Nabi-nabi pade topepatuduki-topepatuduki to tado nakono
2
1 Impia naria nabi-nabi to tado nakono neonga ri tongo-tongo todea nu Allatala. Iweetu mbi ngkapuri ei kana meonga topepatuduki-topepatuduki to tado nakono ri tongo-tongo-mi. Isira kana mopatuduki pepatuduki-pepatuduki to tado nakono, to mampakaropu tou. Pade isira kana mancapuaka Tonakuasa to nampakabebasi-ramo. Ante nuanu nipowia-ra ee-mo, mangkeni karopu nu koro dodo-ra, to kana magasi ratarima-ra. 2 Noudamo iwee, madea mbiida tou kana mantutu inggu nu topepatuduki-topepatuduki to tado nakono ee nantutu dota rara dodo-ra. Pade nuanu to nipowia nu topepatuduki-topepatuduki ee kana mampakeni madea tou mangkanene Dala Nakono bona malou ri Allatala. 3 Apaa nikeni nu pampodoko-ra doi, topepatuduki-topepatuduki to tado nakono ee ngoni mampakadoyo komi ante jarita-jarita to nipowia dodo-ra bona mamparata kauntua lako si komi. Agiana nasaemo suku nipasadiaka-ra, pade karopua to nipakatatapumo si sira nopeamo. 4 Malaeka-malaeka to nowia jeko mbii tado nipalambaka nu Allatala mabebasi lako ri suku, agiana ratadiaka ri rara nu naraka bona ratarungku isee duuna marata Eo Potangaraa. 5 Tora mbii bakote Allatala tado meara mosuku sumawee manusia to natuwu ngkoulu. Allatala nowia ue bose nampalongo pearia nu tou-tou to tado natundu si-Ya. Agiana Ia nampakasalama i Nuh pade papitu tou ntanina, apaa i Nuh nopatuduki bakote tou kana matuwu mabelo mantutu dota bo patuju nu Allatala. 6 Iwee mbii ante ngata Sodom pade Gomora nipakaropu nu Allatala ante apu, bona majadi pepopatora ri tou to nadaa ingguna. 7 Agiana i Lot nipakasalama, apaa ia nantutu dota nu Allatala. Napepa mpuu nirasai ni Lot apaa nangkalio dala ngkatuwu to nadaa lako ri tou-tou ri peariana. 8 I Lot to nabelo ee natuwu ri tongo-tongo nu tou to nadaa. Butu eo-na nikalio pade nironge-na bakote tou-tou ri peariana samata nowia nuanu to nadaa. Ee-mo sabana napepa mpuu nirasai-na. 9 Sumawee jonjo ee nopanotosi bakote i Pue nampakule mantulungi tou to nakono ri tempo-ra mamparasai kapepaa. I Pue mbii kana mosuku tou-tou to nadaa ee ri Eo Kaopu nu Dunia, tempo-Na mantangara sumawee manusia, 10 pelabi-labi ntotona-pa posuku tou-tou to natuwu nantutu dota rara-ra to narumu pade to nangkanene kakuasa nu Allatala.Nabia pade nalangko mpuu rara nu topepatuduki-topepatuduki to tado nakono ee, nangkajadika tado naria eka-ra nangkanene sumawee to naria ri rara suruga, to tado namala nikalio nu mata. 11 Bo ee malaeka-malaeka to neliupa karoso bo neliupa kakuasa-ra lako ri topepatuduki-topepatuduki to tado nakono ee, tado nabia-ra nangkanene sumawee to naria ri rara suruga ee, ri ngayo nu Allatala. 12 Agiana topepatuduki-topepatuduki to tado nakono ee nasimbei ante binata, to tado naria unto woo-na, to niote bona rasoko pade rapatesi. Isira nangkanene nuanu to tado nincani-ra. Ee-mo sabana Allatala kana mampakaropu-ra ewa binata to nisoko pade nipatesi nu tou. 13 Nipobelo-ra nampakarugi tou ntani, nangkajadika isira mbii kana rapakarugi. Nou poyona nipobelo mpuu-ra nowia inggu to nadaa mantutu dota dodo-ra. Pade ande moncunda-ra mamporoa komi mangkondi, isira kawule mampakaosa dodo rara-ra pade mampabagiu komi. 14 Nipobelo-ra nangolole bangkele napanga pade nowia inggu to nadaa, pade tado naria kaosaa-ra nowia jeko. Tou to tadopa naroso peparisaya-na nikadolesi-ra bona mowia jeko. Nabiasa-ramo nampodoko nuanu nu roa pade napande nampabagiu tou bona mamparata banuapa-pa to nipodota-ra. Eemo sabana Allatala kana mosuku-ra. 15 Apaa tado nadota-ra nantutu dala to nanoro, nangkajadika isira napusa. Isira nantutu dala ni nabi Bileam ana ni Beor. Impia i Bileam ei nampobelo mpuu nantarima doi tombo lako ri parabuata-na to nadaa. 16 Agiana Allatala namposodo i Bileam sabana inggu-na to nadaa ee. Keledai to tado namala nololita najadi nololita ewa manusia pade nantagi i Bileam bona meuntu mowia parabuata-na to nadaa ee.
17 Topepatuduki-topepatuduki to tado nakono ee nasimbei ante mata ue to nabangimo. Isira mbii nasimbei ante kulimu to niwuru nu ngolu mpamburu. Allatala kana mosuku-ra ri pearia to neliu mpuu kadedina. 18 Isira nampobelo nololita nalangko, agiana tado naria lotuna. Isira nangkadolesi tou to nabou-boudapa negoli lako ri inggu-ra to nadaa ante lolita to tado naria lotuna ee, bona tou-tou ee manculiki ri inggu-ra to nadaa ee. 19 Topepatuduki-topepatuduki to tado nakono ee nanguli bakote tou to mantutu pepatuduki-ra kana mabebasi lako ri sumawee atura. Bo ee isira dodo nipobatua nu inggu nadaa to nampakagero katuwu nu manusia. Apaa ande tou nadagi nu dota rara-na to nadaa, batuana ia najadi batua nu to nampadagi-ya ee. 20 Apaa tou to nanguncanimo Pue-ta i Yesus Kristus, Topepakasalama, nabebasi-yamo lako ri jeko-na. Agiana ande manculiki mbii-radapa mantutu dota nu dunia ee, melabi-labi ntotopa kadaa-ra lako ri to paramulana. 21 Isira nanguncanimo dala to nakono lako ri Allatala, agiana tado nadota-ra nantutu sumawee parenta nu Allatala to niparata si sira. Agilounapa tou ewa ee tado naria nanguncani dala to nakono lako ri Allatala ee. 22 Nuanu to nipowia-ra ee nopadupa kakono nu porapaika ei: “Dike nangkondi nculi kondia-na to nilua-na, pade boe to naopumo niriu nanculiki ri tampo.”