Peponuimo pampokio-ko melayani
4
1 I Kristus Yesus kana marata mpanculi ri dunia ei bona motangara tou-tou to natuwu pade to namate, pade Ia mbii kana marata bona moparenta majadi Mbagou. Etumo sabana ku-perapi mpuu-mpuu si-ko ri ngayo nu Allatala pade i Kristus Yesus: 2 Iko kana mampopowole kareba lako ri Allatala etu, pade manguli oa ri tou bona mamparonge kareba ee, ba madota-ra mamparonge ba tado. Iko mbii kana mangulikaka tou-tou to nowia sala nancambelai kasalaa-kasalaa-ra, pade jeko-jeko to nipowia-ra. Patudukimo tou ante mancabara mpuu-mpuu. 3 Sabana kana marata tempona tou tadomo madota mantarima pepatuduki to nakono. Pegoliana, isira kana mopasintobu topepatuduki-topepatuduki bona mopatudukika-ra nuanu to mabelo raronge ntalinga-ra mantutu dota-ra. 4 Isira kana mowunta talinga-ra ri nuanu to nakono, agiana kana mampetalingai jarita-jarita to tado nakono. 5 Noudamo iwee, iko kana mantahangi rara-mu ri rara nu ngila ngayana. Pakarosomo rara mantodosaka kapepaa, powiamo bago majadi tomampopowole Kareba Belo ee pade powia ante mabelo-belo mbii bago-mu majadi topolayani Allatala.6 Mancambelai koro-ku, naratamo tempona yaku kana mamate majadi penomba ri Allatala. Tadomo masae kana ku-paleisimo dunia ei. 7 Nitutu-kumo posilumba ante nabelo mpuu, pade nirata-kumo garisi kasuduana. Yaku neparisaya dodo si Kristus duu-na kaopuana. 8 Pade eo ei tombo-ku nedagi nasadiamo nampopea-ku. Ri Eo Kaopu nu Dunia, i Pue, Topotangara to nanoa ee kana mambei tombo ee si yaku, apaa yaku natuwu nosingkabelo ante Allatala. Pade tado kawule yaku ngkola to mantarima tombo ee, agiana ri sumawee tou mbii to nalentora mpuu nampopea karata ni Pue.
Petetesi kaopuana
9 Pesimbukuimo bona magasi marata si yaku, 10 sabana i Demas nampaleisi-kumo apaa nipotowe-napa dunia ei. Nalou-yamo ri Tesalonika. I Krekes nalou-yamo ri Galatia, pade i Titus ri Dalmatia. 11 Kawule i Lukas-damo natida ante yaku. Baweimo i Markus mamei isei, apaa ia mamala mampangawa-ku ri rara ngkatuwua-ku. 12 Nitudu-kumo i Tikhikus nalou ri Efesus. 13 Ande mamei-ko, kenika-ku powaru ndoe to niboli-ku ri Troas ri sou ni Karpus. Keni mbiida buku-buku-ku, peliu-liuna nemo mu-kalingani buku-buku to nipowia lako ri kuli nu binata.
14 I Aleksander pande nu tembaga ee, nowiamo nuanu-nuanu to nadaa mpuu si yaku. I Pue kana mampabalasi-ya mantutu nuanu to nipowia-na. 15 Iko dodo mbii kana mainga si-ya, sabana ia nangewa mpuu pepatuduki-ta. 16 Ri tempo-ku nanguli potunduka-ku koro-ku sintou-ku nitangara paramulana, tado naria-namo saduaa tou namporoasi-ku, sumawee-ra nampanganika-ku. Agiana ku-perapi ri Allatala bona moampungi-ra! 17 Agiana i Pue namporoasi-ku. Ia nambeika-ku karosoa nangkajadika nipakule-ku nampopowole sumawee Kareba Belo ee, bona naronge pura nu sumawee tou to tado to Yahudi. Pade Ia nampakasalama-ku lako ri kuasa nu tou-tou to madota mopatesi-ku. 18 Napakasalama ami-kuda ni Pue lako ri butu ngaya pampesimbukui nu tou to nadaa si yaku. Ia kana mangkeni-ku ante masalama ri rara nu Poparentaa-Na ri suruga. Ia-mo to masipato rapemabose duuna masae-sae! Amin.
Tabe kaopuana
19 Parata tabe-ku si Priskila pade si Akwila pade ri sumawee tou ri rara ncou ni Onesiforus. 20 I Erastus natida ri Korintus ya-mo, pade i Trofimus nipaleisi-ku ranca-na nadua ri Miletus. 21 Pesimbukuimo mamei sintou tadopa bula nu lengi. I Ebulus, i Pudes, i Linus, pade i Klaudia nopakatu tabe-ra si-ko, iweetu mbii sumawee sarara saoungu kaparisayaa isei.
22 Ku-perapi si Pue bona mamporoasi-ko. Towe rara ni Pue mamporoasi-ko!
Tabe-ku, i Paulus.