Silaka ri tempo tadopa narata i Pue
2
1 Sarara-sarara nancambelai karata ni Pue-ta i Yesus Kristus, pade nancambelai popasintobu-ta bona meari moroa ante Ia, eimo to ka-perapi si komi: 2 Nemo magasi gaga komi maingu ba mabatoro ande maria kareba manguli: “Naratamo eo ni Pue.” Nemo mampekiri ewa ee, noudamo tou manguli: “Inosa Gasa nu Allatala nangulikakaka-kamo ewa ee.” Nemo mbii raparisaya ande tou manguli: “Nironge-kumo i Paulus nanguli bakote narata mpanculimo i Pue Yesus ri dunia.” Pade ande kareba ewa ee rapakatu ri rara nu sura, nemo mi-parisaya bakote sura ee lako si kami. 3 Noudamo beiwa, nemo mampalambaka tou mobagiu komi. Sabana sintou tadopa marata Eo ee, kana majadi ncala nuanu ei mokoulu: Madea tou to kana mampesapuka Pue Allatala, pade kana meonga mbii sadua Tou Daa to nampodaa parenta ni Pue Allatala, to kana mesua ri rara naraka. 4 Ante kalangko nu rara-na ia ee kana mangewa sumawee to nipenombai nu manusia ba ri sumawee karampua to niuli nu manusia najadi Allatala. Pade ia mbii kana moncunda ri rara Sou nu Allatala pade mopangara bakote ia-mo Allatala. 5 Tora-da bakote basangkia ngkani-kumo nanguli sumaweena ee ri tempo-ku noroa ante ikomi-dapa. 6 Pade ikomi nanguncani nuapa to notolawani kajadi nu sumawena ee. Agiana ngoni ri tempo to nipakatatapumo nu Allatala, Tou Daa ee kana meonga. 7 Tou Daa ee nopamulamo nobago bongo-bongo, agiana tempo ei naria-dapa to nantolawani. Agiana ande napopangkosu nu Allatala nuanu to nantolawani ee, 8 isee-da pade meonga-da Tou Daa ee. Ande maratapa i Pue Yesus, Ia kana mopatesi Tou Daa ee. 9 Tou Daa ee kana meonga ante kuasa bete lako ri Mbagou nu Seta, pade kana mowia ngila ngaya pampetonondi nepakamoleara to nampabagiu tou. 10 Ia kana mampake ngila ngaya pebagiu to nadaa bona mampakapusa tou-tou to kana maropu. Isira kana maropu sabana nampoara pade tado nampobelo kareba to nakono nancambelai i Yesus to mamala mampakasalama-ra. 11 Etumo sabana Allatala nowia pampekiri-ra najadi napusa, nangkajadika isira namparisaya nuanu to tado nakono. 12 Bunturuna, sumawee tou to nampobelo mowia jeko pade to tado neparisaya ri nuanu nakono ee, kana rasuku.
Nipelisi bona rapakasalama
13 Sarara-sarara to nipotowe ni Pue! Ikami kana mosukuru oa ri Allatala sabana ikomi, apaa lako ri paramulana nipelisimo komi nu Allatala bona rapakasalama. Nuanu ee najadi apaa ikomi neparisaya ri kareba to nakono nancambelai i Yesus, pade lako ri pobago nu Inosa Gasa nu Allatala si komi bona mopajadi komi todea nu Allatala to nagasa. 14 Eemo patuju nu Allatala pade nipokiomo komi ri rara nu Kareba Belo to niparata-ka si komi. Allatala nampokio komi, apaa Ia madota bona ikomi mamparata pampemabose Pue-ta i Yesus Kristus. 15 Etumo sabana, sarara-sarara, pakaroso pentidaa pade kakamumo oa pepatuduki-pepatuduki to niwei-ka si komi, ba to niuli-da, ba to nitulisi-da.