Sura ni Paulus to karongkani ri todea nu Allatala ri Tesalonika
Tabe
1
1 Sura ei lako si kami, i Paulus, i Silwanus pade i Timotius. Ka-pakatu si komi sarara-sarara ri Tesalonika, to najadi todea nu Allatala Tuama-ta pade i Pue Yesus Kristus, 2 ikami nancarumaka bona Allatala mambei towe rara pade kasanaa nu rara si komi.Posukuru pade Sambaya
3 Ikami kana mosukuru oa ri Allatala, sabana ikomi sarara-sarara. Apaa ikomi nantambei oa neparisaya mpuu-mpuu si Kristus, pade ikomi nantambei oa nombepotowe sadua ante ntanina. Nuapa nipowia-ka ee masipato ami-da. 4 Etumo sabana nuapa pade nololita-ka nancambelai komi butu ngkanina-ka nampelei todea nu Allatala ri pearia ntani. Ikami nololita nampomole beiwa karoso mpeparisaya-mi si Kristus noudamo bula-mi niduasi pade nantodosaka kapepaa. 5 Eimo popadupa nancambelai kanoa potangara nu Allatala: Ikomi nantodosaka kapepaa apaa namparisaya ri Allatala, eemo sabana ikomi masipato majadi todea ri rara Poparentaa nu Allatala. 6 Ia kana mampowia nuanu to nanoa, pade kana mobalasi kapepaa ee ri tou to nampowia komi niruncu nu kapepaa, 7 pade nambei kawoe nu rara si komi pade si kami lako ri kapepaa. Allatala kana nambei kawoe nu rara si kita pura tempo ni Pue Yesus mesompo lako ri suruga pade mampopesuwu koro-Na ante malaeka-malaeka-Na to naponu ante kuasa ri rara nu apu to nengkalala, 8 pade Allatala kana mampabalasi tou-tou to tado nanguncani-Ya pade tou to tado nadota natuwu nantutu Karebe Belo nancambelai i Yesus, Pue-ta. 9 Tou-tou ee kana mantarima suku mate duuna masae-sae, rawura lako ri ngayo ni Pue pade tado mamala mamparasai kakuasaa-Na to neliu mpuu kalangkona. 10 Sumaweena ee kana majadi ri eo karata-Na ngoni bona rapemabose nu todea-Na pade bona rabila nu sumawee tou to neparisaya. Ikomi mbii kana maria riolo nu todea nu Allatala ee, sabana ikomi neparisayamo ri kareba to niparata-ka si komi.
11 Etumo sabana ikami nosambayani oa komi. Ikami nosambaya bona Allatala mopajadi komi masipato matuwu mantutu dota-Na, eemo pade nipokio-Namo komi. Pade ikami nosambaya bona Allatala mambei komi kakuasaa-Na, bona mantulungi komi mampeponui dota-mi mowia nuanu to nabelo, pade mampakaopu sumawee bago to nipowia-mi apaa neparisaya si Kristus. 12 Ante nuanu ee-mo Pue-ta i Yesus kana napemabose nu sumawee tou, pade ikomi mbii kana napemabose ni Yesus sabana towe rara nu Allatala-ta pade i Pue Yesus Kristus.