15
Yerusalem no blong duoyap go woy-woy nebut suing go
1 Ku meno no, nan Yudea sik sogo blong duoyap, yakena Antiokia no gemang pung. Ngga ey, ngge kalik gemang we-netenawon, “Saduisuk kua tong go, motnang Ki Wali Iram logo mea kua sesuoy! Se duing: ngga banim sik so Musa lo mo taling. Ku ngga sik so, nggeasui gono tasam ngga Ki Wali Iram go blung lo gabe pupluok.” 2 Nebut ngga tup gono, kangok so Paulus, Barnabas ey, gemang waydang-klenawon. Seni so, nebut don ey nemotnang gemang semu-nenawon. Ngga tang so, Antiokia sik sogo blong duoyap go woy-woy lo mot-dak go, yakena Yerusalem no Paulus, Barnabas, andua temu eygo lo klong go se pen. Ngga ey, tamot-tamot ey woy-woy ey tegu go, ngge se usi, “Sogo kalik go tap Yahudi kua go saula meno lo se keng. Musa logo demutrui ya keng, ya itak?”
3 Paulusnang, Antiokia sogo blong duoyap lo suey gemang pu. Ngga ey, nan Penisia, nan Samaria lo koklong go, ngga sogo blong duoyap no Paulusnang lo gemang pen-asiton, “Seni so, Ki Wali Iram sono go saula-saula teguey go mo kekeng dali!” Deguo ngga tup go, nan-nan ngga sogo blong duoyap lo yakay kangok so gemang tra-nenawon.
4 Yerusalem no nemotnang pung gono, suey so yakay ey blong duoyap ey tamot-tamot ey, ngga no woy-woy lo gemang wawi-nenawon. Nggano, Ki Wali Iram sik sogo tasam, nemotnamon no lemoy go, ngge kalik Paulus, Barnabas eygo lo, gemang pen-klenawon, “Deguo teguop atnang lo pen go, saula-saula sik sogo sikabung mata so mo keng.” 5 No, ngga sogo, Parisi sik sogo blong duoyap ip go, ngge kalik gemang pu-netenawon, “Ki Wali Iram sono saula meno teguey go keng go ngga suey! No, saduisuk tong go Musa logo demutrui no tupduk go nemotnang se keng dali!”
6-7 Kunala-kunala ngga tup gono, tamot-tamot ey woy-woy ey nebut walong bata so gemang pen-nenawon. Ngganemot no, Petrus ip go, ngge kalik gemang pen-anawon, “Ayanang! Motnang mo senong. Takuduen sik so, motnang sik sogo, saula-saula nogo Ki Wali Iram logo deguo teguop pen genang, genam-a Ki Wali Iram lo mo kuoy gabe. Ngga ey Yesus no dabui lo keng go tang so, Nemot go sui ba no nemotnang go konkebamling naklay gabe suep. 8 Sikabung go dabui ba naklay, Ki Wali Iram mo senong! Saula-saula Ki Wali Iram lo wawi genang, Nemot lo neguon so mo taling. Se duing: atnang nogo kalik, Ki Wali Waglo nemotnang nogo mo pi. 9 Yahudi ey saula meno ey banom-banom so, Ki Wali Aya logo ya kua taling. Dabui iti go keng go tang so, nemotnang go dabui ba sogo piam Ki Wali Iram lo tebuo go mo betep. 10 Ayanang! Ngga kalik Ki Wali Iram lo mo iwat go, motnang lo ne waydang-ketogoy? Ki Wali Iram go sagui motnang ikum so? Sogo temoy no, demutrui ide ey go, saula-saula blo no taling-ketogoy? Se duing: demutrui ngga nogo, suey so babuasi kua keng, imot tang go yakua pluok. 11 Nggeasui go tap ngge-a imot gabe ya keng-eyon, ‘Woy Dem Yesus go taitiklum logo so imot gabe sesuoy! Tap ngganemot dali lo saula-saula mea sesuoy. Musa logo demutrui saula-saula yakua keng.’ ”
12 Petrus lo pen go nebut tup gono, nebutdegut sogo sedue yakot so suing go, nebut way kua tenguo-nesrenawon. Ngganemot no, nebut Paulus ey Barnabas eygo lo gemang pen dali. Nemotnamon lo pen go, saula-saula no sogo kalik go tasam kangok go nemotnamon logo so Ki Wali Iram lo mo taling. 13 Nemotnamon, nebut yam so pen gono, ngge kalik woy Yakobus lo gemang pu-nawon, “Ayanang! Nggeasui go, suey so genam sono motnang se tup! 14 Simeon a seni-seni so nemot lo mo pen, takuduen sik sogo, saula-saula nogo klum ba lo Ki Wali Iram mo yaluim. 15-18 Tasam ngga kalik go, nabi-nabi lo mo pen-nengam go ey mo kerlam. Se duing: Wali Sam klaut ba no ngge mo klik-ngam,
‘Ki Wali Iram lo gemang pen:
Ngganemot no, Genam tandali mea weng!
Ngga ey, Daut go blung tasam piam go ba no mo kenuong go,
tandali mlak go Genam lo mea lek!
Yap mo togut go kalik,
buin blo dali no yap demening go Genam lo tandali mea klik.
Ngga ikum no,
Genam keng genang tap sikabung temu lo mea uwet.
Ngga ey saula-saula naklay nogo Genam go sui mea iti.’
Yang, banim dega sik so Genam lo pu go,
nggeasui go gabe sesemu.” (Amos 9:11-12)
Ngga Wali Sam klaut ba no klik go.
19 Ngga ey, Yakobus lo pu go, “Ki Wali Iram ngga kalik pu go tang so, Genam go kunala duing, Ki Wali Iram go tap no puem genang sogo saula-saula nogo Musa logo demutrui no ide eygo yakua taling. 20 No, nemotnang nogo, ngge kalik go seguong-a mea klik:
- ida nogo so but go menay, blong duoyap logo kua dam;
- kabung iti genang sogo, kin klaya go yakua;
- kin b lo nadui go menay kua dam;
- kin seguong-a go, yakua drop, yakua dam dali.
Ngga naklay sedue Yahudi nogo kudumat!
21 Saula meno sik sogo blong duoyap ngge se duing: yagui no-yagui no, yakena-yakena naklay no Musa logo demutrui ikum go sedue lo gabe mo pen.”
Yakobus lo pen go nebut mang, ngge no yam.
Saula-saula sik sogo blong duoyap
22 Yakobus lo pen go nebut tup gono, tamot 12 yam sogo, woy-woy ey, blong duoyap ey klay gono gemang yang-nenawon. Ngga ey, seduenamon taling go kerlam so, Barnabas ey Paulus eygo no keng go, yakena Antiokia no klong genang so gemang mot-dak. Yangga, Yudas ey Silas ey. Yudas go sui meno: Barsabas. Sedue namon ngge nogo, blong duoyap Yerusalem sogo lo kangok so gemang duduing. 23 Yudas ey Silas eygo lo sam iti go gemang klong. Sam ngganemot ngge kalik gabe klik, “Ayanang, mianang! Blong duoyap saula meno sik sogo, yakena Antiokia sogo, nan Siria sogo, nggano nan Kilikia sogo. Motnang naklay suey gabe! Atnang, Yesus go tamot 12 yam sogo ey, woy-woy ey, yakena Yerusalem sogo lo sam ngge mo klik gabe. Woy Dem Yesus go sui tang so, klay gono, andua kalik imot mo suing gabe. 24 Atnang mo tup: ngge sik sogo sedue klong go, motnang nogo tap nega genang mo nguok. Ngganemot no kunala ide ey motnang lo mo duing. Suey so kua senong: sogo kalik go tap-a ya keng? Esang, sedue-sedue ngga atnang lo kua mot-dak klong gemang. 25-27 Ngganemot sogo so, tamot namon-a atnang naklay lo mot-dak go gabe koklong. Nemotnamon go sui: Yudas ey Silas ey. Nemotnamon ngengam so Paulus dem, Barnabas dem ey gabe koklong. Motnang sono weng go, sam go seni mea pen-klebawon. Se duing: banim no sedue namon ngge Woy Dem Yesus go sui sogo so, nemotnamon go wali mo iti. 28-29 Ayanang, mianang! Ngge kalik so Wali Waglo ey atnang eygo lo gabe pen, ‘Woy Dem no keng genang sogo, Musa logo demutrui nogo ey yakua keng! Ngge, ide kangok! No, ngge kalik go tasam-tasam-a suey so motnang se duing:
- ida nogo so tong go menay, kua dam;
- menay kin seguong-a ya kua dam;
- kin lo nadui go menay, ya kua dam dali;
- kabung sogo kin klaya go-a kua iti.
Tap ngge naklay suey so keng go, motnang suey so gemang koklong. Suey gemang!”
Ngge tamot 12 yam sogo ey, Yerusalem sogo woy-woy ey golo klik go. Yam.
30 Sam ngga ey iti go, Paulus, Barnabas, Yudas, Silas ngganemot mo mot-dak go gemang klong. Yakena Antiokia no pung go, blong duoyap naklay nemotnang lo usi go gemang yaluim. Nggano, nemotnang go ta sono sam gemang iti. 31 Sam ngganemot ikum go pen gono Blong duoyap Antiokia sogo, gemang senong-nenawon: sam ngge suey! Keng genang gabe! Nemotnang yakay kangok.
32-33 Ku nago yam so yakena Antiokia no Yudas ey Silas ey got-klenawon. Ki Wali Iram go tap suey so mo keng, nggano senong eygo sedue dali nemotnamon gabe. Ngga tang so, walong bata so nebut mo pen-klenawon dali. Blong duoyap nogo dabuidemu nemotnamon ngge lo mo king.
Ku meno no Yerusalem no tandali klong sogo no, suey so nemotnang lo tap gemang itak. Nggano, gemang pu-klenawon, “Motnang so mot-dak go blong duoyap Yerusalem sogo no, atnang go suey se iti!”
34-35 Ku nago yam so yakena Antiokia so Paulus ey Barnabas ey gemang got-klenawon. Nggano sedue-sedue temu ey Ki Wali Iram go deguo teguop pen klong gemang nguok-klesiton.
Banom-banom tap so Paulus Barnabas ey klong go
36 Ku meno no, Barnabas no ngge kalik Paulus lo gemang we-tenawon, “Ngge suey? Yakena-yakena banim no Ki Wali Iram go deguo teguop imotnamon lo mo pen go sono, nggeasui tandali ya klong go! Ngga sogo sikabung sogo kalik mo imot, senong genang?” 37 Barnabas lo duing go: ngga kunala suey go. No, Yohanes Markus ey tandali mea wawi! 38 No, Paulus moyso, Yohanes Markus ey keng go. Seni so, banim no Yohanes Markus, Paulus ey Barnabas ey gono mo keng dali. No, nan Pampilia no Paulus ey Barnabas eygo nemot lo mo itak. Ngga ey, ngga nogo wali kebali nemot logo kua pupluok. 39 Yang! Yohanes Markus keng sogo so, Paulus, Barnabas ey nebut gemang semu! Ngga ey, banom-banom so nemotnamon gemang klong. Barnabas ey Yohanes Markus ey bayi no klak go, nan Siplus sono gemang kesewon. 40 No, Silas dem-a Paulus lo wawi go gemang klong dali. Ku ngganemot no, Ki Wali Iram go ta sono Paulus ey Silas ey yakena Antiokia sogo blong duoyap lo gemang itak-nenawon. Ngga ey, nemotnamon gemang ip-klenawon. 41 Nan Siria, nan Kilikia sogo blong duoyap Ki Wali Iram go tap no don kok genang nebut suey so gemang pen.