Pepokio bona metutu mantodosaka kapepaa
2
1 Timotius, ana-ku! Iko kana napakaroso nu towe rara to niwei si kita, apaa ikita nosangkani ante i Kristus Yesus. 2 Pepatuduki impia to nironge-mumo lako si yaku ri ngayo nu tou dea, kana mu-parisayaka ri tou-tou to mamala raparisaya, to napande mbii mopatuduki tou ntani. 3 Iko kana metutu mantodosaka kapepaa ewa surodado ni Kristus Yesus to natundu. 4 Sadua surodado to ranca-na noiwali, tado kana mampakasesewa koro-na ante urusia-urusia dodo-na, apaa ia madota mampakawoe rara nu tadulako-na. 5 Sadua tou toposilumba tado mamala-ya medagi ri rara nu posilumbaa, ande tado matundu-ya ri atura mposilumba. 6 Topobonde to nobago ntomo, ia-mo to paramulana masipato mamparasai ulia nu tinuda-na. 7 Pekirimo nuapa to niuli-ku ei, apaa i Pue kana mambeika-ko pampakule bona manguncani sumaweena. 8 Toramo ei: Kareba Belo to niparata-ku ee, ee-mo kareba nancambelai i Yesus Kristus, muli ni Daud. Ia-mo i Kristus to natuwu mpanculi lako ri kamatea. 9 Sabana nampopowole Kareba Belo ee-mo, yaku nantodosaka kapepaa, duu-na nisilu nu rante ewa sadua tou daa. Agiana lolita nu Allatala tado mamala rasilu, kana mowole oa riumba-umba. 10 Etumo sabana yaku nancabara nangkolo sumaweena ee apaa nantora kaparaloua nu tou-tou to nipelisimo nu Allatala, bona isira mbii mamala meparisaya si Kristus Yesus bo rapakasalama pade matuwu belo mosangkani ante Allatala duuna masae-sae. 11 Nakono mpuu-da lolita ei:“Ande ikita mamate mamporoa-Ya,
ikita mbii kana matuwu mamporoa-Ya.a
12 Ande kita mancabara mantodosaka kapepaa,
ikita mbii kana meparenta mamporoa-Ya.
Ande ikita mancapuaka-Ya, Ia mbii kana mancapuaka-ta.
13 Noudamo ikita tado mampowia nuapa to nuli-Na, agiana Ia kana mampowia oa nuapa to niuli-Na, apaa Ia nampowia oa nuapa to nitipa-Na,
sabana tado mamala-Ya mampesapuka lolita dodo-Na.”
Pepatuduki ande mampongayo to pepatuduki nepakapusa
14 Iko kana mampopatora tou-tou nancambelai sumaweena ei ri ngayo nu Allatala, patuduki-ramo bona nemo mobungka nancambelai lolita-lolita to tado nolotu. Ee tado naria lotuna, aga kawule mampoposesaa rara nu tou-tou to namparonge. 15 Iko kana mampesimbukui mpuu-mpuu bona napangaku-ko nu Allatala majadi tou to masipato mampobagoka-Ya. Pesimbukuimo bona tado maeya-ko nancambelai pobagoa-mu, agiana mepatuduki ante makono mpuu nancambelai pepatuduki-pepatuduki to nakono lako ri Allatala. 16 Patudukimo tou-tou bona mokawaosi lolita-lolita to tado naria lotuna pade to tado nampabila Allatala. Lolita-lolita ewa ee kawule nowia tou nantambei nadaa. 17 Pepatuduki nu tou-tou ee mowolea ewa dua kanker to nadaa mpuu. Topepatuduki ee i Himeneus pade i Filetus. 18 Isira rodua ee tadomo nantutu pepatuduki to nakono. Pade isira nopatuduki tou-tou bakote naratamo tempona Allatala mopatuwu mpanculi tou-tou. Nangkajadika saganta tou tadomo neparisaya si Yesus. 19 Agiana pandasi roso to nipowia nu Allatala tado mamala ralengo. Ri wumbuna nitulisi ewa ei: “I Pue nanguncani todea-Na”, pade “Tou to nanguli bakote ia todea ni Pue, tou ee kana meuntu mowia parabuata to tado nakono”.
20 Ri rara nu sou bete naria ngila ngaya nu pakakasa. Naria to nipowia lako ri salaka ba bulawa, agiana naria mbii to nipowia lako ri kou ba tana. Pakakasa lako ri salaka ba bulawa rapake mampabila torata, agiana pakakasa ntanina rapake ri kaparoluaa eo-eona. 21 Tou to nampakarawa koro-na lako ri sumawee nuanu to nadaa, tou ee kana rapake ri kaparaloua belo. Ia ewa pakakasa to nipatani pade naria lotuna ri maradika-na. Ia nipasadia bona rapake ri bago to nabelo ngkola. 22 Jadi, nemo mi-tutu kasanaa-kasanaa nu to nangura-dapa umuru-na. Pesimbukuimo bona matuwu mantutu dota nu Allatala, pade meparisaya dodo si Yesus bo mampotowe singkapada manusia, pade matuwu mosingkabelo ante tou to nekakae nerapi petulungi si Pue ante rara nagasa. 23 Nemo mantutu pombebili-pombebili nu to doyo to tado nanguncani nuapa-nuapa. Nincani-muda bakote sumawee ee kawule mampopeumba posisala. 24 Tou to nabago si Pue tado masipato mosisala, ia kana madole ri sumawe tou, pade mamala mampatuduki tou ante belo rara pade mancabara. 25 Ia kana ante dole rara-na mopatuduki tou-tou to madota me'ewa, mbelakana Allatala mambei loga ri tou-tou ee bona mancoro lako ri jeko-jeko-ra pade manguncani pepatuduki to nakono. 26 Ante ee-mo majadi manoto mpanculimo rara-ra, pade maloso lako ri pewa nu Mbagou Seta to notawani-ra pade nopasa-ra bona mantutu dota-na.