I Paulus nokapala ntasi nalou ri Roma
27
1 Nibotusi-pa bakote ikami kana mokapala ntasi malou ri Italia, i Paulus pade basangkia dua to nitahangi ntanina niwei si Yulius, tadulako nu surodado Mbagou Bete ri kambagoua Roma. 2 Ikami nencawi kapala ntasi to narata lako ri ngata Adramitium, pade neongko-kamo ante kapala ntasi ee to nasadiamo mewote ri pencowea-pencowea ri propinsi Asia. Aristarkhus, to Makedonia lako ri Tesalonika, nokapala ntasi mbii noroa-roa ante ikami. 3 Kaneilena narata-kamo ri Sidon. I Paulus niurusi belo-belo ni Yulius. Nipaliu-nada i Paulus namposaroai wega-wega-na bona mamala-ra mambeika-ya nuapa to niparalou-na. 4 Lako isee-ka nopapola pokapala-ka. Apaa ngolu newuru lako ri ngayo kapala ntasi-ka, nenana oa kamo nokapala ntasi ri sowea lewuto Siprus bona matetalendusi lako ri ngolu ee. 5 Pade nokapala-kamo ri tasi to nombengayosi ante propinsi Kilikia pade Pamfilia pade narata ri ngata Mira, ri propinsi Likia. 6 Isee tadulako ee namparata saongu kapala ntasi lako ri Aleksandria madota malou ri Italia. Pade nipopoencu-na kamo ri kapala ntasi ee.7 Apaa narimboso mpuu ngolu newuru oa lako ri ngayo nu kapala ntasi-ka, nangkajadika rarana basangkia eo nawewe mpuu kapala ntasi-ka nolumako pade ante susudu wuku-ka narata najungku ri ngata Knidus. Apaa ngolu namburu oa-dapa, nampawuru kapala ntasi-ka, nangkajadika nenana-kamo mbira ri selatan lewuto Kreta najungku ri pandona Salmone, natetalendusi-kamo saodi lako ri ngolu mpamburu ee. 8 Ante susuduwuku-ka nokapala ntasi nenana ri sowea nu lewuto ee, duuna narata ri saongu pearia to nisanga Pencowea Nagaya, najungku ngata Lasea.
9 Nasae-kamo nabonto, pade Eo Puasa nu to Yahudi naliumo. Tadomo ma'ama mopapola pokapala ntasi, apaa ande maliu damo Eo ee balumba nu tasi nabetemo. Etumo sabana i Paulus nampopatora-ra, nanguli-ya: 10 “Sarara-sarara, nikalio-ku ei ande tapapola oa mewote tasi ei, kana mapepa mpuu ta-ronge, pade madea karugia-ta, tado kawule kenia pade kapala ntasi-ta, agiana ante ikita mbii kana maweso.” 11 Agiana tadulako ee niparisaya-napa topopajala kapala ntasi ante kapute nu kapala ntasi ee, pade lolita ni Paulus. 12 Pencowea ee tado ami nabelo napencowei nu kapala-kapala ntasi bula nu lengi. Etumo sabana saganta ntongo tou ri kapala ntasi ee nampasitujui bona mopapola pokapala ntasi mampaleisi pencowea ee, apaa isira madota mampesimbukui mencowe ri Feniks pade meari radou bula nu lengi. Feniks ei pencowea ri lewuto Kreta nongayosi barat daya pade barat laut. 13 Tempo ee ngolu lako mbira ri selatan newui, pade topobago ri kapala ntasi nampekiri mamala-ramo mopapola pokapala-ra mantutu liwo-ra. Pade niore-ramo patudu, pade nokapala ntasi-ramo nenana ri sowea nu lewuto kreta.
Kapala ntasi nasese
14 Agiana tadopa nasae naratamo ngolu mpamburu to nisanga ngolu matayo lako mbira ri lewuto Kreta, 15 namparumpa kapala ntasi-ka. Etumo sabana pade kapala ntasi-ka tado namala napola oa nangewa ngolu ee, jadi nipalambaka-kamo kapala ntasi-ka nawaro nantutu alu nu ngolu ee. 16 Nawaro-kapa mbira ri selatan lewuto kodi to nisanga Kauda, natetalendusi-kamo saodi. Isee susuduwuku-ka nampemala duanga kodi nu kapala ntasi ee. 17 Nipasawipa duanga kodi ee ri kapala ntasi, kapala ee mbii niwewe nu kaloro bete natiku bona maroso ntoto. Apaa naeka masese ri bone Sirtis to narede, nisomponaka-kamo layar pade nipalambakamo kapala ntasi ee nantutu alu nu ngolu. 18 Apaa ngolu nambentasi oa, nangkajadika kaneilena kenia nu kapala ntasi nopamulamo nitadiaka ri rara ntasi. 19 Kaneilena nitadi mbii nu topobago-topobago ri kapala ntasi ee pakakasa-pakakasa nu kapala ri rara ntasi ante pale mboto-ra. 20 Rarana basangkia eo-ka tado naria nangkalio eo pade betue, pade ngolu mbii nambentasi oa. Kaopuana tadomo nisarumaka-ka ba masalama-kadapa.
21 Rarana basangkia eo mbii kasaena tou-tou ee tado nangkondi. Nokongkoremo i Paulus ri tongo-tongo-ra pade nanguli: “Sarara-sarara! Ande nitutu-mi lolita-ku ee sei tadomo tapapola pokapala ntasi-ta lako ri lewuto Kreta ee, tado ta-todosaka karusaka pade karugia ewa ei. 22 Agiana tabuluna ewa ei ta-mo, ku-perapi mpuu-mpuu si komi pakaroso rara-mi. Tado namo saduaa komi kana mamate, agiana kapala ntasi ngkola-ta ei kana malome. 23 Sabana sambengii malaeka lako ri Allatala to nipenombai-ku, pade to nangkakamu katuwu-ku, narata si yaku. 24 Nanguli malaeka ee: ‘Nemo maeka, Paulus! Apaa iko kana mampotomuka Mbagou Bete. Pade lako ri towe rara nu Allatala si-ko, sumawe tou to nokapala ntasi ante iko kana masalama.’ 25 Etumo sabana, Sarara-sarara, pakaroso rara-mi! Apaa niparisaya mpuu-ku Allatala bakote sumaweena ei kana majadi ewa nuanu to niuli-Na si yaku. 26 Agiana ikita ei ngoni kana marampe ri saongu lewuto.”
27 Kasampulu aopo mbengina nawaro narata ri tasi Adria-kamo. Rapa-rapa ntongo bengi topobago ri kapala ntasi norasai kapala ee najungkumo ri lorena. 28 Pade niulu-ramo kaloro ante watu bona mampetudu kandala nu tasi. Ntanono ndalana isee makape tolu mete. Tadopa nasae nipetudu mbii-ramo, isee ndalana makape romete. 29 Apaa naeka-ra kapala ntasi masese ri watu ntasi, ninawu-ramo aopo ngkou patudu mbira ri guli nu kapala ntasi, pade nancarumaka kena-kena mabaamo. 30 Topobago-topobago ri kapala ntasi ee madota mangani bongo-bongo lako ri kapala ee. Nipopesompo-ramo duanga kodi ri ue ewa to mampopesompo patudu mbira ri ntoda nu kapala ntasi. 31 Agiana i Paulus nanguli ri tadulako pade surodado-surodado to naria ri kapala ntasi ee: “Ande topobago ri kapala ntasi ei tado matida ri kapala ntasi ei, ikomi sumawee tado mamala masalama.” 32 Eemo sabana pade surodado-surodado ee nobotusi kaloro potaka duanga kodi ee, nangkajadika nawaromo duanga kodi ee.
33 Tempona mapara mabaamo, nipasuru-ramo pura ni Paulus mangkondi. Nanguli-ya: “Sampulu aopo eomo saena komi sarara sumawee kawule nopea-pea dodowee ante susa rara-mi pade tado namo nangkondi nuapa-pa. 34 Etumo sabana ku'ulikaka komi, pangkondimo komi ulu bona maroso komi. Apaa sarara sumawee kana masalama-da pade tado nuapa-pa makajadia ri koro-mi.” 35 Naopu-yapa nanguli iwee nialamo ni Paulus roti pade nosukuru ri Allatala ri ngayo-ra. Naopu ee nitibe-tibe namo roti ee pade nibagi-bagi-na. 36 Jadi naroso nculimo rara-ra, pade nangkondi-ramo pura. 37 Sumawee to ri kapala ntasi ee naria roatu pitumpulu aono kadeana. 38 Nabosu-rapa nangkondi, nitadi-ramo gando kenia-ra ri tasi bona malingaa kapala-ra. 39 Pade poyo-napa, topobago ri kapala ntasi nangkalio lorena, agiana tado nincani-ra lorena rimba ee. Patuju-ra bona mamala mampopencowe kapala ntasi isee. 40 Nibotusi-ramo kaloro nu patudu pade nipalambaka-ramo patudu ee nalolo ri tasi, pade nobolesi lako mbii kaloro-kaloro to nipopotaka kamudi nu kapala ntasi ee. Pade niore-ramo layar mbira ri ntoda nu kapala ntasi bona molumakomo kapala ntasi ee nawuru nu ngolu mantopa ri sowea. 41 Agiana kapala ntasi ee nasese ri tongo mbone. Mbira ri ntodana nasese pade tado namala nokale, mbira ri guli mbiina nabengka nitampe nu balumba ntasi narimboso.
42 Surodado-surodado ri kapala ntasi ee madota mopatesi pura to nitahangi ri kapala ee, apaa naeka-ra nemo-nemo ngoni maria-ra monangu mbira ri lorena pade mangani. 43 Agiana tadulako ee notagi-ra apaa ia madota mampakasalama i Paulus. Nitudu-namo sumawee to namala nonangu mengkawantu mokoulu pade monangu mbira ri sowea, 44 tou ntanina metutu ante mampoangkuna dopi-dopi pade kabengkaa nu kapala ntasi ee. Iweemo dalana pade sumawee-ka namala nasalama narata ri lorena.