Ingggu nu manusia ri eo kaopua nu dunia
3
1 Toramo ei: Ri tempo ei, maparamo tempo kaopu nu dunia, kana madea meumba inggu to nadaa. 2 Manusia kana mampekiri dodo koro-na, mampodoko doi, malangko rara pade mololita malangko. Isira nampobelo mangkanene tou, mangewa totua, tado nanguncani nosukuru, pade tado nampabila Allatala, 3 tado nampotowe singkapada manusia, tado nampobelo meampungi, nipobelo-ra mampomadaa sanga nu tou, tado namala nantahangi rara, naseke, pade tado nampobelo kabeloa. 4 Nipobelo-ra nepanawu, nampomole koro dodo pade tado nampekiri nalanga. Nipobelo-rapa nantutu kasanaa nu dunia pade nantutu Allatala. 5 Noudamo nikalio isira natundu ri atura nu agama, agiana isira namporou kuasa nu Allatala. Kawaosimo tou-tou ewa ee. 6 Naria lako riolo-ra to nesuamo ri sou-sou, pade nangkadolesi bangkele-bangkele to tado naroso kaparisayaa-ra pade nikuasai nu ngila-ngaya dota rara. 7 Noudamo isira nerapi oa rapatuduki, agiana tado naria-ra nanguncani pepatuduki to nakono lako ri Allatala. 8 Nasimbei ewa i Yanes pade i Yambres to impia nangewa mpuu i Musa, iwee mbiimo topepatuduki-topepatuduki to tado nakono nantolawani pepatuduki to nakono lako ri Allatala. Pekiri-ra tadomo naowo, pade kaparisayaa-ra si Pue napusamo. 9 Agiana isira tado mamparata nuapa-pa, apaa kadoyo-ra kana rancani nu sumawee tou, nasimbei ewa to nirasai mbii ni Yanes pade i Yambres impia.Kaparisayaa nentumbu ri rara nu peduasi pade ri rara nu pobasa Buku Nagasa
10 Agiana iko Timotius nitutu-mumo pepatuduki-pepatuduki-ku, inggu-ku, pade patuju ngkatuwu-ku. Nikalio dodo-mumo beiwa-ku neparisaya mpuu-mpu si Yesus Kristus pade nampotowe singkapada manusia. Nincani mbii-muda beiwa pancabara pade karoso nu rara-ku. 11 Nikalio-mumo poduasi pade pantodosaka-ku kapepaa. Nincani pura-muda nuanu to najadi si yaku ri ngata Anthiokia, ri Ikonium, bo ri Listra, pade nincani pura-muda sumawee to nitodosaka-ku! Agiana i Pue nampakasalama-ku lako ri sumaweena ee. 12 Iwee amida sumawee tou to madota matuwu mantutu dota nu Allatala pade matuwu mosangkani ante Kristus Yesus kana raduasi, 13 agiana tou-tou nadaa pade tou-tou nebagiu kana mantambei madaa. Isira mobagiu tou ntani, bo ee isira mbii nibagiu-rada. 14 Agiana nancambelai-ko, Timotius, iko kana mangkakamu oa ri pepatuduki-pepatuduki to nakono to nipatudukikamo-ko pade to nipeparisaya mpuu-mu, sabana nincani-muda topopatuduki-topopatuduki-ko. 15 Kana mu-tora bakote lako kakodia-mu nincani-mumo Buku Nagasa. Buku Nagasa ee nambeikakamo-ko pampekiri bona mamparata kasalamaa ri rara nu kaparisayaa si Kristus Yesus. 16 Sumawee to natetulisi ri rara nu Buku Nagasa, neumba lako ri Allatala pade nolotu bona mopatuduki nuanu to nakono, mangontika pade mopanotosi si sira beiwa dala katuwu to nakono, pade mopatuduki manusia bona matuwu mantutu dota nu Allatala. 17 Ante Buku Nagasa ee-mo tou to nolayani Allatala rapeganai mpuu-mpuu bona mowia ngila-ngaya bago to mabelo.