Sura ni Petrus to Karongkanina
Tabe
1
1 Lako si Simon Petrus, batua pade suro ni Yesus Kristus. Sura ei nipakatu si sira to noroa-roa ante ikami namparata kaparisayaa sabana kanoa nu Allatala bo Tonampakasalama-ta, i Yesus Kristus. 2 Allatala kana mambei towe rara pade kasanaa ante melabi-labi si komi, sabana nincani-mimo Allatala pade i Yesus, Pue-ta.Pepokio pade pepelisi nu Allatala
3 Allatala nampakemo kakuasaa-Na bona mambei si kita ngila ngaya to ta-paralou bona matuwu mantutu dota-Na. Allatala nampowia ewa ee apaa ikita nanguncani-Ya. Ante kuasa-Na to nabete pade ante kabelo-Na, Allatala nampokio-tamo bona majadi todea-Na. 4 Ante dala ewa ee-mo Allatala nambei si kita rasi-rasi-Na to neliu mpuu pade nasuli mpuu olina to nipotipa-Namo. Ante rasi-rasi ee-mo komi mamala mawia lako ri dota-dota to nadaa to mampakagero dunia ei, pade ikomi mantarima inggu nu Allatala. 5 Ee-mo sabana, pesimbukuimo mpuu-mpuu bona kaparisayaa si Kristus mitambei ante inggu to nabelo, pade inggumi to nabelo kana mi-tambei ante kapandea nancambelai Allatala, 6 pade mampakagana kapandea-mi nancambelai Allatala ee, ikomi mbii kana mamala mantahangi rara, mancabara ri rara nu kasusaa, pade ikomi mbii kana matuwu mantutu dota nu Allatala. 7 Pade katuwu mantutu dota nu Allatala ee kana rapakagana mbii ante towe rara ri sarara-sarara to saongu kaparisayaa. Kapolaana agina towe rara-mi ri sarara-sarara to saongu kaparisayaa mi-tambei ante towe rara ri sumawee tou. 8 Nitudu-kumo komi bona mowia sumawee inggu ee. Ande ikomi mpuu-mpuu mampowia, batuana ikomi mpuu-mpuu nanguncani i Yesus Kristus, Pue-ta. Pencani-mi ee moguna mpuu ri rara ngkatuwu-mi. 9 Agiana tou to tado naria inggu-inggu ewa ee si-ya, pampekiri-na tado naowo, ia tado namala nekalio pade ia nangkalingani bakote jeko-jeko-na to naliumo naopumo niampungi.
10 Ee-mo sabana, sarara-sarara-ku, pesimbukuimo mpuu-mpuu bona pampokio nu Allatala pade pampelisi-Na komi ee majadi maroso ntoto. Ande ikomi mowia ee, ikomi tado kana manawu ri rara nu jeko. 11 Ande iwee-damo, ikomi kana ratarima ri poparentaa ni Yesus Kristus to tado naria kaopuana. Ee-mo poparentaa ni Pue, Tonampakasalama-ta.
12 Ee-mo sabana, yaku nampopatora oa komi nancambelai nuanu ee, noudamo ikomi nanguncanimo pade namparisaya mpuu pepatuduki lako ri Allatala to nitarima-mimo ee. 13 Sinungka-ku matuwudapa, yaku kana mampopatora si komi nancambelai sumawee nuanu ee. 14 Sabana nincani-ku bakote tado-mo masae kana ku-paleisimo dunia ei, apaa i Pue-ta, i Yesus Kristus nangulikaka ku-mo nancambelai nuanu ee. 15 Ee-mo sabana yaku kana nampesimbukui bona noudamo mamate-kumo, ikomi kana mantora nculi oa sumawee nuanu ee.
Awili nancambelai pampemabose i Kristus nipeganaimo
16 Ikami tado nantutu jarita-jarita to nipowia ante kapandea nu manusia tempo-ka noparata si komi nancambelai karata mpanculi ni Pue-ta i Yesus Kristus ante kuasa-Na to nabete. Ikamimo sabi to nangkalio mata kuasa-Na tonepakamoleara ee. 17 Nikalio-ka beiwa i Yesus nibila pade nipemabose nu Tuama-ta, Pue Allatala. Tempo ee mbii nironge-ka Allatala to neliu kabete nu kuasa-Na nanguli si-Ya: “Eimo Ana-Ku to nipotowe-Ku. Ia-mo to nampakawoe rara-Ku!” 18 Ikami dodomo to namparonge wotu lako ri suruga ee ranca-ka namporoa-Ya ri wumbu bulu to nagasa ee.
19 Ee-mo sabana ikami namparisaya ntoto mbiipa nuapa lolita nu Allatala to niparata pade nipopowole nu nabi-nabi. Ikomi kana mampeirara lolita ee, apaa lolita ee ewa pajanaa to newanta ri kadediana. Yesus kana marata mpanculi ewa pembere nu eo sangkaba. Ia kana moindokini rara-mi ewa betue paraba ri mata eo to newanta. 20 Pade paralou ntoto nuanu to kana mi-tora mpuu-mpuu pade kana mi-ncani: Awili nu Allatala ri rara Buku Nagasa to niparata nu nabi-nabi tado mamala rabatuasi mantutu dota dodo. 21 Sabana, tado naria awili lako ri Allatala niparata kawule nantutu dota nu manusia. Agiana Inosa Gasa nu Allatala-da dodo nokuasai tou ee bona moparata lolita-Na.