Mosambaya pade mobago
3
1 Kaopuana sarara-sarara, sambayani-kamo. Posambayamo bona kareba lako si Pue mamala oa magasi mowole pade ratarima ante mabelo, nasimbei ante to najadimo si komi impia. 2 Sambayani mbii bona Allatala mampakasalama-ka lako ri tou-tou to nadaa mpuu. Sabana tado sumawee tou namparisaya Kareba Belo lako si Pue ee. 3 Agiana ikomi mamala meparisaya mpuu-mpuu si Pue Allatala. Ia kana mampakaroso komi pade motalendusi komi lako ri nuanu to nadaa to nipowia nu tou ntani. 4 Pade niparisaya mpuu-mpuu-ka ri rara sanga ni Pue, bakote i Pue mantulungi komi bula-mi mowia nuanu to nituduka-ka komi pade kana mi-powia oa nuanu ee.5 Ikami nosambaya bona i Pue mantulungi komi bona mi-ncani ntoto bakote Allatala mpuu-mpuu nampotowe komi, pade bakote Kristus nambei karoso nu rara si komi. 6 Sarara-sarara, ante kuasa ni Pue Yesus Kristus, ka-tudu komi bona mi-kawaosi sumawee sarara-sarara-mi to natuwu nekilose pade to tado nantutu pepatuduki-pepatuduki to niweika si sira. 7 Nincani dodo-mida bakote ikomi kana mampetumbui inggu-ka. Ikami tado nekilose tempo-ka natida riolo-mi. 8 Ikami tado nangkondi kondia to tado nibayari-ka. Agiana eo bengina-ka nobago ntomo bona ikami tado mampakasusa bayema-yema to lako riolo-mi. 9 Kakono-konona masipato-kada mi-tulungi. Agiana ikami madota bona ikomi mantutu nuapa to nipowia-ka. 10 Ri tempo-ka natida riolo-mi, niweikaka-kamo komi atura ei: “Tou to tado madota mobago, tado mamala-ya mangkondi.” 11 Pade niuli-ka ewa ei sabana nironge-ka bakote naria tou riolo-mi to natuwu ante lose-na. Isira tado nampowia banuapa-pa mpuumo, kawule nasesewa nampogalo-galo urusia nu tou ntani. 12 Ante kuasa ni Pue Yesus Kristus ikami noparenta pade nambei pepopatora ri tou-tou ee, bona isira mobago belo-belo pade mangonco dodo katuwua-ra. 13 Agiana ikomi nemo meuntu mowia nuanu to nabelo. 14 Mbelakana ngoni maria tou to tado mantutu nuapa to niuli-ka ri rara nu sura ei. Mainga-da komi ri tou ewa ee pade nemo mowega ante ia bona majadi maeya-ya. 15 Agiana nemo mi-powia ya ewa bali-mi, pade patuduki-yamo ewa sarara saongu kaparisayaa.
Tabe
16 Kaopuana ikami mosambayani komi si Pue to nambei oa-ta kasanaa ri rara nu ngila ngayana. Pade i Pue mamporoasi komi sumawee. 17 Yaku, i Paulus, to notulisi mboto ante pale dodoku petabe kaopua ri sura ei. Eemo pampetonondi bakote sura ei mpuu-mpuu lako si yaku. 18 I Pue-ta, i Yesus Kristus mantiroi sarara sumawee.