang!” 37 No, plesedue no Paulus lo gemang pu-tenawon, “Atnamon ngge, Roma go blung gabe! Sogo kalik so, maning kua neyboy gono ya pu go klong, demun ey mo suey? Nggano, boy ba nogo mo betep-keto go. No, esang! Nggeasui go, nemotnang lo pu go, ‘Yakot so se klong! Suey gemang!’ Ngga kalik go atnamon moyso! Iram-tegay ngganemot-a pu go ngge no nemot tang so se weng, atnamon itak go klong genang!” 38 Ngga ey, nebut ngga klong go iram-tegay no plesedue gemang pen-nenawon. Paulus ey Silas ey, ngga Roma go blung. Ngga kalik tup go, sadui bong ey gemang pling-nenawon. 39 Nemotnang tang so klong go, nebut tom-tom so ey Paulus ey Silas ey gono gemang pen-nenawon. Nggano, boy ba sik sogo wawi go nemotnamon pung go gemang klong. Nggano, gemang usi-nenawon, “Ngge suey: nggeasui go yakena ngge sik sogo motnamon ya klong?” 40 Paulus ey Silas ey, boy itak go, Lidia debui go yap no gemang kenawon. Ngga sogo blong duoyap ey tegu gono, nemotnang nogo nebut mangking go, Paulus ey Silas ey ngga sik sogo gemang ip-klenawon.