Eo ni Pue
3
1 Sarara-sarara to nipotowe-ku, ei-mo sura-ku to karongkanina to nitulisi-ku si komi. Ri rara nu sura-ku pamulana bo karongkanina ei, yaku nampesimbukui bona meumba pampekiri-mi to nagasa. 2 Yaku mbii madota bona ikomi mantora lolita to niuli nu nabi-nabi nu Allatala lako ngkoulu. Ikomi mbii kana mantora parenta ni Pue Tonampakasalama-ta. Sumawee parenta-Na ee niparatamo nu suro-suro si komi. 3 Paralou ntoto lako ri sumaweena ee, toramo nuanu ei: Ri eo mapara kaopu nu dunia, kana meonga tou-tou to nampobelo mangkanene pade mangele komi. Isira natuwu nantutu dota rara dodo-ra pade kawule nampobelo nowia nuanu to nadaa. 4 Nanguli-ra: “Umbamo i Pue to notipamo kana marata ee? Totua-totua-ta namate puramo, agiana sumaweena nasimbei dodo ewa popamula nu Allatala nopajadi dunia ei!” 5 Isira nanguli ewa ee apaa nitungkei-ra tado nampangaku bakote Allatala kawule nololita ngkola, nangkajadika naria mpuumo langi. Ante nololita ngkola mbii, Allatala nampake ue nopajadi dunia. Ia nampopeumba dunia lako ri rara ue, 6 pade ante ue ee mbii, Allatala nampakaropumo dunia ngkoulu ante ue bose. 7 Agiana langi bo dunia to naria ngkapuri ei, nijagai ante lolita nu Allatala duuna marata tempona rapakaropu ante apu pade tou-tou to tado natundu si-Ya kana rapakaropu mbii. 8 Agiana sarara-sarara to nipotowe-ku, ikomi tado mamala mangkalingani nuanu sangaya ei: Ri pangkalioaa ni Pue, sayo nasimbei ante sanjobu mpae pade sanjobu mpae nasimbei ante sayo. 9 Tado nikalingani ni Pue mopadupa nuanu to nitipa-Na, noudamo maria tou nanguli nikalingani-Na. Nancabara mpuu-Ya si komi, apaa tado madota-Ya maria tou maropu. Dota-Na sumawee tou mancoro mowia jeko. 10 Agiana i Pue kana marata mpanculi. Ia kana marata ewa topangio. Ri Eo ee, kana maria wotu to marimboso mpuu ri tempo nu langi malipo. Sumawee nuanu to naria ri langi kana mapumpu pade maroga. Dunia ante sumawee to naria ri rarana kana maropu. 11 Jadi Allatala kana mampakaroga ngila ngayana ante dala ewa ee. Ee-mo sabana, pekirimo beiwa komi matuwu. Ikomi kana matuwu magasa pade mpuu-mpuu matundu ri Allatala, 12 sinungka-mi mampopea pade mampolentora karata Eo nu Allatala. Ri eo ee langi kana maopu mapumpu, pade sumawee nuanu to naria ri dunia magonu sabana kapane nu apu ee. 13 Agiana ikita mampopea Allatala mowia langi bou pade dunia bou, apaa notipa-Yamo ewa ee. Isee sumawee tou kana matuwu kawule mantutu nuanu to nipodota nu Allatala. 14 Ee-mo sabana sarara-sarara to nipotowe-ku, bula-mi mampopea sumaweena ee, ikomi kana mampesimbukui mpuu-mpuu bona matuwu magasa pade nemo maria kasalaa-mi ri ngayo nu Allatala. Matuwu mosingkabelo dodo komi oa ante Allatala. 15 Kana mi-tora bakote i Pue-ta nancabara apaa Ia nambei loga ri tou bona mancoro pade rapakasalama. I Paulus sarara to nipotowe-ta mbii notulisimo sumawee to nitulisi-ku ei si komi. Ia notulisi sumaweena ee ante kapandea to niweikaka-ya nu Allatala. 16 Ri rara sumawee sura-na nitulisi oa-na nancambelai sumaweena ee. Naria amida basangkia ngaya ri rara sura-na ee to nakaja nesua ri pekiri. Nuanu nakaja ee-mo to nigoli nu tou to tado nanguncani nuapa-pa pade to tado naroso kaparisayaa-na. Isira mbii nogoli tulisia ntanina ri rara Buku Nagasa. Sabana parabuata-ra ee, Allatala kana mosuku-ra duuna masae-sae.
Kaopuana
17 Agiana ikomi sarara-sarara to nipotowe-ku, nincani ami-mimo sumaweena ei. Ee-mo sabana ikomi kana mainga dodo oa, bona nemo napakapusa komi nu tou to tado nanguncani pepatuduki to nakono duuna maronto peparisaya-mi. 18 Agiana kana mi-tambei oa pombencani-mi ante i Pue-ta, i Yesus Kristus Tonampakasalama-ta pade mi-tambei oa pamparasai-mi kabete nu towe-Na ri rara ngkatuwu-mi. Ia-mo to masipato rapemabose eo ei duuna masae-sae. Amin.