Petetesi-petetesi kaopuana
3
1 Popatora-mo todea nu Allatala bona isira matundu ri topoparenta to nakuasa, pade mantutu nuanu to nipeparentai-ra. 2 Ulikakaka-ramo bona nemo mangkanene ba mampobungkaka bayema-yema mpuu-mo, agiana madole bo maede rara ri sumawee tou. 3 Apaa impia ikita mbii to nadoyo, napusa pade tado natundu. Ikita nipobatua nu ngila ngaya dota nu rara-ta, ikita natuwu ante liwo-liwo nadaa bo singki rara, pade nombepodaa. 4 Agiana Allatala, Tonampakasalama-ta nampopakalio towe rara-Na bo belo rara-Na si kita. 5 Ia nampakasalama-ta, tado ba ikita nowiamo nuanu to nabelo, agiana aga asi rara-Na si kita. Ia nampakasalama-ta ri rara Inosa Gasa, to nampakarawa-ta lako ri jeko nangkajadika-ta nipoanaka mpanculi pade namparata tuwu nabou. 6 Allatala nantudu Yesus Kristus, Mbagou Tonampakasalama-ta, mopasompo Inosa Gasa-Na si kita ante kadoli nu rara-Na, 7 bona ante towe rara lako si Yesus, ikita mosingkabelo mpanculi ante Allatala pade ikita mamparata tuwu liu-liu to nisarumaka-ta. 8 Lolita ei nakono mpuu.Dota-ku iko mopatuduki sumawee nuanu ee, bona tou-tou to neparisaya ri Allatala mpuu-mpuu mampesimbukui bona mampowia bago-bago to nabelo bo noguna ri sumawee tou. 9 Kawaosimo pombebili-pombebili to tado noguna, tutura-tutura, pobungka pade pombewiko nancambelai parenta ni Musa. Sumaweena ee tado naria lotuna. 10 Tou to nampopeumba posisala ri rara ntodea nu Allatala, kana mu-ontika sangkani rongkani, ande tado naronge-ko, nemo oa rapogalo-ya. 11 Nincani-muda bakote tou ewa ee nadaa pekiri-na pade najeko. Jekona eemo to nopadupa bakote ia masipato rasuku.
12 Kaopu-ku mantudu i Artemas ba i Tikhikus si-ko ngoni, pesimbukuimo magasi-gasi mamei si yaku ri Nikopolis, sabana yaku madota matida radou sinungka nu lengi. 13 Pesimbukuimo mpuu-mpuu mampangawa i Zenas topande ri buku Taurat ee, pade ngawa mbii i Apolos, bona isira mamala meongko ante tado makakuranga banuapa-pa. 14 Kabelo-belona ikita to najadi topantutu i Kristus, kana mampetumbu bona mombengawa ewa ee, pade masadia oa mowia nuanu to nabelo tempo nu tou ntani mamparalou pengawa. Nemo ngoni katuwu-ra tado molotu.
Tabe
15 Sumawee sarara to naria namporoasi-ku isei, nopakatu tabe-ra si-ko. Paratamo tabe-ka ri wega-wega-ta to saongu kaparisayaa. Ku-perapi bona towe rara ni Pue mamporoasi komi sumawee.