Sura ni Paulus to karongkanina si Timotius
Tabe
1
1 Lako si Paulus, suro ni Kristus Yesus nantutu dota nu Allatala bona moparata potipa nacambelai katuwu liu-liu ri rara ni Kristus Yesus.2 Raweikaka i Timotius, ana towea-ku: Towe rara, asi rara pade kasanaa nu rara lako ri Allatala Tuama pade i Kristus Yesus, Pue-ta, mamporoasi-ko.
Posukuru pade pepatuduki bona matatapu rara
3 Yaku nosukuru ri Allatala to nilayani-ku ante rara to nagasa ewa to nipowia nu totua-ku impia. Yaku nosukuru oa ri Allatala butu ngkani-ku mantora-ko ri rara nu sambaya, poyo-na iweetu mbii kawengina. 4 Nitora-kuda katiti nu ue mata-mu. Etumo sabana yaku madota mpuu motomu ante iko bona mamala-ku masana mpuu-mpuu. 5 Nitora-kuda peparisaya-mu to mpuu-mpuu si Kristus, nasimbei ewa peparisaya nu tumpu-mu i Lois pade tina-mu i Eunike. Pade nincani-ku peparisaya-mu ewa ee mbii-da. 6 Etumo sabana ku popatora-ko bona mpuu-mpuu mampake kuasa to niwei nu Allatala si-ko tempo-ku nosambaya ante nountu pale-ku si-ko. 7 Sabana Inosa Gasa nu Allatala to niwei si kita, tado Inosa Gasa nu Allatala to mampowia-ta majadi maeka. Agiana Inosa Gasa nu Allatala ee mowia-ta majadi maroso, maponu ante towe pada mamala motahangi rara. 8 Etumo sabana nemo maeya mangkeni kareba nancambelai Pue-ta, pade nemo mbii maeya mancambelai-ku, to nitarungku apaa nantutu-Ya. Pegoliana, aginamo-ko ante karosoa lako ri Allatala, metutu mantodosaka kapepaa apaa moparata Kareba Belo ee. 9 Allatala nampakasalama-ta pade nampokio-ta bona majadi todea-Na dodo. Ia nowia ee tado nantutu nuapamo to nipowia-ta, agiana nantutu liwo dodo-Na pade towe rara-Na. Sintou tadopa nipajadi dunia ei, naria amimo liwo nu Allatala mampopakalio towe rara-Na ante nuanu to napowia ni Yesus Kristus. 10 Pade ngkapuri ei, Allatala nampopakaliomo towe rara-Na ee si kita ante karata nu Mbagou Tonampakasalama-ta, ee-mo i Kristus Yesus. I Yesus nampadagi kakuasa nu kamatea pade nangkeni tuwu liu-liu lako ri Kareba Belo ee. 11 Bona moparata Kareba Belo ee-mo, pade nipelisi-kumo nu Allatala majadi suro pade topepatuduki. 12 Ee-mo sabana yaku nantodosaka kapepaa ri rara nu sumaweena ei, agiana tado naeya-ku, apaa nincani mpuu-ku yema to niparisaya-ku. Naroso rara-ku bakote nuanu to niparisayaka-Na ku, Allatala mbii nakuasa nampajagai duu-na ri Eo Kaopua nu dunia. 13 Tutumo ante mpuu-mpuu pepatuduki nakono to niwei-kumo si-ko. Pade iko kana mangkakamu oa kaparisayaa si Kristus Yesus pade mampotowe singkapada manusia-mu. Sumawee ee mamala mu-powia apaa ikita nosaongu rara ante i Kristus Yesus. 14 Niparisayakamo-ko nu Allatala pepatuduki to nakono mpuu ee. Jagaimo ee ante petulungi nu Inosa Gasa nu Allatala to natuwu ri rara-ta. 15 Nincani-muda bakote sumawee tou to neparisaya ri Provinsi Asia nampaleisi-kumo, iwee mbii-da i Figelus pade i Hermogenes. 16 Etumo sabana yaku nosambaya bona i Pue Allatala mampotowe oa sumawee tou ri rara ncou ni Onesiforus, apaa i Onesiforus namei oa nampakadonu rara-ku. Noudamo ri rara nu tarungku-ku, i Onesiforus tado naeya. 17 Naratapa ri Roma, nipesimbukui oa-na nangonco-ku duu-na nipomberataka-na ku. 18 Pade nincani-muda Timotius bakote ri ngata Efesus nadea ngkani i Onesiforus nantulungi-ku. Etumo sabana yaku nosambaya bona i Pue mampopekalio asi rara-Na si Onesiforus ri eo ni Pue motangara sumawee manusia ngoni.