Pepatuduki ri totua, kabilasa, pade batua
2
1 Agiana iko, Titus, kana mopatuduki pepatuduki to nakono mpuu. 2 Ulikakamo baleilo-baleilo to natuamo bona mantahangi rara-ra, mabija, pade matuwu majadi tou to masipato rabila. Isira mbii kana mangkakamu pepatuduki to nakono lako ri Allatala, mampotowe mpuu-mpuu tou ntani pade masadia mantodosaka kapepaa ante roso rara. 3 Iwee mbii ante bangkele-bengkele to natoualumo, ulikaka-ra bona inggu-ra masimbei ante nuanu to masipato ri rara ngkatuwu nu tou nipatanika Allatala. Isira tado mamala mopanawu tou ntani, pade tado mamala nawio nu inua to mepakalangu. Isira kana mopatuduki nuanu to nabelo, 4 bona ante ee-ramo mamala mopatuduki bangkele-bangkele nangura-dapa bona mampotowe baleilo-ra pade ana-ana-ra, 5 majadi mabija, matuwu magasa pade majadi tina nu sou to mabelo to natundu ri baleilo-na. Ande isira moinggu ewa ee, tado maria tou mamala mangkanene lolita nu Allatala. 6 Iweetu mbii, patudukimo kabilasa-kabilasa bona isira mamala motahangi rara. 7 Ri rara nu sumawee ngila ngayana, iko kana majadi jonjo nu poinggu to nabelo. Ande mepatuduki-ko, kana manoro-ko pade ante rara mpuu-mpuu. 8 Ulimo lolita to nabija, to tado mamala nakanene ntou, bona bali-bali-mu majadi maeya apaa tado naria nuanu nadaa to mamala rauli-ra mancambelai-ta.9 Batua-batua kana matundu ri maradika-na, pade mampakasana rara nu maradika-na ri ngila ngayana. Isira tado mamala mesonoi, 10 ba mangio. Isira kana mampopakalio bakote isira noinggu nabelo pade natundu oa, bona ante poinggu-ra ee, tou mantarima pepatuduki nancambelai Allatala, Tonampakasalama-ta.
Towe rara lako ri Allatala nampakasalama sumawee manusia
11 Sabana Allatala nampopakaliomo towe rara-Na bona mampakasalama sumawee manusia lako ri jeko-ra. 12 Towe rara nu Allatala ee mampatuduki-ta bona tadomo matuwu mangewa dota nu Allatala bo tado mantutu dota nu dunia. Ikita nipatuduki matuwu ri rara dunia ei ante manguncani motahangi rara, manoro pade matundu ri Allatala. 13 Tempo ei-ta topeparisaya bula-ta nampopea eo to nisasarumaka-ta ee: Ri eo ee ikita kana mangkalio i Yesus Kristus narata ante pewanta to nabaa mpuu, Ia-mo Allatala to nabete mpuu pade Mbagou Tonampakasalama-ta. 14 Niwei-Namo koro-Na bona mampakabebasi-ta lako ri sumawee nuanu to nadaa, pade mopajadi-ta todea to nasalama lako ri jeko pade majadi todea-Na, pade madeka mowia nuanu mabelo. 15 Pepatudukii-mo sumaweena ee ri tou-tou to neparisayamo, pade patuduki bo ontikamo sumawee to namparonge-ko ante pasu-mu. Nemo mu-palambaka ba sadua mpuu-mo to mampandaente-ko.