Sura ni Paulus si Titus
Tabe
1
1 Sarara-ku i Titus! Sura ei lako si-yaku i Paulus, to najadi batua nu Allatala bo suro ni Yesus Kristus. Yaku nipelisi pade nitudu bona mantulungi tou-tou to nipelisi nu Allatala bona majadi maroso ri rara nu peparisaya-ra. Pade yaku mbii nopatuduki-ra bona isira mamala manguncani pepatuduki to nakono to moniniri-ta bona matuwu mantutu dota nu Allatala. 2 Pepatuduki ee nantutu pancarumakaa bakote ikita kana mantarima tuwu liu-liu. Nitipamo nu Allatala tuwu ee sintou tadopa nipajadi dunia, pade Allatala tado naboa. 3 Ri tempona to masipato, Allatala manguli potipa ee ri rara nu lolita-Na. Lolita ee niparisayaka-Namo si yaku, pade yaku nampopowole nantutu parenta nu Allatala Tonampakasalama-ta.4 Titus, ikomo mpuu-mpuu ewa ana-ku, sabana iko bo yaku niparisaya-tamo i Kristus. Nisarumaka-ku Allatala Tuama pade i Kristus Yesus Mbagou Tonampakasalama-ta, mambei towe rara pade kasanaa nu rara si-ko.
Bago ni Titus ri Kreta - atura-atura ri topangkeni, pade topampangawa topangkeni todea nu Allatala
5 Titus, yaku nampaleisi-ko ri lewuto Kreta bona mamala-ko mourusi nuanu to raparalou raurusi. Bona iko mbii mo'ongko topangkeni-topangkeni todea nu Allatala ri butu ngata, nantutu nuanu nipatudukika-ku ko: 6 Tou to rapelisi majadi sadua topangkeni todea nu Allatala, tou ee tado naria kasalaana, bangkele-na sadua ngkola, ana-ana-na neparisayamo si Kristus pade isira mbii tado nincanika nu tou-tou ngana to napanga ba to tado namala niatoro. 7 Topampangawa topangkeni todea nu Allatala, tou eemo to mourusi bago nu Allatala. Ia tado naria kasalaa-na, to tado mamala malangko rara ba masunca, ba malangu, ba tado nampobelo mosisala, ba mampodoko doi. 8 Ia kana madonu mantarima tou ri sou-na, mampobelo nuanu to nabelo, mabija, mamala motahangi rara-na, manoro, marawa rara, pade ia kana matundu ri Allatala. 9 Ia kana mangkakamu mpuu-mpuu pepatuduki to nakono, ewa to nipatudukika-yamo. Ante iwee mamala-yamo mampadederi tou ante pepatuduki to nakono, pade mamala mopanotosi kasala nu tou-tou to nangewa-ya.
10 Sabana nadea tou madota me'ewa, paralou ntotona tou-tou to lombona noagama Yahudi, isira nobagiu tou ntani ante lolita ngkaloa-ra. 11 Tou-tou ewa ee kana rawunta ngangana, sabana isira nampakagesoa toposarara-toposarara ante pepatuduki-pepatuduki to tado nakono. Isira nowia ee apaa kawule mangonco kauntua to tado masipato! 12 Naria impia sadua nabi dodo-ra, to lako ri Kreta mbii, nanguli: “Tou-tou ri Kreta naboa oa ewa binata naila, nadoko pade nalose.” 13 Nuanu to niuli nu nabi ee nakono mpuu-da. Etumo sabana iko kana mangontika-ra ante mpuu-mpuu, bona isira kana mangkakamu oa pepatuduki to nakono, 14 pade tado-mo mangkakamu jarita-jarita nto Yahudi ba atura-atura to nipowia nu tou-tou to tado nantarima pepatuduki to nakono ee. 15 Ande tou to nagasa rara-na, tado naria kondia to nipopali-ra. Noudamo iwee ri tou-tou to tado nagasa pampekiri-na pade tou to tado neparisaya, tado namo sangayaa to nagasa, sabana pampekiri bo porara-ra naponu ante nuanu to nadaa! 16 Niuli-ra bakote isiramo to nanguncani Allatala, bo ee parabuata-ra tado nasipato si Allatala pade nancapuaka-Ya. Isira narumu, pade isira tado nadota natundu ri Allatala, isira-mo tou-tou to tado nampakule nowia nuanu to nabelo.