I Paulus ri Malta
28
1 Nasalama pura-kapa narata ri sowea, pade nincani-kada bakote lewuto ee nosanga Malta. 2 Todea ri lewuto ee nabelo mpuu rara-ra si kami. Sumawee-ka nisombo-ra ante belo-ra pade nipatuwuka-ra kamo apu apaa nopamulamo uda pade nalengimo. 3 I Paulus nopasidoro kou, pade nidumpu-na ri apu. Bula-na nodumpu ee, nesuwu sambaa ule mpobisa apaa nikatuwui nu apu ee, pade nantilo pale-na. 4 Pangkalio nu todea ri lewuto ee ule ee nentaka ri pale ni Paulus, nombeulikaka-ramo: “Topepatesi daku tou ei, apaa noudamo nasalama-ya lako ri tasi, agiana Karampua Bangkele Mpetangara tado nampalambaka-ya matuwu.” 5 Agiana i Paulus notamperengi ule ee ri rara nu apu pade tado namo saodia nadua nirasai-na. 6 Nipekiri-ra tadomo masae pale ni Paulus mengkamba ba madungka-yamo pade mamate. Agiana nipopea-rapa basangkia kasaena tado naria nuanu to najadi si Paulus, nobalimo pekiri-ra pade niuli-rada i Paulus karampua baleilo.7 Tado nakawao lako isee naria tana ni Publius, pangka bete ri lewuto ee. Ante belo rara-na nantarima-ka pade nipotorata-na rarana tolu eo. 8 Tempo ee tuama ni Publius nadua, nampakoko pade nangote. Naloumo i Paulus nangkalio tuama ni Publius to nadua ee pade nosambaya ante nountu pale-na ri tuama ni Publius ee nangkajadika nabelo-yamo. 9 Etumo sabana lako ri kajadia ee, tou-tou to nadua ri lewuto ee narata si Paulus, pade nipakabelo pura-na. 10 Isira nampabila mpuu-ka, pade malou-kapa mokapala ntasi, nikeni-ramo ri kapala ntasi sumawee kaparaloua-ka mokapala ntasi.
I Paulus narata ri Roma
11 Tolu mbula-kapa radou, neongko-kamo lako ri lewuto ee nencawi saongu kapala ntasi lako ri Aleksandria, to nencowe ri lewuto ee sinungka tempo nu lengi. Kapala ntasi ee nampake pampetonondi “Dioskuri,” to nibatuasi karampua baleilo norapi i Kastor pade i Poluks. 12 Nencowe-kamo ri ngata Sirakusa pade neari isee tolu eo. 13 Lako isee nokapala ntasi mbii-kamo nenana sowea duuna narata ri ngata Regium. Kaneilena nopamulamo ngolu newuru lako mbira ri selatan, nangkajadika rarana roeo pade narata-kada ri ngata Putioli. 14 Isee-kamo notomu ante basangkia dua tou to namparisaya i Yesus, pade nibawei-ra kamo meari si sira rarana saminggu. Pade nalou-kada ri Roma. 15 Tou-tou to neparisaya ri Roma namparonge kareba karata-ka, nangkajadika-ra namei duuna ri Potomu Apius pade Pasanggrahan Tolu bona mosombo-ka. Nipotomuka-rapa ni Paulus, nosukuru-yamo ri Allatala pade narosomo rara-na.
16 Narata-kapa ri Roma, nipaliu-da i Paulus meari sadua-na sancou ante najagai nu sadua surodado.
Pololita ante to Yahudi ri Roma
17 Naliupa tolu eo, nipokiomo ni Paulus panakoulu-panakoulu nu to Yahudi isee. Pade notobu-rapa, nangulimo i Paulus si sira: “Sarara-sarara! Yaku tado naria ba nuapa-pa sala-ku si kita to Yahudi, ba nosapuaka ada nu totua-ta. Noudamo iwee yaku nisoko ri Yerusalem pade niwei ri tou-tou to Roma. 18 Niurusipa kara-kara-ku, ntanono tado naria namo sangayaa nuanu nipowia-ku masipato rasuku mateka-ku, pade tou-tou to Roma madota mampakabebasi-kumo. 19 Agiana apaa tou-tou to Yahudi tado nantarima ande rapakabebasi-ku, yaku kana motuntu kara-kara-ku ratangara ri potangaraa Mbagou Bete Roma. Bo ee yaku nowia ewa elouria tado ba mampomasala ikita to Yahudi. 20 Pade etumo sabana yaku nerapi motomu ante ikomi bona mamala-ta mololita. Pade nisilu-ku ante rante ase, sabana namparisaya Topepakasalama to nisarumaka nu to Israel.”
21 Agiana nanguli-ra si Paulus: “Tadopa naria nitarima-ka namo sampekaa sura lako ri Yudea nancambelai-ko. Pade tado namo saduaa to Yahudi lako radou narata nangkeni kareba nancambelai-ko ba nampololita nuanu nadaa nancambelai-ko. 22 Agiana ikami madota mamparonge nuanu niparisaya-mu, apaa ikami nanguncani riumba-umba tou-tou nangkanene pepatuduki to niparisaya-mu etu.”
23 Pade nipakatatapu-ramo ante i Paulus motomu ri sauatu eo. Tempo ee nadea tou narata ri pearia ni Paulus. Lako sangkabaa duuna kinowiana i Paulus nopanotosi pade nampololita si sira kareba nancambelai Poparentaa nu Allatala moparenta majadi Mbagou. Ante nampake tulisia-tulisia lako ri Buku ni Musa pade Buku nu nabi-nabi, i Paulus nampesimbukui bona raparisaya-ra i Yesus. 24 Naria to namparisaya nuanu niuli ni Paulus, agiana naria mbii to tado namparisaya. 25 Ante rara sore nontani nipawia-ramo pearia ee, naopu i Paulus nanguli ewa ei si sira: “Nakono mpuuda nuapa to niuli nu Inosa Gasa ri totua-mi to nitulisi ni nabi Yesaya! 26 Allatala nanguli:
‘Koumo ulikakaka ri todea to Israel ei:
Ikomi kana mamparonge oa, agiana tado mi-paha,
ikomi kana mangkalio oa, agiana tado nincani-mi nuapa to najadi.
27 Sabana rara nu todea to Israel ei nakoo-mo,
talinga-ra najadi nawongomo
pade mata-ra napirimo.
Ei najadi bona mata-ra nemo mekalio,
talinga-ra nemo meronge,
rara-ra nemo mabaa,
bona nemo manculi-ra si Yaku,
pade Ku-pakasalama.’ ”
28 Kaopuana nanguli mbiimo i Paulus: “Sarara-sarara kana mi-ncani bakote kareba kasalamaa to lako ri Allatala ngkapuri ei nipopowolemo ri tou-tou to tado to Yahudi. Pade isira kana mantarima kareba ee!” 29 [Naopu-pa i Paulus nanguli ewa elouria, tou-tou to Yahudi ee nampawia pearia ee nobungka lako.]
30 Rarana rompae kasaena i Paulus neari ri Roma, ri sou nibayari dodo-na. Nadonu-ya nantarima sumawee tou to narata namposaroai-ya. 31 Pade ante nabia i Paulus nampololita si sira nancambelai Poparenta nu Allatala majadi Mbagou pade nancambelai i Pue Yesus Kristus. Nabebasi dodo i Paulus nowia nuanu ee, tado namo nitolawani.